Mareekoo 9:37-45

³⁷Faiqí ánaasee moó fannoo maaqíra káqikaa faiqi qiní ufara irisée óonu asasamásee áqoondikinafa sía írirainni qiní Yísusa faqa qíqoondikidanoo. Yáfee moó fannoo qiní óonu qífiqainafa sía qiní kai qífiqaannoo qiní diqiqoona faqa óonu áfiqaidanoo.

³⁸Yoohaneefa Yísuna qímaminoo qinau, Óo ufasáa rakísirafa faiqí moó fannoo moosáa mandá fáafasaaqa naundurái máriasa aní áuqusaa qímasee niqiqéemaru qáfaqiafana, mifá sía maasáki nímarufa márunara qáoo qiqíafana.

³⁹Yísufa miná iriséenoo maaqí qinau sía minára qáoo qía. Mifá qiní dúqusaa moo fíraa ainaina áuqamáseenoo sía amana quándaki qiní díqiannoo.

⁴⁰Maasá aaná ititée maríasa maasá namuqáa máridaqa. Sía maasá aaná ititée maríasa sía namuqáa máridaqa maasá qifeeqáree maríasa máridaqa minára sía mi-fasiqánara qáoo qía.

⁴¹Ínnee maa-ufána íriaqa Ínnee nammáriara nídinaqa innaaru qífanoo faiqí moó fannoo ínniara ásauku mundírana faiqi námu máriafanoo fee qímaseenoo nammári ínni níminanoo Ánutufa miná akiaqara mi-fasiqána innaarúnai qúqamaqáannoo.

⁴²Miqí qímaseenoo Yísufa mi-kaqikaa faiqína fáasai misá noórinni kikíqunara kafáa qímanniminoo qinau, maaqíra káqikaa faiqi írirana qinísaa rusímarinafa moó fannoo miná mandóosana uqafíqainafa mi-fasiqáfa Ánutuna firaa aqurararana ámeemaanai maríannoo. Misá miqínna fasiqana qumáree firaa oonitia anukakí quqásee rumbásee afeeqá ámifanoo ooruku námmariki áqufinoo kúqinoo óonu dúpira árirafa máriannoo. Káqikaa faiqi qinísaaqaraa írirana moosáa ubeekée marínafa firaa arirafa máriannoo.

⁴³Anínna ásauku fannoo anirarisámeeqeenoo mandóosanaki ubeekée marína miná ateeká áqua. Moodáa ásauku faqaafa náaru asumu máriranaki fírafa amaná máridanoo. Aiqáma ásaukuqara faqaafa náaru náaru sía qimbéemari idánaki fírafa mandáikirafa máridanoo.

⁴⁴Miqóo náaru náaru kadiaru sía kúqidanoo káqi máridanoo idá faqa sía dimbée marífa káqi qáida máriannoo.

⁴⁵Aninná áiku fannoo aní rarisámeeqeenoo mandóosanaki ubeekáinnana mi-aikúna ateeká áqua. Anée moodáa áiku faqaafa náaru asumu máriranaki fírafa amaná mária. Aiqáma áikuqara faqaafa idáki áqufirafa sía andeeqánoo máriani.