1Yesu iyege bareme mai ke sungunu tani, inbe ipa a be ila. Motong la di galiunu timan pang ye be man tiwete panga, inbe tipatnai rumu maimai yo ke bareme ke sungunu, ngan panga.
2Motong la iwete pang di nen, “Ang nga kakamata so tina nga le imot ngan dook mata, too? Bong awete pang moolmool nen, pang dama ni ngan ole pat ke rumu tina nga, ngan atu sa yo be iken a iloko lo ene pono dawa ben nookoot nga, ngan tiap. Bong ole tiraukedekede di le imot a timol du tana le tiken kidi kidi.”
3Ngan Yesu ipa le ilo ye kawal Olip a lo ya taleu iwur, motong la di galiunu tilo pang ye a iye di leu tiyepe, inbe titoru. Tiyei ne, “Oo, kuwete pam ngan, ole soo lal be so tani in pombe ye i? Inbe soo tarkilanga be amkamata muku, ngan ole lomam galanga ben lal kiong yo be kumulu ye i, inbe lal yo tana i be imot ye i, in iman potai koot i?”
4Titoru nen, motong la iwete pang di nen, “Kin kakamatang dook leu ye di tooltool yo be tillungang nga.
5Yesoo, di tooltool alunu ole timan pang yang man tipootoo ek, inbe tiyei ne, ‘Au Kirisi tani naii!’ Ngan ole tikap lungunu ye di tooltool alunu le titara lodi medana ye betanga kidi.
6Ole kalongo bingi ke patokongo yo pombe ye malala kapala nga, inbe talngamim rau be patokongo mai sa ole pombe ye tana maimai kapala lapau, bong kin katattadai a lomim gurrungu be. So yo nen nga ole pombe moolmool, bong so yo awete pang ye nga, ngan lal ki o pombe tiao.
7Ngan di tooltool ke tana mai atu ole timadit a tiye di tooltool ke tana mai san tipatoko. Inbe di tooltool ke tool kuto mai atu ole timadit a tiye di tooltool ke tool kuto mai san tipatoko. Inbe ole pitolo maimai pompombe ye tana kapala, inbe nauningi mai itak ye tana kapala a tana itangarur.
8Ngan urata moonoo yo nen ngan ole pompombe muku, dawa ben garup kapon massingi ye natunu a be ipasuiu nga.
9“Ye kene tani in, ole di tooltool tikau ang a titarang kalo ye ni ke karatanga betanga, a be nen ngan tikap urata moonoo ke masngana pang, a tirau ang le kammata. Inbe di tooltool ke tana maimai nga le imot ole tikadonang, yesoo ang nga katara lomim medana pau.
10Inbe ye kene tani in, di tooltool alunu yo titara lodi medana pau nga, ngan ole tiwala muridi pau, inbe di tapdi tiparkadon a titar di diedi la di koi kidi baedi.
11Inbe di tooltool ke kaplungunu yo tiwete di ye Maro koonoo nga, ngan ole alunu la be pompombe a tipa be tillungu di tooltool alunu nga.
12Inbe di tooltool o ke be lodi pang di diedi mai san mulu tiap, yesoo dada dook tiap alunu ole pombe ye tana i le mai san.
13Bong di sema tooltool yo tikodo le timede ye lo medana kidi a tikodo nen le lo timmata nga, ngan Maro ole ikap di a ipamulu di ye so dook tiap yo be igarung di i.
14Inbe bingi dook mata ke dada yo Maro be matan kala di tooltool ki ye i, in ole tiweteweta pang di tooltool ke tana mai i le imot a tilonga, ngan la be lal tani yo be tana i imot ye i, in pombe nga.
15“Pang dama ni ngan ole kakamata so dook tiap ki taunu in ikodo ye ni mison ke Maro be igarungu, dawa ben muku ngan Maro koonoo yo Tanel i, in iwetewete ye nga. Le ong sei tooltool be kukinkata betanga tani nga, ngan lom kaua urata ye dook, a nen ngan lom galanga ye.
16Ngan nanga, le be kakamata so nen nga, ngan ang di tooltool yo kayepe ye tana mai Yudia nga, ngan kakoo tarai a kalo pang kawal.
17Inbe kumata be tool sa iyepe rumu pono ki nga, ngan kin idu tana a lo ikap so ki yo iken rumu lono ngan atu sa, ngan be, bong ipas le iyege sila ikino leu.
18Inbe kumata be tool sa iyepe kumu lono ki nga, ngan kin imulu pang rumu ki du ikaua sousoungu matolene ki, ngan be, bong ipas le iyege sila ikino leu.
