1Yesu iye di galiunu tipa a tilo potai pang malala mai Yerusalem, ngan le tilo pombe ye malala san yo ene Betpage i. Ngan Betpage tani in iken ye kawal Olip in madini. Tilo pombe, motong la Yesu iwanga di galiunu ru, inbe iwete pang di nen,
2“Nga ole angru kamuku a kalo pang ye malala yo iken pang dama ni. E kalo nga, ngan ole pattu leu be kakamata asara pakara atu yo ene donki i, in tiwatu iye natunu a tikododo. Le be kakamata di nga, ngan karu ooroo ye di a kadede di yaru a kasi pang yau.
3E kumata be tool sa itorang ye di nga, ngan kawete panga nen. Kayei ne, ‘Tool Mai lono be iyei urata ki ye di ngan, lo ngan be ole palbe leu be ipamulu di pang yong a tise.’”
4Iyei nen le ole iyeie betanga ke Maro koonoo yo iwodo nga le kanono pombe moolmool.
5Ngan betanga tina yo Maro koonoo iwodo ngan nen, “Kawete pang di tooltool ke Saion nen, ‘Kakamata, tool kuto mai kiang yo be matan kala tana mai kiang le imot i, in ya la be ise pang yang i. Ya in tool ke lo silene pang di tooltool nga le imot, inbe iwur donki pono. Ya la iwur donki kase paunu pono a ise pang yang i.’ ”
6Motong la di galiunu ru tina tilo, ngan le lo tiyei ben tina yo Yesu iwete pang di nga.
7Tilo tikaua donki tani le ipa ye natunu a tisi pang ye Yesu. Motong la yaru tidur sousoungu matolene kidi a tiyoo lo donki tina ngan podi, inbe Yesu irookoo lo iwur ye sousoungu tina ngan pono.
8Motong la di tooltool tina budanga mai ngan kapala tidur sousoungu matolene kidi ngan lapau, a tiyoo du dada katene, inbe di kapala ngan tisaput kai baene baene a tiyoo du dada katene lapau.
9Inbe di tooltool tina ngan kapala yo timuku be Yesu itoo di, inbe di kapala yo tikimur nga, ngan di le imot koodi le mai. Tiyei ne, “Tayitmaka Dawiti natunu in ene! Maro ole iyei urata dook mata pang ye tool yo isi ye Tool Mai ene i! Tayitmaka Maro ene le ilo ete!”
10Ngan tiyei nen le lo Yesu pombe Yerusalem, ngan le di tooltool budanga mai yo tiyepe ye malala mai tani nga, ngan di le imot titakrai ye, le nga di tapdi tipartortor nen, “Ai, i sei tool pombe i?”
11Motong la di tooltool tina yo tiye Yesu tipa nga, ngan tiyei ne, “I Yesu! I Maro koonoo yo ipa ke malala Nasaret ke tana mai Galili i, in naii.”
12Motong la Yesu ilo pang koongoo lono ke bareme mai ke sungunu, a lo inganga di tooltool yo tiyawar so le tiyimimi so koongoo lono ke rumu tani in nga. Inbe ipaturtur kookoowoo ke palokanga so kidi tooltool yo tiraukol pat nga, inbe kookoowoo ke burungu kidi tooltool yo tiyawar bal utu pang paroranga, ngan lapau.
13Motong la iwete pang di nen, “Betanga ke Maro yo tiwode lo ye rau ki in iwete nen. ‘Rumu kiau i, ole tiweta ye rumu ke pataraungu.’ Bong ang nga kayeii le iyei ben ‘ni kidi tooltool ke pinnau be tiko ye.’ ”
14Ye kene tani in iyepe bareme mai ke sungunu lono, inbe di tooltool yo matadi kisis le di tooltool yo kedi dook tiap nga, ngan tilo pang ye, a lo ikarata di le tinidi dook mata mulu.
15Bong di tooltool maimai ke paroranga so pang Maro, inbe di pannoongoo ke ger ke Maro, ngan tikamata mos dook mata tina yo iyei nga, inbe tilongo di kakase yo kookoodi bareme mai ke sungunu lono nen, “Tayitmaka Dawiti natunu, in ene!” Ngan nen le di tooltool kuto maimai tina lodi dook tiap san.
16Le nga titoro Yesu nen, “Ai, ong i kulongo betanga yo di kakase maimai tiap ngo koodi ye ngan lapau? “Ngan iraua betanga kidi nen, “E, alongo lapau. Bong nga yelei, ang nga o kakinkata betanga yo iken ye Rau ke Maro, in tiap, too? Betanga tani in iwete nen, ‘Maro ong taum la kupamadit di kakase paunu inbe di kakase yo maimai tiap ngan lodi i, ngan la le di nga tiyitmaka em ye koodi nga.’ ”
17Yesu iwete pang di nen a imot, motong la iyege di sila tiyepe ye malala mai tani in, inbe imadit a idu pang malala san yo ene Betani i, le du bong a iken nango.
