Mbouŋ to Yes Israela 26:5-12

⁵You naghur koi pa yes to tighamgham ŋgar samsamia, ve naneep saguan padi. Ighaze ndiran samsamia tilup di, irau naneep toman di maau.

⁶O Yoova, you nataghon ŋgar deŋia moghon. Tauto namen nimag inim ghilalooŋ payou ighaze leg sosor eta maau. Ve nalaagh luvutin artaal to tighamgham watooŋrau payom izala, ve nasuŋ payom.

⁷You pale nambou mbouŋ toman lolog poia ve napait ghom, ve navotia uraat tiom gharatooŋadi to ite kat.

⁸Yoova, you lolog pa rumai tiom kat. Pasa, nene inam to nepooŋ. Yom upatooŋ tapirim ve ŋgurubam toman poia tiom ivotvot tonowe.

⁹Yes to tiyel pa ataam tiom, upasob ghou toman di malep. Ve yes to tirabrab tamtoghon le naghodi siŋ, urab ghou namaat toman di malep.

¹⁰Ndiran tovene, nimadi igharghaar pa ghamuuŋ ŋgar samsamia naol. Ve ighaze tighol di pa tigham ŋgar samia eta, nene tiyok moghon ve tighami.

¹¹Eemoghon laghooŋ tiou, you nataghon ŋgar deŋia moghon. O Yoova, you mbesooŋa tiom. Lolom isamin ghou ve ugham mulin ghou.

¹²You nayoon tuŋia ila taan raapa. Irau natap maau. Tovenen sawa to tamtoghon tiom tilup di pa suŋuuŋ, you pale nala toman di, ve napait ghom pa poia tiom.