19Ye kene tani in di garup yo kapodi nga, inbe di garup yo tiyei borrenge ye di natudi a tipayinin di nga, ngan barau, ole imoo pang di yo be tikoo nga.
20Le be nen ngan kapatarau pang Maro nen, kin so tani in pombe ye lal ke mou, too ye lal yo kidi Yuda ke sungunu i, in be.
21Yesoo, urata moonoo dook tiap yo be pompombe a igarung di tooltool nga, ngan urata moonoo dook tiap ki taunu. Le kulkulunu yege ye kene yo Maro itar lang le tana ye i, le se nookoot nga, ngan urata moonoo dook tiap yo pompombe ngan sa yo be gaongo ye, ngan tiap. Inbe pang dama ni nga, ngan ole urata moonoo dook tiap gaongo nen sa yo be pompombe mulu, ngan tiap lapau.
22Nga yo be Maro lono be ipamodo lal ke urata moonoo dook tiap tani in tiap nga, ngan matin nga le tool sa yo be iyepe dook mata, ngan tiap. Bong lono ye di tooltool yo ipootoo di panga nga, ngan la le be ipamodo lal ke urata moonoo tani in nga.
23“Nen le ye kene tani in, kumata be tool sa man iwete pang nen, ‘Kakamata, Kirisi bi e i!’ too, be iyei ne, ‘Ya meneng e ni!’ ngan kin katara lomim medana ye betanga ki be.
24Awete pang nen, yesoo ole di tooltool ke kaplungunu yo tiwete be di nga Kirisi, inbe di tooltool ke kaplungunu kapala yo tiwete be di ngan Maro koonoo nga, ngan ole alunu la be timan pang yang nga. Di ngan ole tiyei gogo mos le urata maimai a iyei ben tarkilanga pang di, a be tikaua lungunu ye di tooltool. Inbe ole tikapye be tikaua lungunu ye di tooltool yo Maro ipootoo di panga nga, a be nen ngan la titoo di lapau.
25Oi, kakamata koot? So tina yo be pombe nga, ngan awete pang ye oo.
26“Nen le kumata be tool sa iwete pang nen, ‘Kakamata, Kirisi meneng, iyepe ni sorrakene ni,’ ngan kin kalongo ki a kala be. Too, be iyei ne, ‘Kirisi naii, lo iyepe rumu lono i,’ ngan kin katara lomim medana ye betanga ki be.
27Yesoo, ye lal tani, in ole dawa ben kili yo itai a nunngana imadit ye ni yo ke ise ye i, a ipa so le idu ye ni yo ke iyara ye i a di tooltool le imot tikamata nga. Le gaongo leu ye lal yo Tool Moolmool ke Maro be isi ye in nga, ngan ole di tooltool le imot tikamata nen lapau.
28Ye ni nangai be so matene ngan bobono iken ye i, in ni tani yo be di kamoko timan man tigaua ye i.”
29Motong la Yesu iwete pang di galiunu mulu nen, “Ye kene yo be urata moonoo dook tiap tina pombe pang ye di tooltool nga, ngan ole pattu leu inbe ‘ke ole matan gumugumu, inbe taudu ole isini mulu tiap. Inbe di kanpitiki ole timakedekede ke lang katene a timol a tisi, inbe so ke lang katene yo gurana kidi maimai mata nga, ngan ole titangarur.’
30“Ye kene tani in, tarkilanga ke Tool Moolmool ke Maro, ole pombe lang katene a di tooltool tikamata. Ngan la be di tooltool ke ni mai i le imot ke tana i ole titang, yesoo ole tikamata Tool Moolmool ke Maro iyepe eng tene pono ke lang katene, a ipa ye gurana ke Maro inbe ye nunngana mai a isi pang tana.
31Inbe ole iwanga di bangabangana ki a timai so dawa ben tauru a itang le mai, inbe tisi be si tigaua di tooltool yo ipootoo di panga a tiyepe ye tana gigini tina nga. Ngan di bangabangana ki ole tipa ye ni mai i le imot ke tana i le tipa so le la titaua ni yo lang imot ye i, a be tikap di tooltool ke Maro a man iye di tigaua.
32“Nookoot nga lok be ole kakap lo galanga ye kai pik in raunu. Ye kene yo be suddana pombe ye baene a be itar raunu paunu nga, ngan ole lomim galanga nen, rai mai o potai oo.
