Mboe 5:1-7

¹Mboe ki Dabit O Yooba, ŋgun talŋom pa sua tio. Leŋ tiŋiizi tio ti.

²Nu ta king tio mi Anutu tio. Tana suŋŋana tio imama ku men. Leŋ bobi tio, mi uulu yo.

³Yooba, aigule ta boozomen, zoŋ isombe ise na, suŋŋana tio imama ku. Nio aŋurpewe ŋgar tio, mi aŋzuŋzuŋ, mi aŋzza pa pekelŋana ku.

⁴Pa Anutu, nu lelem pa mbulu sananŋana risa som kat. Tana zin wal sananŋan tirao be timbotmbot raamu na som.

⁵Mi zin wal ta tipakurkur zitun na, irao timbot su kerem uunu na som. Pa nu urur koi pa wal sananŋan ta boozomen.

⁶Yooba, nu pasansaana wal pakamkaamŋan ma tila len. Mi wal ta titekteege siŋ pizin tomtom, mi zin ta timburmbuuru pizin tomtom na, nu lelem pizin risa som.

⁷Mi nio na, nu urur lelem pio, mi muŋaiŋai yo, mi kampewe yo biibi kat. Tana aŋrao be aŋlema urum ku. Nio ko aŋmoto u, mi aŋlek kumbuŋ pu lela urum ku potomŋana mi aŋsuŋu.