1Jisasame dee mende lao pituu, “Gotenya isingi mate doko dapale: Gii mendepa akali mendeme, baanya enda watapae pyala ipatoo lateamopa, enda mapukae 10-pela dutupame, nyakamanya lama kaiyoo minao, kandanyemana latala malisoo peteami.
2Enda dutupanya 5-pela masepae nasingi. Yangi 5-pela dutupa masepae singi.
3Enda masepae nasingi dutupame, nyakamanya lama dupanya katasini tumbasetala minao peaminoaka doko, wakao kamuo namandeami.
4Enda masepae singi dutupame, nyakamanya lama dutupanya katasini tumbasetala, wakao kamuo minaowaka peami.
5Pupala akali enda watapae pyapenge doko, yapa naepeamosa, enda dutupa lemonguti leami.
6Lemonguti latala paleaminopa, kuka andatombe dokonya, wii mende epeamo dokome, 'Akali enda watapae pyapenge doko, ae epelyamona, nyakama kandanyalapale ipupa' lea.
7Dopa leamopa, enda mapukae dutupa pitaka sakatatala, nyakamanya lama dupa depa leami.
8Dokopa enda masepae nasingi dutupame, enda masepae singi dutupa lamaiyoo, 'Naimanya lama datupa konjalanya pilyamona, nyakamanya katasini dupanya mendatupa dyepa' leami.
9Dopa leaminopa, enda masepae singi dutupame pii yanu pyakamaiyoo, 'Katasini datupame naimapi, nyakamapi, pitaka kapa napapome-lamona, stoa andaka pupala, nyakama waka sambala pupa' leami.
10Dokopa enda dutupa stoa andaka pateaminopa, enda watapae piamo akali doko epea. Epeamopa, enda depa latae peteamino dutupa, baa-pipa enda watapae dokonya, nee nalanya andaka kolandeami. Kolandateaminopa, kaitini doko paii lanyiami.
11Maitakao enda mapukae masepae nasingi dutupame ipupala, 'Akali andake! Akali andake! Naimanya kaitini lumbakapoko' leami.
12Dokopa baame dokaita lamaiyoo, 'Nyakama kiningi etete langilyo: Nyakama nambame nakandengena' lea.
13Dopana, Akalinya Ikiningi doko andukupa ipatape lao, nyakamame masala naelyaminona, kandao isoo kalyepape,” Jisasame lea.
14Jisasame dee mende lao pituu, “Gotenya isingi mate doko, akali mende baa yuu londati mendakaita patoo latala, baanya kalai akali dupa wii lanyetala, oapi dupa pitaka kandao isoo katekena leamo dopale.
15Akali dokome baanya kalai akali dupame, mana kandengemali pyoo, kalai pyaamino lao masetala, muni mokosoo maiya. Mende 5 tausene kina maiya. Mende 2 tausene kina maiya. Mende 1 tausene kina maiya. Dopa petala baa paanya piamo dokonya pea.
16Pateamopa, akali 5 tausene kina nyiamo dokome, ongopaka pao, muni dutupame minao kalai petala, dee 5 tausene kina konda pyoo nyia.
17Dopaka pyoo, akali 2 tausene kina nyiamo dokome, minao kalai petala, 2 tausene kina konda pyoo nyia.
18Akali 1 tausene kina nyiamo dokome, pupala baanya akali andake dokonya muni dutupa yuli pia.
19Yuu gii longo pateamopa, akali andake doko dee pilyetala, muni maiyamo dutupanya baanya kalai akali dupa-pipa, pii lao wasalanya epea.
20Ipateamopa, akali 5 tausene kina nyiamo dokome, 5 tausene kina dee konda pyoo minao ipupala, 'Akali Andake, embame namba 5 tausene kina diino dokonya, nambame 5 tausene kina konda pyoo nyekeona kanda' lea.
21Dopa leamopa, baanya akali andake dokome baa lamaiyoo, 'Embame yaka pyekee-lamo! Emba akali epe dokomena, nambame leoli pyoo pii-lamo! Embame kalai kuki dutupa, nambame leoli pyoo auu pyoo, isii-lamo dokonya, nambame emba longo dupa isoo kata latoo. Embapa nambapa, mona setao katambana ipu' lea.
22Dokopa akali 2 tausene kina nyiamo doko, apata ipupala, 'Akali Andake, embame namba 2 tausene kina diino dokonya, nambame 2 tausene kina konda pyoo nyekeona kanda' lea.
23Dopa leamopa, baanya akali andake dokome baa lamaiyoo, 'Embame yaka pyekee-lamo! Emba akali epe dokomena, nambame leoli pyoo pii-lamo! Embame kalai kuki dutupa, nambame leoli pyoo auu pyoo isii-lamo dokonya, nambame emba longo dupa isoo kata latoo. Embapa nambapa mona setao katambana ipu' lea.
24Dokopa akali 1 tausene kina nyiamo doko, apata ipupala, 'Akali Andake, emba akali tomba nenge, nambame kandenge. Embame wakamanya ee waingi pokatae, dupanya nee yukuo mandenge. Dee wakamanya ee waingi lyandatae, dupanya dii lyao mandengeaka.
