MII GUN MIINU MO 26:4-19

⁴Aris ’Kwani Yahuuda/ ’baar mo mishi miim pem ki yil gi mondiki/em pem ’peni yil pem kun ṯwa/a/ kun ’kon ka muŋ’kup̱ e bwam unim pem kun ta kal pem mo dhali e Pa Urushaliim si’da/ mo.

⁵Uni mishki aha/ ’peni ṯwa/a/ mo, waḵki/ uni ta gi bwa mmoṯor gwo mo, ki aha/ dina ki ji Wathim P̱arisi mmota jim buni kun miin ka ji sho’k ki nyanye/ mii gun onu gom ji gi luŋum bam mo.

⁶Dhali shwane/ aha/ dosha mahan mmominu dwall gwo goma ’teŋ kap̱e/ gom gwo jin onu is ’peni Arumgimis gi ibabam bam mo be.

⁷Iwaḵ bam kun ’koni ’kume’d i’ce’dka su/ mo ḵoci e mo mmomii to goma Arumgimis ki mon’thiny ilu/ mo dhali montee mmohil ’kup̱ ki gwo jin onu is mo mmop̱u’du/ mo. Dhali goma ’teŋ kap̱e/ yan mo tani aha/ yer ma ris ’Kwani Yahuuda/ ’baar mo is ki gway mo, ayy maliḵ.

⁸Ata ṯosha /e ki a’di ta gwo jin molu gam is mo waḵka Arumgimis midi ’taki ’de’k jin wu’d mo?

⁹Aha/ ka jiŋ gana/ kulumkina gwo ibwa ki is pem mo ki aha/ mina mii mii to ka ris kun ta kuny c̱a’ckona p̱o/ gway ma Yesus gi Pa Naasira mo.

¹⁰Dhali yan si’da/ miikika/ e Pa Urushaliim mo dhali uni ka ris mu’thkika/ eya sijin mo ’peni imandhunu ki she/ ki dhelel dhelel mo mmobu’thkika/ gwo ki mom’bi’th ’peni igasiis kun can mo dhali ki uni ’kokunu mo mmo’kosh jwa mo tani aha/ si’da/ c̱ikina ’twam pem ap̱o/ uni mo be.

¹¹Dhali mmori’cka/ uni me’d ka ris eya ris gu’b gi montul isi ’baar mo tani aha/ ṯu’ckina uni mo mmowal gwo sor mo, dhali mmoshwakika/ anyor mo isi, ki bar bar ap̱o/ uni mo tani aha/ p̱u’dkina ka pije/ mmotagi isi pan tiya si’da/ mo mmoṯo’c uni bwa mo be.

¹²E moyam pem yan mo tani ki aha/ dikina mmoya e Pan Dimashk mo mmokaru aha/ ’pen mo ki mom’bi’th ’peni igasiis kun can mo tani

¹³ka tente/ di’di bwaŋ ’kup̱ mo tani, ayy maliḵ, aha/ mishkina e bway moŋkush jin boli’da tente/ e ki mon’twaḵ mo mo mmo’twaḵ mo mmo’kamaa/ is mo dhali uni gun nyaḵki ii ki aha/ mo be.

¹⁴Dhali ki aman ’baar mo ’kokina mo mmobiṯa p̱owa ’cesh mo tani aha/ ciḵkina ’twa/ jin o gwo i aha/ ki ’twaŋ ’Kwani Yahuuda/ mo ki: Shawuul Shawuul, ata ṯoca /e aha/ ’kus kan mo? A’di diṯa mii gom /e mmoruḵa /eya ruḵ ki si mo mmoṯi’k a’di ’pen mo.

¹⁵Dhali aha/ thoḵa gwo mo ki: /E tana ja Tap̱a? Dhali Tap̱a ki o gwo mo ki: Aha/ tana aYesus jin ṯoca /e ’kus mo be.

¹⁶Hili cuyi /e mis mo dhali doshi ki sho’k pini mo haali/ gom ’pemen yan kan tan mo tani aha/ pina /e i is mo mmothoson /e mo mmota amanmii to mo dhali mmota aman/o gwo gom to gun mishkina /e aha/ mo dhali gom to gun miga/ pi /e i is mo

¹⁷mmo’cuḵ /e ’peni ’kwani mo dhali ’peni ’kwani kun ’koki ta ’Kwani Yahuuda/ e uni gun miga/ ṯu’c /e mmoya mo be.

¹⁸Mmoḵa’d uni em buni mo ki uni mini ṯu’k mo ’peni mondhurumi’d ’kup̱ ki moŋkush mo dhali ’peni mom’bi’th ma Seṯaan eya Arumgimis mo, ki uni mini bu’th moŋgwam gom miinthus mo dhali mal ibwaman uni gun dhunu ki she/ ki dhelel dhelel ki moŋgam gwo is e aha/ mo be.

¹⁹Wakan si’da/, ayy Maliḵ Aghripaas, aha/ dinaki usha ush e tony jan jin piyaa/ i is ’peni momis mo.