Ʒare Biri 23:16-26

¹⁶Eme Wofuŋzi fuacnerâ dâŋ ʒiŋuc muhuc âzâcnewec: “Go Balakerao risierâ dâŋ gazapemu i âzâcnezemec.”

¹⁷Eme risierâ honeme Balake e mi Moabi ŋic fekicne jaŋehec bâzi‐ticnere maŋfuŋko jaha domanʒepieŋ i! Eme Balakezi ʒiŋuc muhuc wiocnewec: “Wofuŋzi mo dâŋ moc gazajec?”

¹⁸Eme Bileam e ʒuhuckerâ jambuŋdâŋ muwec: “Balake, go faharerâ manac, Ziporore ŋokâ, go norao hazec râec.

¹⁹Anutu e ŋic aricne, irec burec moc mi eekac, e ŋicte ɋâric wâc aricne, irec maŋne mi risieocmu. Eki dâŋ moc mume sâcne mi sanaŋkeocmu me? Me mumupaŋ dâŋ mume fârinehec sâcne mi eocmu me?

²⁰Manakic, no jambuŋdâŋ mupemurâ mutara‐narekicne. Eki jambuŋ‐jopawecte no sâcne mi sâwec‐jopapemu.

²¹Jakobore ɋâricfâc jaŋerao wiac hâhâwicne moc mi fome honekopac, erâ Israe ŋic jaŋere ŋondeŋko ʒârâ ʒâpâ wâc mi fokac. Wofuŋ Anutu‐jeŋiczi jaŋehec juekac, ehame ŋicwofuŋ iŋucne ofac hecneeŋgopieŋ.

²²Anutuzi Aigita mâreŋkonec jowac‐jopame wefumbiŋ, irec ere manapie tâpiri sâkohec eekac.

²³Jakobore ɋâricfâc jaŋerao qaŋgec qapene fâri tâmiric eocmu, â Israe ŋic sâwec‐jopapene fârimâc jaha eocmu. Dameŋ ʒiŋuczia hâcne Jakobo â Israe ŋic jaŋere ʒiŋuc mueŋgopieŋ: ‘Anutuzi jaŋerao mâsi sâko bawec i!’

²⁴Opoŋ, jaŋe ŋicsaric! Laioŋ ŋokacne iŋucne fahareeŋgopieŋ, â iaioŋ ŋicne iŋucne tarahuc he raeŋgopieŋ. Jaŋe qowi qarâ mi nâfârehuc ine mi waha foniŋmu, â qowi qakicne irec soc mi nâhuc wâc mi fomananiŋmu.”

²⁵Eme Balakezi Bileam ʒiŋuc âzâcnewec: “Go sâwec‐jopazore manatec quŋkeme ine jajambuŋ‐jopa i wâc mi ezemec.”

²⁶Iŋuc mume Bileamzi dâŋ kecʒiŋuc bâtikiecnewec: “No ʒiŋuc gazapac i! ‘Wofuŋzi dâŋ nazaocmu i sawa mupemu.’”