Mbouŋ to Yes Israela 78:33-49

³³Tauto ye iŋgor sawa todi inim tuku. Nepooŋ todi isob rikia moghon, inimale yaghuraad to ivotvot ila avood. Mateeŋ ikarmotin di, le matughezaaŋ tiina igham di.

³⁴Onoon, sawa to Maaron irab tamtoghon todi pida, rikia moghon ve ival tiina tighilaal, ve titoor ŋgar todi imuul ila pani, ve tisuŋ pani ariaŋa tighaze lolo isamin di ve ireu sosor todi.

³⁵Ve matadi iŋgal muul tighaze: Maaron, ye iponpoon di inimale raŋ to izala kat. Maaron Tiina To Ilib Pa Ndimaronŋa Tisob, ye to Volaaŋa todi.

³⁶Eemoghon tipaiti pa avodi uli moghon. Saveeŋ to ivotvot ila avodi, tisavia toman lolodi maau. Tigham kaarom.

³⁷Lolodi ineep tuŋia ila to Maaron maau. Ve saveeŋ to yesŋa Maaron timbua, matadi kisini ve titaghoni maau.

³⁸Eemoghon Maaron lolo isasamin di, ve ireureu sosor todi. Tauto iwaghamun di kat maau. Onoon, sawa naol, ye ate yabyab padi kat. Eemoghon iyai tau, ve itatan mbalmbali toni.

³⁹Pasa, mata iŋgal ighaze: Yes to taan moghon. Tapiridi tintina maau. Tineep ris, ve tilaledi, tinimale yaghur to talooŋ avolutu inim, ve isob.

⁴⁰Sawa to tineep izi ndug balim, tizoor Maaron aliŋa pae katindi. Yes tilaghlaagh ila ndug to magargaar moghon, ve tighamgham Maaron lolo ipataŋan.

⁴¹Maaron Patabuaŋ to yes Israela, yes tinoknok tovaaŋi. Tauto tipas ate, le ate yabyab kat.

⁴²Yes lolodi imaghmaagh pa Maaron tapiri. Matadi iŋgal sawa to ye igham mulin di ila koiadi nimadi ne maau.

⁴³Muuŋ, ye igham mbeb gharatooŋadi katindi tivotvot izi Isip pa ipatooŋ tapiri padi. Ye igham uraat tintina izi taan raapa to Zoan. Uraat tonowen, tamtoghon tighita di le avodi ikaak.

⁴⁴Ye itoor ya tintina to yes Isipa tinim siŋ. Tovenen yes Isipa adi ya eta pa tighun maau.

⁴⁵Ve igham raaŋ tintina to tiŋutŋut tamtoghon tivot izi ndug todi, ve tiŋut di le tisami kat. Ve igham ŋgob katindi tivot le tiwaghamun di paam.

⁴⁶Ve igham isis tivot le titatab ndug todi, ve tighan aniiŋ todi. Uum to tighun wadedeŋadi pani, isis tighan mbeb to uum tonowen le tisob.

⁴⁷Ve ye igham ais patu patu titaptap tizi, le tiwaghamun ai vaen todi. Ve uman tiina toman ais izi le iwaghamun ai fik todi paam.

⁴⁸Ye igham ais patu patu titaptap tizi, ve tirabrab makau todi timatmaat. Ve igham lalaav iŋgalŋgal sipsip todi.

⁴⁹Maaron ate yabyab le yabyab kat. Toni imozi kat. Ate irau izi muul maau. Tauto ighurghur yes Isipa muul maau, ve mbalmbali toni iza todi kat. Ye imbaaŋ aŋela toni ival tila tiwaghamun di pa moroghooŋ samia.