Mbouŋ to Yes Israela 139:1-16

¹Yoova, yom uŋgabiiz poian lolog, ve uwatag katin ghou.

²Ighaze mboleg izi ve ateg izi, ma namundig nala pa uraat, yom uwatag ghou wa. Ighaze you naneep mala payom, yom uwatag ŋgar tiou isob. Pasa, yom matam mala.

³Sawa to nalaagh nala pa ndug eta, ma naghaze nazi nagheen, yom ughita ghou, ve uŋgagabiiz ghou. Tovenen ŋgar naol to naghamgham di, yom uwatag di tisob.

⁴Yoova, saveeŋ to inepneep ila lolog ve nasavia ivot sone, nene paam, yom uwatagi wa.

⁵Yom umuŋmuuŋ payou, ve ulaghlaagh muri payou. Ve nimam ikiskis ghou, ve ipapalot ghou.

⁶You nagham ŋgar pa ŋgar tiom tonanan, le naraua maau. Pasa, ŋgar tiom, nene ite kat. Ilib payou kat.

⁷Ighaze you naghau payom, pale nala sine? Irau nayooŋ pa matam maau.

⁸Ighaze nazala pa sambam, yom unepneep tonowe. Ve ighaze nagheen ila mateeŋa inadi, yom unepneep tonowe paam.

⁹Ighaze naroov nala pa ndug to ndag iza pani, ma naghur inag to nepooŋ ila te dige ite to ndag izila pani,

¹⁰nene paam, yom unepneep toman ghou. Ve nimam waan pale ikis ghou, ve ipasaluŋgan ghou pa laghooŋ.

¹¹Ve ighaze naghason ndoroom pa inim ikau ghou, ma nasaav pa ghazooŋa to isul luvutin ghou pa inim ndoroom, nene paam irau iŋgooz ghou pa matam maau.

¹²Pasa, ndoroom irau ipoon mbeb eta pa matam maau. Mboŋ, yom ughita mbeb tisob tineep ghazooŋa raraate inimale ughita di pa ndag. Tovenen ndoroom ve ghazooŋa, nene raratedi moghon ila matam.

¹³Yom to ughur babaŋag tisob, ve ulup di tinim ee moghon ilooŋ ila tinaŋ apo lolo.

¹⁴You nawatag kat: Uraat tiom to naol ne, popoiadi ve ite kat. Tauto namatughez payom, ve napait ghom.

¹⁵Sawa to nayooŋ ila tinaŋ apo lolo, yom ughita tuag titub ve tiwaseŋgan di. Mbeb to tivot payou pa sawa tonenen, eta iyooŋ pa matam maau.

¹⁶Tovenen sawa to tinaŋ inaama payou, yom ughita ghou wa. Ve sawa to nepooŋag izi taan, toman sa mbeb to pale ivot payou, nene matam ighur pani, ve timbooda ila rau tiom pataghaaŋ, ghoro tinaŋ ipoop ghou.