Men Rom 11:18-36

¹⁸Koe ap der juaiki on ra kan! A ma koe juaiki on irail, kaidin koe me kin wa kalaua, a kalaua kin wa uk.

¹⁹Koe ap pan indada: Ra kan tapenok wei jan, pwe i en id peuj on.

²⁰Me pun; jopojon, me re tapenok kilar, a pojon, me koe maur kila, koe der aklapalap a majak!

²¹Pwe ma Kot kotin muei jan udan ra kan, kalaka, pwe ele a pil pan muei jan uk!

²²Ari, kilan kalanan o onion en Kot; onion on irail, me jalonalar, a kalanan on uk, ma koe pan dadaurata a kalanan, a ma jo, koe pil pan tapenok jan.

²³A pil irail, ma irail jota pan mimieta ni arail jopojon, re ap pan peuj japal, pwe Kot kotin kak on kapure irail do.

²⁴Pwe ma koe lepuk jan ni tuka olip mal, ap peuj japal on tuka olip mau, a iaduen udan ra mau kan, re jota pan kak pur on udan ar tuka?

²⁵Ri ai kan, i men, komail en lelapok ki kaponepon wet, pwe komail de aklolekon, duen apali en Ijrael me kapitakailar, lao lel anjaun irail me pilipildar ren men liki kan pwarador.

²⁶Men Ijrael karoj ap pan maureda, duen a intinidier: Amen pan kotido jan Jion, me pan kawela karoj me doo jan Kot akan ren Iakop.

²⁷Pwe iet ai inau on irail, i lao lapwa jan irail dip arail akan.

²⁸Iran ronamau irail me imwintiti pweki komail, a iran lipilipil irail me kompokepa kan pweki jam akan.

²⁹Pwe Kot jota kin kalukila a pai en mak akan de me a kotin piladar.

³⁰O duen komail, me pil jota pojon Kot maj o, a met komail aleer mak, pweki arail jopojon.

³¹Iduen irail me jota pojon mak, me komail diaradar, iei me re pil jota diaradar mak en Kot.

³²Pwe Kot me kotin kapata pena irail karoj ni jopojon, pwen mak pena on karoj.

³³O meid laud erpit en Kot o a kotin mani meakaroj, jota me kak weweki a kadeik kan, de pameda al en a wiawia kan!

³⁴Pwe ij me ajaer kupur en Kaun o, de ij me padaki on i meakot?

³⁵De ij me ki on i meakot, pwen depuk on i?

³⁶Pwe meakaroj tapi jan re a, o mia pweki i, o wiai on i, linan en ko on i kokolata! Amen.