18Tiken le muntu yege, inbe Yesu iye di galiunu timadit a tiyege malala tani, inbe timulu pang Yerusalem. Tipa dada a tilo ngan Yesu pitola.
19Le nga be matana pang nen, ngan ikamata kai pik atu ikodo ke dada koonoo. Motong la ipa a ila potai ye a be ikamata, ngan kanono siap, bong raunu leu. Motong la ipasak pang kai pik tani nen, “Ong i o ke be kupu mulu pitiap yege.” Ngan le pattu leu, inbe kai pik tani in iwor.
20Ngan di galiunu tikamata kai pik tani yo pattu leu be iwor nga, le titakrai, inbe tiyei ne, “Ona, kai pik ni nga belei a le pattu leu be iwor nga?”
21Motong la Yesu iraua betanga kidi nen, “Awete pang moolmool nen. Kumata be katara lomim medana pang Maro le lomim rru tiap nga, ngan o ke be kayei so dawa ben yo ayeii ye kai pik ni, in leu tiap. Bong ang nga ke be kawete pang kawal ni ne, ‘Kumadit a ong taum kupas le kudu tiek lono ni,’ ngan ole so pombe ben tina yo kawete nga.
22Le kumata be katara lomim medana moolmool pang Maro, inbe kapatarau a katoru ye soo so be ikap pang nga, ngan ole ikap pang le imot.”
23Yesu ipa le ilo koongoo lono ke bareme mai ke sungunu, motong la nga ipatomonai di tooltool. Ngan di tooltool maimai ke paroranga so pang Maro, inbe di tooltool maimai kidi Yuda timan pang ye man titoru. Tiyei ne, “Ai, sei itarong a le kuyei urata nen i? Inbe sei ikaua gurana pong be kuyei urata nen ye i?”
24Motong la Yesu iwete pang di nen, “Dook mata, bong nga be atorang ye torungu kiau atu ngan. Kumata be karauu nga, ngan la be awete pang ye sei tool yo ikaua gurana pau a le ayei urata i nga.
25Oo, kawete! Yowan yo irriu di tooltool i, in ikaua gurana ngai a le iyei urata ki ye nga? Gurana tani in ipa ye Maro yo iyepe ye malala ki ete ni, too ipa ye di tooltool ke tana leu?” Motong la di tooltool tina ngan sila di tapdi tiwetewete nen, “Ona! Kumata le tawete be Maro yo iyepe ye malala ki ete ni, in la ikaua gurana pang Yowan in nga, ngan ole itoridi nen. Iyei ne, ‘Ngan nga yelei a le katara lomim medana ye betanga ki tiap nga?’
26Bong kumata le tawete be di tooltool ke tana i leu la tikaua gurana pang Yowan nga, ngan o dook mata tiap lapau. Idi nga tatattadai be di tooltool tigarungidi nga, yesoo di le imot nga tiwete be Yowan in Maro koonoo atu moolmool.”
27Ngan nen le tiraua betanga ke Yesu nen, “Am nga lomam galanga tiap sa.” Motong la Yesu iyei ne, “Nen ngan au lapau, o ke be awete pang ye sei tool yo ikaua gurana pau a le ayei urata nen ye i, in tiap.” Yesu Ikatte Betanga Ye Tool Atu Di Natunu Tamoto Ru
28Motong la Yesu iwete le ikatte betanga atu pang di tooltool tina nen, “Ang lomim belei ye betanga kiau yo awete nga? Oo kakamata, tool atu in natunu tamoto ru. Ngan ila ye yo mai i a la iwete panga nen. Iyei ne, ‘Natuk, katai nga lok be kudi kouo urata ye kumu kiidi ke ooroo wain ni.’
29“Ngan natunu tani iraua betanga ki nen, ‘Na, au i tinik booroomoo, le o adi akaua urata tiap.’ Bong iyepe kasin, motong la lon portak mulu a idi iyei urata nga.
30“Motong la tool tani, in ila pang ye natunu kase a la iwete panga ben tina iwete pang yo mai in nga. Ngan le natunu tani in iyei ne, ‘Tamak, ngan dook mata. Au i lok ponana be ayei urata pong.’ Bong iyepe, ngan tinin booroomoo le ke be idi iyei urata tiap.”
31Motong la Yesu itor di tooltool maimai tina nen, “Oo, ngan di kakase ru tina nga, ngan sei kase itoo tamana koonoo a idi iyei urata i?” Ngan tiyei ne, “Natunu la mai i.” Motong la Yesu iwete pang di nen, “Awete pang moolmool nen, di tooltool ke sodaningi pat, inbe di garup ke dada, ole timuku pang a tilo tigaua ye di tooltool yo Maro be matan kala di nga.
