Roma 11:18-36

¹⁸Pengkey iling te panga tinepò se menge Judiyo wedà pemenal, meneng ikà niyo eg-aneng-aneng te labi kaw pa mèpiya diyà kandan. Eked kepakay aw megpelangkaw-langkaw kaw, so iling kaw olò te panga. Matay se panga aw wedad dalid te kayo, so lekat te dalid se keseg te panga.

¹⁹Doen besi otaw kenà Judiyo mikagi kanak iling kani, “Meneng labi kay mèpiya diyà te menge Judiyo, so iling dan te panga tinepò amon iselilin kay kandan.”

²⁰Benal se kagi din sìyan te sinelilinan se menge Judiyo, meneng tinepò dan te Timanem so wedà dan pemenal. Inselilin kaw din so nemenal kaw. Yan peg-ahà kaw. Ikà niyo egpelangkaw-langkaw.

²¹Wedà keidowi te Timanem se menge Judiyo wedà taking kandin, pengkey iling dan te ontò panga te kayo din, meneng tinepò din dan. Yan ikà niyo eg-aneng-aneng te pengkey lomengà kaw te pegtaking niyo kandin, gayed kaw din pa keidowan.

²²Pineokit kenyan, netegahan tadon den te doen otaw keidowan te Timanem, aw doen heman otaw ipelumun din. Ipelumun din se otaw nekesalà, meneng keidowan kaw din aw tomayod kaw tomaking kandin. Meneng aw lomengà kaw tomaking kandin, inangen kaw din heman iling te panga tinepò.

²³Meneng aw megselsel se menge Judiyo aw tomaking dan kandin, todà din dan sekopen iling te panga todà isogpat doton te kayo amon tomilles, so mebatog din iyan inangen.

²⁴Sikiyo menge otaw kenà Judiyo, iling kaw te panga tinepò lekat te kayo timobò doton te kebenesan, aw insogpat kaw diyà te kayo intanem, pengkey wedad otaw mig-aneng-aneng te mebatog iyan. Meneng se menge Judiyo iling te panga te kayo intanem. Labi pa mola aw todà dan isogpat diyà te kayo tinepoan kandan.

²⁵Menge kedowa ko kenà Judiyo, doen kebenalan wedà pa petega-tegahi lamig songkani, meneng ipetaga-taga ko den iyan diyà kenyo amon eked kaw peg-aneng-aneng te sikiyo olò se otaw netaga-taga te kebenalan. Metugul se keditaan te Judiyo songkani. Eked dan taking te Timanem singed aw onà megpesakop se kedita te otaw kenà Judiyo pinemallì te Timanem.

²⁶Penga niyan, ipelowà te Timanem se kedita te Judiyo, so doen kagi te Timanem insolat, “Domateng se Egpelowà lekat te ogpeanan te menge Judiyo iningedanan Sion. Ipelowà din se kedita te menge bowad-bowad i Jacob lekat te salà dan.”

²⁷“Yan tomanen ko se pakang ko kandan, so pegwedaden ko se salà ininang dan.”

²⁸Neinang poon te Timanem se keditaan te Judiyo, so wedà dan penenalan te Mèpiya Indan tepad ki Cristo, aw pineokit kenyan, nekelowà kaw den lekat te salà pengkey kenà kaw Judiyo. Meneng dakel pa se pedowan te Timanem kenami menge Judiyo, so pinemallì kay din aw tomanen din pa se pakang din diyà te menge kemonaan day gebii.

²⁹Eked ketodà se aneng-aneng te Timanem tepad te otaw pinemallì din aw binegayan din te kèpiyaan.

³⁰Sikiyo menge otaw kenà Judiyo, wedà kaw tolò te ibeg te Timanem kedengan, meneng so wedà tolò se menge Judiyo, neidowan kaw den te Timanem.

³¹Iling heman kenyan, pengkey kenà egtolò se keditaan te Judiyo songkani, meneng tandà te keido te Timanem kenyo, keidowan dan heman te Timanem te modi aldaw.

³²Impetaga-taga te Timanem te nekesalà se kedita te otaw, pengkey Judiyo aw otaw kenà Judiyo, amon ipetaga-taga din te doen keido din diyà te kedita te otaw.

³³Ontò mèpiya se Timanem. Wedad temanan te keido din, aw kebiyasa din, aw pegketaga-taga din. Eked kidon ontò ketaga-taga te aneng-aneng din aw tod din,

³⁴so doen kagi te Timanem insolat, “Wedad palos otaw netaga-taga aw eden se aneng-aneng te Pengolo tadon. Wedad heman palos otaw migtoladà kandin.

³⁵Wedad heman ibegay tadon kandin keilangan liwanan din.”

³⁶Sikandin se mig-inang te kedita, aw pineokit te tolos din, egbayà-bayà sikandin te kedita te ininang din. Iduyun heman sikandin pineokit te kedita niyan. Iduyun sikandin te wedad temanan. Metoman iyan.