Mbouŋ to Yes Israela 69:5-17

⁵Maaron, yom uwatag: You nagham ŋgar samsamia to borouŋa. Sosor tiou to naol ne, eta iyooŋ payom maau.

⁶Yoova, yom Maaron ariaŋam kat ve uŋgin mbeb tisob. Uul ghou lak! Pa vene, nagham mayaŋiiŋa pa yes to tinumeer ghom ve tighurghur matadi payom. Maaron to Israel, you nagham ŋgar tiina pa yes to tizuaria di tighaze le tiwatag katin ghom. Ighaze yom uul ghou pa pataŋani tiou tonene maau, nene pale mayadi.

⁷You nambesmbees payom, tauto tamtoghon tipiyaav saveeŋ velegiiŋ naol payou. Yes tigham ghou mayag, ve natudtud moghon.

⁸Taug siŋ tiou tighita ghou nanimale you ŋgeu sumbu. Ve toŋvetaz tiou kat to tinamai ee moghon, yes tipul muridi payou inimale you to ndug ite.

⁹Ŋgar tiou iyaryaaŋ naghaze le nagharaat rumai tiom. Eemoghon ŋgar tonene, to aazne inim pughu pa nambaad pataŋani tiina inimale yab ighan ghou. Yes to tiveleg ghom, tiveleg ghou paam.

¹⁰Sawa to natatan taug, ve naŋgun taug pa ghaniiŋ aniiŋ, tamtoghon matadi velegin ghou.

¹¹Ve sawa to lolog ipataŋan, ve nagharaat taug maau, ve nandud uli to moŋiiŋ, yes tiŋiŋ payou.

¹²Yes to tiluplup di izi maran ate, tininin avodi payou. Ve yes ghunuuŋa timboumbou ghou inimale ŋalalaŋ.

¹³Eemoghon suŋuuŋ tiou iŋaŋarua ghom moghon. Yoova, poia tiom, nene tiina kat. Lolom isamin ghou, ve uul ghou lak! Lolom ineep tuŋia ila to tamtoghon tiom ve uluul di. Tovenen sawa sine to ughita poia, ulooŋ suŋuuŋ tiou tonene, ve uul ghou.

¹⁴Upas ghou navot pa pataŋani tiina tonene. Pa vene, agheg putukia ila tiiŋ le malmalig nazila. Ugham mulin ghou ila koiagŋa nimadi. Undae ghou naza pa mazovan lolo.

¹⁵Uul ghou. Pa vene, yawaaŋa izugua ghou, ve iweu ghou nalaleg. Ughita. Paam nandal nazila mazovan lolo. Aazne, you naneep izila saambu to yes mateeŋa, ve avo ighaze iŋgup tonene. Upas ghou navot.

¹⁶Yoova, yom poiam. Lolom ineep tuŋia ila to tamtoghon tiom ve uluul di irau sawa isob. Tovenen ulooŋ suŋuuŋ tiou tonene, ve uul ghou. Yom lolom isamin ghei kat. Tovenen matam imuul inim payou.

¹⁷You mbesooŋa tiom. Uŋgooz matam payou malep. Pasa, aazne naneep ila pataŋani tiina lolo. Tovenen ulooŋ suŋuuŋ tiou, ve uul ghou rikia.