Nəğmələr Nəğməsi 2:2-17

²Mənim yarım qızlar arasındadır, Elə bil bir zanbaq tikanlar arasındadır.

³Mənim sevgilim oğlanlar arasındadır, Meşədəki ağaclar arasında alma ağacına oxşayır. Kölgəsində oturmaqdan zövq alıram, Meyvəsinin dadı damağımdan getmir.

⁴O məni ziyafət evinə apardı, Sevgisi bayraq kimi üzərimdə dalğalanır.

⁵Mən eşq xəstəsiyəm, Kişmiş verin, qüvvətlənim, Alma verin, cana gəlim.

⁶Sevgilim sol əlini başımın altına salır, Sağ əli ilə məni qucağına alır.

⁷Ey Yerusəlimdəki qızlar, sizi and verirəm Dişi ceyranlara, çöldəki marallara! Bizi bu sevgidən oyatmayın, ayıltmayın, Qoy könül istəyənəcən qalsın.

⁸Bu, sevgilimin hənirtisidir! O, dağlardan aşaraq, təpələrdən sıçrayaraq gəlir.

⁹Sevgilim ahuya, maral balasına oxşayır, Budur, hasarımızın o tayında dayanır, Pəncərələrdən boylanır, barmaqlıqlardan baxır.

¹⁰Mənə belə dedi sevgilim: «Dur gəl, yarım, gözəlim.

¹¹Budur, artıq qış keçib, Yağıntılar kəsilib.

¹²Hər yanda güllər bitib, Nəğmə oxumağın zamanı yetib, Qumrunun səsi torpağı bürüyüb.

¹³Əncir yaşıl bar gətirib, Üzüm çiçəklənib ətrini saçır. Dur gəl, yarım, gözəlim!»

¹⁴Ey gözəl göyərçinim, Sanki sal qayalarda, sıldırımlarda gizlənmisən. Qoy üzünü görüm, səsini eşidim, Çünki şirin səsli, gözəl surətlisən.

¹⁵Tülküləri, kiçik tülküləri tutun, Üzümlükləri korlamağa qoymayın, Çünki bağlarımız çiçəklənib.

¹⁶Sevgilim mənimdir, mən də onunam, O, sürüsünü zanbaqlıq içərisində otarır.

¹⁷Gün sərinləşənəcən, kölgələr düşənəcən, Ey sevgilim, geri qayıt, Şişuclu dağların qoynunda olan Ahuya, maral balasına bənzərsən.