Mboe 69:32-36

³²Zin wal ta pataŋana ikam zin na, sombe tire Anutu iuulu yo, inako menmeen zin. Mi zin wal tau tikamam kinkiini be tiute kat Anutu mi timbot kolouŋana pini, nako tikam pombolŋana.

³³Pa zin wal ta timbot ŋoobo mi tiru zalan na, Yooba ileŋleŋ suŋŋana kizin. Zin wal kini ta timbotmbot la pataŋana leleene na, ni irao ipizil ndemeene pizin na som.

³⁴Saamba ma toono mi tai, ramaki koroŋ boozomen ta tiwwa pa na, niom kamap ma kapakur Anutu zaana.

³⁵Pa ni ko ikamke kar Sion ma imbot ambai mini, mi ipamender zin kar ta timbot lele pakaana ki Yudea na. Tonabe zin mbesooŋo kini tikam lele tana ma iwe len, mi timbot pa mini.

³⁶Mi kaimer, toono tana ko iwe popoŋana kizin len, be zin tomini timbot pa. Tana zin wal ta so tiur kat lelen pini, nako timbotmbot ta tana.