Maleko 9:20-41

²⁰Na kabo wawaya wa se woyalae Yesu unai. Huyana yaluwa yababana Yesu ye kita ede wawaya wa ye gulidobi bwatano unai. Ye tapitapipili yo ye gwasagwasapulo.

²¹Yesu gama wa tamana ye henamaiyei ye wane, “Kauyana teina kasiyebwa ta ye tubu iya unai?” Tamana wa ye wane, “Ma gagilina unai.

²²Huya badobado iya ye gabadobiyei kaiwa kalakalasina yo waila unai bena kabo ye unuhemwaloi. Na ena kowa gonowam, kabo ku katekamkamnaegai yo ku saguigai.”

²³Yesu ye wane, “Ye saha to ku wane, ‘ena kowa gonowam’? