Mbouŋ to Yes Israela 68:2-7

²Ye pale ipasob di le tisob kat, tinimale yab mbuasa to iza, ve yaghur iviviira ilale. Ighaze ndiran samsamia tineep ila Maaron nagho, ye pale iwaghamun di ve tilaledi tinimale bagil to ineep igharau yab dige, ve yab ilavaara, ve ireer ila, le isob.

³Eemoghon ndiran deŋiadi, yes pale lolodi poia kat. Pale tineep ila Maaron nagho, ve tinidi iza ve tilool.

⁴Ambou pa Maaron. Ambou ve apait iza, ve agharaat ataam pani. Ye Ŋgeu to ineep ila yaghur tae pogho, ve indaloova. Ye iza Yoova. Alup gham ila nagho, ve tinimim iza pani.

⁵Maaron ineep ila ina patabuaŋ, ve iŋgin yes parooŋa inimale tamandi. Ye ivolvool to yes ndinaara, ve iyondyood padi.

⁶Yes to eŋgendi tineep, Maaron pale igham tamtoghon pida tinim nditadi, leso yesŋa tilup di ve tineep. Ve yes to koiadi tighur di sorok tilooŋ tila ruum to yabyabuuŋ, ye ipaspas di tivot, ve imuuŋ padi, ve igheghereb di tila, leso tigham nepooŋ poia. Tovenen tinidi iza ve timbou, ve titaghoni gha tila. Eemoghon tamtoghon to tighamgham didiaaŋ, yes pale tineep sami ila taan to le ya maau ve imamaas kat.

⁷Maaron, sawa to yom umuuŋ pa tamtoghon tiom Israela, ve yamŋa alaagh izi ndug balim, yoŋgyoog itok taan, ve uman tiina itap tata ve izi. Maaron to Israel, ndug tiom to ghamuuŋ pooz, nene lolooz Sinai. Yom upatooŋ taum uvot ughazooŋ tonowe.