Mboe 48:8-14

⁸Uraata bibip ki Anutu, muŋgu amleŋ urun men. Mi koozi na, amre kat uraata biibi ta Anutu tiam ikam pa kar kini na. Yooba, ni mbura keskeezeŋana. Tana kar kini ko imbotmbot ambai ma alok. Pa ni itunu ta ipamender kar tana mi mataana pa.

⁹Anutu, iŋgi ambotmbot lela urum ku leleene, mi amkamam ŋgar pa mbulu ku. Nu toto sua ku mbukŋana mi urur lelem pa wal ku.

¹⁰Anutu, urum irak ma irao toono. Tana zin karkari ta boozomen tipakurkuru. Pa nu kampewe zin tomtom mi kamam mbulu ndeeŋeŋana men pizin.

¹¹Tana wal ta boozomen ki kar Sion lelen ambai kat. Pa nu tirtiiri zin tomtom pa mbulu kizin mi urur kadoono ndeeŋeŋana men pizin. Tana kar ta boozomen ki Yudea menmeen zin.

¹²O niom, kamaŋga mi kapapiliu kar biibi Sion. Kapa mi kere siiri mbolŋana ki kar tana.

¹³Kinin zin ruumu ta uten isala kor kat, mi kitiiri kat ruumu mbolŋan ta tipo be tomtom timbot lela mi tikam malmal. Naso karao be kipit kan mbol pa popoŋana tiom tabe tipet pa kaimer i.

¹⁴Ko koso pizin ta kembei: “Anutu kiti, ni mbolŋana kembei ta abal Sion. Ko imbotmbot ma alok. Mi ni ko imuŋmuuŋgu piti mi izzo iti pa zaala kini, mi iseeŋge iseeŋge ma ila.”