3Ve ipamundigin ghou ve nambou mbouŋ paghu. Nene mbouŋ to tapait Maaron toit iza. Ŋgar to Yoova igham payou, pale igham ival tiina tighilaal. Tovenen yes pale timatughez, ve tighur ila toni.
4Tamtoghon to ighaze inumeer Yoova, nene pale tini iza, ve poia to Yoova iza toni. Tamtoghon tovene, ye ilup toman yes to tipait taudi izadi ne maau. Ve yes to tipul ataam to Maaron, ve timbesmbees pa maaron kaaromŋa, ye ineep saguan padi.
5Yoova, yom Maaron tiou. Eta irau ghom maau. Pasa, yom ughamgham uraat gharatooŋadi naol pa uul ghei. Uraat tonanan, ite kat. Ve lolom ighur pa ŋgar popoia naol to ughaze ugham payei. Ighaze natoova pa nanin di tisob ve nasavia di, nene pale naraua maau.
6Ŋgar to rabuuŋ mbeb inim watooŋrau payom, toman ŋgar to nigham aniiŋ payom pa nipait ghom, nene yom lolom pani maau. Ve ŋgar to ghuruuŋ mbeb izala artaal leso yab ighan suvuni, toman ŋgar to rabuuŋ mbeb pa rewaaŋ sosor to tamtoghon, nene paam, yom ughur matam pani maau. Yom ukaak taliŋag, leso nataghon aliŋam.
7Tauto nasaav payom naghaze: “Maaron, taug nene. Nataghon saveeŋ to timbooda iŋarua ghou ila rau tiom, tauto nanim.”
8Maaron tiou, ighaze nataghon katin lolom, nene igham lolog poia kat. Pasa, tutuuŋ to yom ugham payei, nene ineep ariaŋa ila lolog.
9Yoova, yom uwatag: Ulaaŋ to ugham payei, you neneeŋag pani maau. Sawa to ival tiina tilup di pa suŋuuŋ, you nasasavia varum padi.
10Onoon kat, ulaaŋ ve ŋgar deŋia to upatooŋa payou, you naŋgooza ineep to taug moghon maau. Ve gabuam to lolom ineep tuŋia ila to tamtoghon tiom ve uluul di, nene paam, naŋgooza pa tamtoghon tiom maau. Sawa to tilup di pa suŋuuŋ, you nasasavia gabuam tonenen padi. Ŋgar tiom to uluul tamtoghon itaghon saveeŋ mbuaaŋ tiom, nene navovotia padi.
Mbouŋ to Yes Israela 40
Mbouŋ to Yes Israela 40:3-10