32Awete pang nen nga, yesoo Yowan in iman be man ipatnai dada dook mata noonoonoo ke Maro yo be kayei nga, bong ang nga katara lomim medana ye betanga ki tiap. Ang nga kayei nen, bong di tooltool ke sodaningi pat, inbe di garup ke dada la tilongo betanga ki le titara lodi medana ye nga. Ang nga kakamata so yo nen ngan oo, bong o ke be kaportak lomim a katara lomim medana panga, ngan tiap.”
33Motong la Yesu ikatte betanga san mulu pang di tooltool maimai tina nen, “Katar talngamim dook, a nen ngan kalongo kattenge betanga san i. Tool tana taunu atu in ikapki kumu atu ke ooroo wain, motong la ikap koongoo ye. Inbe ikele tana atu kumu lono a ikarata be tipisi wain puana tina ngan surunu idu ye. Inbe ire rumu atu le ilo ete pang di tooltool yo be lo tiyepe ye a matadi kala kumu tani nga. Motong la itara kumu tani in lo di tooltool ke kapkingi pattu baedi, a be matadi kala, inbe tiyei urata ye. Inbe ya taunu in ipa a ila pang ye malala san yo iken ni mooloo i.
34Ngan tiyepe le lal ke be tigogo wain puana ye in potai, motong la iwanga di kapraingi ki be tila la tikap kan wain tina ngan puana sa.
35“Bong tila, ngan di tooltool tina yo tikaua urata ye kumu tani nga, ngan tiparama di kapraingi tina a tiraua atu, inbe san in tiraumate le imata, inbe san in tikattu ye pat.
36Motong la kumu taunu tani in iwanga di kapraingi ki kapala mulu, ngan alunu le tillos di yo tila muku nga. Ngan di tooltool tina yo tikaua urata ye kumu nga, ngan tiyei dada gaongo leu pang di nen lapau.
37Motong la kumu taunu tani, in lon wete nen, ‘Nookoot nga ole awanga natuk tamoto i a ila, ngan la be ole tiraua panga nga.’
38“Bong ye kene yo di tooltool ke kapkingi tina ngan tikamata natunu tani ye in nga, ngan di tapdi tiwetewete nen, ‘Kakamata, kumu taunu tani in natunu la iman i. Kumata le be pang dama ni nga, ngan ole ikolo tamana ye kumu i a iyei kumu taunu. Le kaman a taraumate le imata, a be nen ngan so yo tamana be ikap panga nga, ngan takap le imot paidi.’
39Nen le tikauu a tiyolle a tikatte du ke diki, inbe tiraumate le imata.”
40Motong la Yesu itor di nen, “Ye kene yo kumu taunu tani be ipa mur a ila nga, ngan lomim tar be ole iyeie soo dada pang di tooltool yo itar di be tikaua urata ye kumu ki nga?”
41Ngan di tooltool maimai tina tiyei ne, “Ole inganga di tooltool dook tiap tina a igarung di le dook pitiap yege. Lo ngan be ikaua kumu ki in pang di tooltool kapala a tikaua urata ye, a be nen ngan tiyepe le lo lal ke goganga ooroo wain puana nga, ngan tigogo a tikap kan sa.”
42Motong la Yesu iwete pang di mulu nen, “Ang nga o kakinkata betanga ke Maro yo iken ye rau ki, in tiap, too? Ngan betanga tani in nen, ‘Pat yo di tooltool ke renge rumu lodi panga tiap a tisukraii i, in la iyei pat dook mata yo ipamede rumu le imede i. Tool Mai iyeie so nen, le amkamata ye matamam, ngan dook mata san.’ ”
43Motong la Yesu iyei ne, “Dada yo be kalo kagaua ye di tooltool yo Maro be matan kala di i, in ole igutaki yang, inbe ikauu pang di tooltool kapala yo tilongo betanga ki ngan titoo dook mata nga.
44Le kumata sei tool be imol le du irauu pang ye pat i nga, ngan ole turana bokobokobe le moromorana. E kumata be pat tani in imol le du ikata tool sa nga, ngan ole igarungu tool tani le dook tiap yege.”
45Di tooltool maimai ke paroranga so pang Maro, inbe di Paresi tilongo kattenge betanga ke Yesu yo iweta pang di i, le lodi galanga be nga iwetewete ye di.
46Ngan nen le nga tisere dada yo be tiparama ye i, bong ngan titattadai di tooltool malala mai yo tiyepe nga, yesoo di le imot ngan tiwete be Yesu in Maro koonoo atu.
