Mboe 90:8-14

⁸Pa mbulu tiam ta ampaŋobŋoobo pa zaala ku na, nu wwo se ndomom. Mi sanaana tiam turkeŋan na, nu reke ma imap. Sa ike pu som. Pa mat ku izzwe koroŋ ta boozomen.

⁹Tana aigule boozomen ta ambotmbot su toono na, nu ketem malmal piam. Tanata ametmeete ma amla leyam karau men. Swoyam na, katŋana men. Niam kembei tomtom ta iyak pa tamen mi ipas.

¹⁰Koyam ndaama irao tomto tel laamuru men, mi ametmeete. Mi sombe mburoyam biibi, inako amsala tomto paŋ ma iŋgi. Mi ndaama ta boozomen tana na, amkamam uraata biibi mi ambadbaada pataŋana. Ta kembei kembei men ma irao swoyam imap.

¹¹Asiŋ ikilaala kat ketem malmalŋana ku mburaana? Mi asiŋ ikam kat ŋgar pa lelem bayouŋana, tana imototo u mi ileŋleŋ la kalŋom? Som.

¹²Tana paute yam be amkilaala kat ta kembei: Mboti tiam isu toono ti na, molo som. Naso amkam ŋgar ku ma imbol la leleyam.

¹³O Yooba, ŋiizi na tooro ŋgar ku mi motom miili piam? Pa niam mbesooŋo ku tau. Tana lelem isaana piam.

¹⁴Zoŋ isombe ise na, zeebe yam pa kampeŋana ku. Naso leleyam ndabok. Swe mbulu ku ta toto sua ku mbukŋana mi urur lelem pa wal ku. Naso ambombo mboe raama menmeen yam ikot aigule ta boozomen.