Mateo 7:15-23

¹⁵»Lik chichajij iwibꞌ chikiwach ri kakibꞌiꞌij e qꞌalajisanelabꞌ re ri Dios yey xa e sokosoꞌnel. Ma waꞌ kekꞌun iwukꞌ riꞌix lik chakojoꞌ utz kikꞌuꞌx, noꞌj chupa ri kanimaꞌ xa pachaꞌ e utiw lik e bꞌiqꞌonel.

¹⁶Ekꞌu riꞌix kiwetaꞌmaj saꞌ ri kꞌo pa kanimaꞌ ri tikawex ruma ri kakiꞌano, we utz o na utz taj. »E pachaꞌ taq ri cheꞌ: ri kꞌiix, na uva ta rujiqꞌobꞌalil kuyaꞌo; yey ri xulukej, na higos ta rujiqꞌobꞌalil kuyaꞌo.

¹⁷Jekꞌulaꞌ juna chomilaj cheꞌ, lik chom rujiqꞌobꞌalil kuyaꞌo; noꞌj ri cheꞌ na chom taj, na jinta uchak rujiqꞌobꞌalil kuyaꞌo.

¹⁸Ri chomilaj cheꞌ na ubꞌe taj we na chom ta rujiqꞌobꞌalil kuyaꞌo; jekꞌulaꞌ ri cheꞌ na chom taj na kuya ta ujiqꞌobꞌalil chom.

¹⁹Yey ronoje cheꞌ we na chom ta rujiqꞌobꞌalil kuyaꞌo, kachet bꞌi y kaporox pa aqꞌ.

²⁰Riꞌix kiwetaꞌmaj kꞌu uwach juna cheꞌ ruma rujiqꞌobꞌalil kuyaꞌo; jekꞌulaꞌ kaqꞌalajinik saꞌ taq ri kꞌo pa kanimaꞌ ri tikawex ruma ri kibꞌinik kisilabꞌik.

²¹»Na konoje ta ri kakibꞌiꞌij chwe “Qajawal, Qajawal” kebꞌok chilaꞌ chikaj pa rutaqanik ri Dios, ma xew kebꞌok ri kakiꞌan ri rajawal ukꞌuꞌx ri Nuqaw kꞌo chilaꞌ chikaj.

²²Kopon kꞌu ruqꞌijol echiriꞌ ri Dios kuqꞌat tzij pakiwi ri tikawex, yey chupa laꞌ la qꞌij lik e kꞌi ri kakibꞌiꞌij chwe: “Wajawal, Wajawal, riꞌoj xqaꞌan qꞌalajisanik chupa ri bꞌiꞌ la chike ri tikawex. Yey chupa ri bꞌiꞌ la xeqesaj bꞌi ri itzel uxlabꞌixel y pa ri bꞌiꞌ la xqaꞌan ukꞌiyal milagros” kechaꞌ.

²³Ekꞌuchiriꞌ, riꞌin jewaꞌ kambꞌiꞌij chike: “Na xinwetaꞌmaj ta kꞌana iwach, chixela wukꞌ; ma riꞌix xew ix ꞌanal re ri lik itzel uwach.”