33Ngan gaongo leu, ye kene yo be kakamata so le imot yo awetewete nga be pompombe nga, ngan lomim galanga nen, lal ke so tina yo awetewete ye in o iman potai ye dada oo.
34Awete pang moolmool nen, di tooltool yo nookoot tiyepe matadi rerene go nga, ngan ole timmata tiao, inbe so tina le imot yo awete pang ye nga, ngan ole pombe.
35Lang le tana nga ole tilledi, bong betanga kiau nga o ke be kasin pa ilene, ngan tiap.”
36Motong la Yesu iwete mulu nen, “Tool sa yo be lon galanga ye ke, too soo ke matana yo be so tina ngan pompombe ye i, in tiap. Inbe di bangabangana ke Maro yo tiyepe ye malala ki nga, ngan lodi galanga ye tiap, inbe Maro Natunu in lon galanga ye tiap lapau, bong Tamana ya taleu in la lon galanga ye i.
37Inbe ye lal yo Tool Moolmool ke Maro be imulu a isi ye i, in ole di tooltool tiyei dada gaongo leu dawa ben yo muku ngan pombe ye lal ke Noa nga.
38Ye kene tani in di tooltool tikan be tiyin, inbe tamoto le garup tikerere, inbe tikap di natudi garup a la tipakere di pang di tamoto kapala, le le ilo ye lal ke Noa yo be iyiri a ilo ookoo lono ye i. Motong la oongoo mai pombe a igarung di le imot nga.
39Di ngan mala be le lodi galanga kasin pa ye soo so yo be pombe pang ye di, in pitiap yege. Bong tiyepe nen le lo oongoo mai tani in pombe a iraumatamata di tooltool tina budanga mai ngan le imot. Le in dada gaongo leu tina yo be pombe lapau ye lal yo Tool Moolmool ke Maro be imulu a isi ye i.
40Ye kene tani, ngan kumata be di tamoto ru tiyepe kumu lono nga, ngan atu ole Maro ikauu, inbe san in iyege sila ikino.
41Inbe gaongo leu, kumata be di garup ru titutngan dingding patunu pang sopalanga porong nga, ngan atu ole Maro ikauu, inbe san in iyege sila ikino.
42“Ngan nen le kin kakawai yang dook leu, yesoo ang nga lomim galanga ye lal yo be Tool Mai kiang isi ye i, in tiap.
43Bong ole lomim galanga nen. Kumata be rumu taunu in lon galanga ye soo lal yo be bong ngan tool ke pinnau be man isaua rumu ki ye in nga, ngan tool tani ole matan rere nen a ikodokala rumu ki, a be nen ngan tool ke pinnau o ke be isaua rumu ki a ilo lono tiap.
44Ngan nanga, ang nga lapau kakaratang dook, lo ngan be kayepe, yesoo Tool Moolmool ke Maro ole isi ipatakrai ang ye lal atu yo ang nga lomim tar be o isi ye tiap i.”
45Motong la Yesu ikatte betanga san mulu pang di nen, “Tool mai yo be ipa ye panga mooloo, in ole itara tool belei be matan kala so ki, inbe ikap kaningi pang di kapraingi ki kapala ye lal tani yo itaru panga i? Ya in ole ikamata di kapraingi ki tina ngan atu yo lon galanga ye urata inbe itoo betanga ki dook mata i, in la be itaru i.
46Le kumata be kapraingi tani in iyei urata dook mata nen leu, le be tool mai ki imulu a iman pombe le ikamata urata tina yo iyei nga, ngan kapraingi tani in ke be lon ponana.
47Awete pang moolmool nen, tool mai ki ole itaru le iyei kuto mai a be matan kala so ki nga le imot.
48Bong kumata be kapraingi tani in tool dook tiap nga, ngan ole lon kaua urata nen, ‘Tool mai kiau ni ila manga mooloo mukot san le ke be imulu tarai tiap.’
49Le taun imadit tina ngan le irau sokorai di kapraingi kapala, inbe ila ye di tooltool ke yinungu ran medana, a iye di tikan be tiyin.
50Bong ole tool mai ki imulu a iman ipatakraii ye ke atu yo kapraingi ki tani in lon tar be o iman ye tiap i, inbe ye ke matana yo lon galanga ye tiap i.
51Le kumata be tool mai ki tani in iman ikamata yo iyei nen nga, ngan ole isaputputu le moromorana, lo ngan be itaru lo ye di tooltool ke kaplungunu yo tiyepe ye malala dook tiap nga, a lo iye di timassingi a titangtang, inbe tikanen dongadi a iparrasa.”