25Dopa pingi dokonya, nambame paka kaeyapala, embanya muni dutupa pao yuli piona, embame muni namba diino, dutupa datupakana kanda' lea.
26Dopa leamopa, akali andake dokome baa lamaiyoo, 'Emba kalai akali koo, maka-maka kaeyapae-lamona, nambame wakamanya ee waingi pokatae, dupanya nee yukuo mandyuu, wakamanya ee waingi lyandatae dupanya, dii lyao mandengeaka-lumu doko,
27nambanya muni dutupame, propeta mendatupa mandekena, beŋenya setakateno! Embame dopa pyekeeli kandao doko, nambanya muni dutupanya, wakao mendatupa apata nyipulina” lea.
28Dopa latala, baanya kalai akali yangi dokaita lamaiyoo, “1 tausene kina doko nyepala, akali 10 tausene kina singi doko maiyepa.
29Endakali mende-kisa longo setamo kandao doko, baa longoaka konda pyoo maita. Maitamopa, baa-kisa longoaka seta. Endakali nasingi mende-kisa, kuki setamo dutupa, baa-kisa nasina lao tange nyokonyeta.
30Dopana, nyakamame kalai akali koo dake, kamalya iminjetae endakali ee lao yamataka lao, nenge gilyoo katenge dokonya, soo pyale lapa' leana” lao, Jisasame lea.
31Jisasame dee mende lao pituu, “Tanga Akalinya Ikiningi doko, baanya tii pipae-pipa, enjele dupa pitaka-pipa, apata ipao, baanya kiŋi petenge toko dokonya pitita.
32Dokopa endakali paliu pelyamo dupa pitaka, baanya enombanya nyoo kambu pyatami. Dopa pitaminopa, sipisipi setao katenge mendeme, sipisipi memepi yapao wakale pyoloo pingili pyoo, endakali dupa yapao mokoseta.
33Mokosoo pituu, baame sipisipi dupa baanya kingi tolae-kaita katena lata. Meme dupa baanya kingi koeya-kaita katena lata.
34Dokopa kiŋi dokome kingi tolae-kaita katatamino dokaita lamaiyoo, 'Nyakama nambanya Takangeme auu pisetae. Yuu kaitipi tee piamo dokopa, baanya moeya doko nyakama nyetamina latala, baanya isingi mate dokonya, depa lanya setekeamo doko nyala ipupa.
35Wamba namba lopo kaeyopa, nyakamame namba nee diami. Endaki nanu kaeyopa, namba endaki kamuo diami. Opone joo epeopa, namba nyoo setao paleami.
36Yonge pee napyoo kateopa, namba yonge pee diami. Yaina siopa, namba kandao nisiami. Anjetae paleopa, namba kanja epeamina' lata.
37Dopa latamopa, endakali tolatae dupame yanu pyao, 'Akali Andake, naimame andukupa lopo kaeyenopa, emba nee diamape? Andukupa endaki nanu kaeyenopa, emba endaki kamuo diamape?
38Andukupa opone joo epenopa, emba nyoo setao paleamape? Andukupa yonge pee napyoo katenopa, emba yonge pee diamape?
39Andukupa yaina siinopa, emba kandao nisiamape? Andukupa anjetae palenopa, emba kanja epeamape?' latami.
40Dopa lataminopa, kiŋi dokome dokaita lamaiyoo, 'Nambame nyakama kiningi langilyo: Nambanya kaiminingi datupanya, koo kenge nasingi mende nisiamino dokome, namba nisiamiakana' lata.
41“Dopa latala, baame kingi koeya-kaita katatamino dokaita lamaiyoo, 'Nyakama watao pyatae dupa namba yakinatala, Satanepi, Satanenya enjele koopi, dupanya itate konjala naenge, setakamaiyamo dokonya pupa.
42Wamba lopo kaeyopa, nyakamame namba nee nandiami. Endaki nanu kaeyopa, nyakamame namba endaki kamuo nandiami.
43Opone joo epeopa, nyakamame namba nyoo setao napaleami. Yonge pee napyoo kateopa, nyakamame namba yonge pee nandiami. Yaina siopa, nyakamame namba kandao nisala naeyami. Anjetae paleopa, nyakamame namba kanja naepeamina' lata.
44Dopa latamopa, dokaitame yanu pyao, 'Akali Andake, andukupa emba lopo kaeyenopapi, endaki nanu kaeyenopapi, opone joo epenopapi, yonge pee napyoo katenopapi, yaina siinopapi, anjetae palenopapi, naimame kandatala, nisala naeyamape?' latami.
45Dopa lataminopa, kiŋi dokome dokaita lamaiyoo, 'Nambame nyakama kiningi langilyo: Nyakamame endakali datupanya, koo kenge nasingi mende, nisala naeyamino dokome, namba nisala naeyamiakana' latana,” Jisasame lea.
46Dopa latala, Jisasame endakali pii soo kateamino dupa lamaiyoo, “Endakali kingi koeya-kaita katatamino, dokaita tanda nao, leke-leke tao, etete katatami. Dopaka doko, endakali tolatae dupa, lete etete katenge doko nyetamina,” Jisasame lea.
