Mboe 78:33-49

³³Tana ni iyembut swon ma imap karau men. Mbotŋana kizin kembei miiri ta ipet pa kwondo, mi imbiriizi ma imap. Paso, tipiyooto ŋonoono ambaiŋana sa som.

³⁴Ŋonoono, indeeŋe ta ni ikazas tomtom kizin pakan na, karau men mi zin pakan tikilaala, mi titooro lelen ma tiru zaala be tila kini mini. Tana tisuŋi be iuulu zin.

³⁵Mi matan iŋgal Anutu mini ta kembei: Ni ta tun ŋonoono. Pa ipombolmbol zin mi ipakalkaala zin pa koroŋ sananŋan kembei ta raŋ sumbuunu. Anutu kor kana kat, ta itatkewe zin pa pataŋana kizin.

³⁶Mi ina tikam pakaamŋana pini. Pa sua tiso. Mi ka mbulu na, tikam som.

³⁷Zin tiso tiur kat lelen ila ki Anutu. Mi sua ta ziŋan Anutu timbuk na, titoto som.

³⁸Tamen Anutu, ni imuŋaiŋai zin, mi irekreege sanaana kizin. Tana ipasaana kat zin som, mi iyaramraama kete malmalŋana kini. Leleene bayouŋana kini na, ni izzwe ma iwedet kat mat som.

³⁹Paso, ni mataana iŋgalŋgal ta kembei: Zin na, koroŋ ki toono men. Timbot rimen mi timap, kembei miiri ta itoogo ma imar, mi imbiriizi ma ila ne.

⁴⁰Indeeŋe ta timbotmbot lele bilimŋana na, tikam zooroŋana pa piizi sa? Gorgori ta tiwwa pa lele ta magargaara men na, tipasansaana Anutu leleene.

⁴¹Ni Anutu Potomŋana kizin Israel. Tamen zin tinoknok toomboŋana pini, mi tipazas keteene.

⁴²Zin matan iŋgalŋgal mburaana som. Mi mazwaana ta ni ikamke zin pa kan koi bizin naman na, tikam ŋgar pa som.

⁴³Pa muŋgu, ni itortooro mos mburanŋan isu Aikuptu. Ikamam uraata bibip isu lele keteeneŋana ki Zoan.

⁴⁴Ni itooro yok kizin Aikuptu ma tiwe siŋ lup. Tabe zin Aikuptu kan yok sa be tiwin som.

⁴⁵Mi iŋgo mberommberom ma tila tilol lele kizin, mi tikan zin ma tisaana. Mi iŋgo ŋgeu ma tila tipasaana zin.

⁴⁶Mi iŋgo siizi ma tila tikan kini kizin mi tipasaana mokleene kizin.

⁴⁷Mi ikam ma yaŋpat isu mi ipasaana ke baen kizin, mi yaŋ mosoolo ipasaana ke fik kizin.

⁴⁸Mi ikam ma yaŋpat isu mi ipun makau kizin. Mi ikam ma lolo iwenweene sipsip kizin.

⁴⁹Imbotmbot ma kaimer to irao iyaraama kete malmalŋana kini mini som. Leleene ibayou ma isaana kat. Tana ileele zin Aikuptu kan mini som, mi iliŋ kete malmalŋana kini ma isu ikam kat zin. Pa iŋgo zin aŋela ma tila, mi tipasaana zin pa mete sananŋana ma timetmeete lup.