Menge Ininang 13:22-38

²²Penga niyan, impelowà te Timanem si Saulo aw inselilin din si David limowan kandan, so minikagi se Timanem, ‘Pinemallì ko den se batà i Isai si David. Neluba a kandin so tomanen din se kedita te punù ko kandin.’

²³“Sebad bowad-bowad i David si Jesus. Sikandin se insogò te Timanem amon megpelowà te otaw lekat te salà. Sikandin se tapay din impakang diyà kenitadon, so sikitadon se bowad-bowad i Israel.

²⁴Te wedà pa pegtoladà si Jesus, migtoladà si Juan diyà te menge bowad-bowad i Israel te keilangan megselsel dan te salà amon bonyagan din dan.

²⁵Te wedà pa kematay si Juan, minikagi sikandin, ‘Kenà ko se pinelimanan niyo, meneng doen pa domateng mekeselilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.’

²⁶“Penenalan kaw menge kedowa ko, menge bowad-bowad te kemonaan tadon si Abraham, aw kedita niyo egtolò te Timanem. Sikitadon se pinetega-tegahan te Timanem te doen den kelowaan lekat te salà.

²⁷Meneng se menge otaw doton te Jerusalem aw otaw limowan kandan, wedà dan ketaga-taga te sikandin se Egpelowà. Pengkey binasa dan se kagi insolat te menge telekeliwat te kagi te Timanem doton te simbahan dan te kelikit te simana, meneng wedà dan iyan kelebeti. Mig-okom dan kandin, aw yan netoman se inikagi te telekeliwat te kagi te Timanem.

²⁸Pengkey wedad palos salà din amon mepakay imetayan, meneng nemoyò dan ki Pilato amon imetayan sikandin.

²⁹Yan netoman se kedita te kagi te Timanem tapay insolat. Penga niyan, inabat dan se lawa din lekat te kros aw inlebeng dan iyan doton te ilib.

³⁰Meneng inantay sikandin te Timanem lekat te nematay.

³¹Nenamay sikandin migpekità diyà te menge otaw timaking kandin kedengan lekat te Galiliya pesalo doton te Jerusalem. Eg-indan den dan diyà kenitadon menge Judiyo te benal kinità dan.

³²Dimini kay den amon meg-indan kenyo te Mèpiya Indan tepad ki Cristo. Pengkey kemonaan tadon se pinekangan te Timanem,

³³meneng netoman den iyan dini kenitadon, so insogò din den si Jesus. Yan se kedegdagan te kagi te Timanem insolat diyà te Delangan Ikedowa, ‘Sikona se Batà ko, aw ipetaga-taga ko den te siaken se Amay nikaw.’

³⁴Si Jesus se inantay te Timanem lekat te nematay, aw eked sikandin todà kematay, so yan se kagi te Timanem, ‘Ibegay ko kamno se mèpiya impakang ko ki David, aw metoman den iyan.’

³⁵Doen heman kagi insolat diyà te doma delangan, ‘Eked kepakay diyà kamno aw meledak se lawa te pinemallì nikaw.’

³⁶Gebii, timolò si David te Timanem lamig te pegkematay din, aw penga niyan inlebeng sikandin sipat te kemonaan din aw neledak se lawa din.

³⁷Meneng si Jesus, wedà keledak se lawa din, so inantay sikandin te Timanem.

³⁸“Menge kedowa ko, ibeg ko ketegahan niyo den te pineokit te pegkematay i Jesu Cristo, in-indan kenyo se pegwedad te salà. Eked kaw pekelowà lekat te salà pineokit te pegtolò niyo te punù ingkeliwat i Moises, meneng pineokit ki Jesu Cristo mekelowà se kedita te otaw memenal kandin.