Matiu 6:14-31

¹⁴“Nen le kumata be di tooltool tiyei dada dook tiap ke noonoo pang nga, ngan kagiri noonoo kidi tina yo tiyei nga. Ngan la be Tamamim yo iyepe ye malala ki ete ni, in ole igiri noonoo kiang lapau nga.

¹⁵Bong kumata le be kagiri noonoo kidi tooltool tiap nga, ngan Tamamim o ke be igiri noonoo kiang tiap lapau.

¹⁶“Kene yo be kasapa ye kaningi so a be kasung pang Maro ye in nga, ngan kin kayei ang le matamim mallai ben di tooltool ke kaplungunu tiyei, ngan be. Yesoo, di ngan tiyei di tapdi le matadi mallai a be tipatnai di pang di tooltool a tikamata di ngan tiyei ne, ‘Tool ni ngo ya taunu isapariuu ye kaningi so a be isung pang Maro.’ Bong awete pang moolmool nen, di tooltool yo tiyei dada nen nga, ngan tikap balingi ye urata kootoonoo kidi oo.

¹⁷Bong be kusapa ye kaningi so nga, ngan kupusu matam ye ran, inbe kusalini kutom ye so ke saliningi.

¹⁸Ngan kayei nen a be nen ngan di tooltool lodi galanga yang ye yo kasapa ye kaningi so, ngan be. Bong Tamamim yo ke be takamata tiap i, in ya taleu la be lon galanga yang i. Tamamim tani yo lon galanga ye so yo iken sollono i, in ole ikap balingi pang ye urata kootoonoo kiang.

¹⁹“Kin burum le balingi ke tana pono nga ikap matamim a kawinoko be. Yesoo, balingi yo ke tana pono nga, ngan rapa le piroro tigarung, inbe di tooltool ke pinnau ole tisaua koongoo le siri a lo tipinoo lapau.

²⁰Bong dook mata ngan nen, be ang tapmim kawinoko burum le balingi yo Maro be ikap pang ye urata kootoonoo kiang nga. Yesoo, malala ke Maro yo iken ete ni, in rapa le piroro sa be tigarung so ki tiap, inbe di tooltool ke pinnau sa ke be tisaua koongoo le siri ki a lo tipinoo so ki, ngan tiap lapau.

²¹Ngan la malala tani yo so dook mata kiang iken ye i, in ole kagaua lomim le imot pang ye lapau.

²²“Ngan matamim ngan dawa ben sul. Le kumata be matamim igalanga dook mata nga, ngan ole sul nunngana ilangaraia tinimim mai i le imot inbe kakamata ni.

²³Bong kumata be matamim igalanga tiap nga, ngan ole todo iduku tinimim mai i le imot inbe kakamata ni tiap. Ngan nanga, kumata le sul nunngana yo be iken lomim in todo iduku nga, ngan ole todo tani yo iken lomim i, in todo maiyoko.

²⁴“Tool sa ke be iyei urata pang di tooltool kuto maimai ru tiap. Kumata be iyei nen nga, ngan ole lono dook mata pang atu le ilongo betanga ki a itoo, inbe lono dook tiap pang san a iwala murini panga. Le ang nga ke be kayei urata pang Maro, inbe kayei urata ke kaungu pat lapau tiap.

²⁵“Le nga be awete pang nen, kin lomim modoko ye yepongo kiang ke tana i, ye so yo be kakap a kakan le kayin, nga be. Inbe kin lomim modoko ye tinimim ye so yo be kapital a itarkoo tinimim, nga be. Ngan ye Maro matana nga, ngan yepongo kiang, in so maiyoko, bong so yo be kakap a kakan, in so mai tiap. Inbe tinimim nga lapau, ngan illoso so yo be kapital a katarkoo ye nga.

²⁶Oo, kakamata di man. Di ngan tikapki so kumu le itar kanono, lo ngan tigogo kanono, ngan tiap. Inbe di ngan ke be tire para yo be titar kaningi kidi ye nga, ngan tiap lapau, bong Tamamim yo iyepe ye malala ki ete ni, in ya la ipakan di i. Le awete pang nen, ang tooltool nga, Maro ikamatang ben ang nga kallos di man ye matana.

²⁷Ngan nanga, be ang tina ngan atu lon modoko ye so yo be iloni ye yepongo ki ke tana i nga, ngan ole yelei, urata tani yo iyeii nen i, in ole iloni ye yepongo ki a iseke kasin pang dama a ila, too? O tiap!

²⁸“E nga yelei a lomim modoko mai mata ye so ke lonloningi nga? Oo, kakamata di ool ke karam lono yo tisup nga. Di tapdi ngan tiyei touo urata sa be tikarata moro pang di ye, ngan tiap.

²⁹Bong nga be awete pang ye tool kuto mai yo Solomon i. Ya in tool ballingana, le moro ki yo itar lo tinini nga, ngan dook mata san. Bong di ool tina nga, ngan moro kidi ngan dook mata le dook mata ki taunu le illos moro yo ke Solomon nga.

³⁰Atoo, ang nga katara lomim medana pang Maro mai mata tiap. Kakamata, dingding sokorai yo ke be tikodo katai nga leu, e bongbong ngan tisaput a tikatte lo ei ikan di nga, ngan Maro ikap moro dook mata pang di. Le yelei, ang nga o ke be ikap moro dook mata pang tiap, too? O tiap! Dada dook mata yo be iyei pang ngan ole illos dada dook mata yo iyei pang di ool le dingding nga.

³¹Le kin lomim modoko a kayei ne, ‘Nga ole takana soo so?’ too ‘Nga ole tayini soo so?’ too ‘Nga ole talonlon ye soo so?’ ngan be.