Kap 5:1-7

¹Dewit dakon kap kɨnda. Kap on amɨn da kasɨsɨŋ pɨsoŋakwa yogogɨ. Yawe bɨsit aŋek iyoŋ iyoŋ yaŋapbo geno do mɨrak yopbi.

²Kɨla Amɨn Madepno ae Piŋkopno, aŋpulugoki do bɨsit asat, do yaŋ ɨlɨtno nandaŋ nabi.

³Yawe, wɨsa dagokdo morap gak do bɨsit asat. Wɨsa dagokdo gak do bɨsit tebaisi asat. Bɨsitno dakon kobogɨ nabi do jomjom asat.

⁴Piŋkop, gak aŋpak yokwi do kɨsɨk kɨsɨk dɨma asal. Yokwi aŋ amɨn gak da kapmatjok tagɨ dɨma egɨpmɨ.

⁵Iyɨ do nandaba wɨkwaŋ amɨn gak da dabɨlon tagɨ dɨma atni. Aŋpak yokwi aŋ amɨn morap dɨmasi galak taŋ yomɨsal.

⁶Yawe, gak da top gen yogok amɨn morap paŋupbal asal. Amɨn dapba kɨmokgoŋ amɨn gat, ae amɨn paŋkewalgaŋ amɨn gat dɨmasi galak taŋ yomɨsal.

⁷Mani gak da nak but dasi galak taŋ namɨsal, do gak da yutnon tagɨ wɨgɨkeŋ. Telagɨ yutgokon uŋudon ŋwakbeŋ aŋek gawak gabeŋ.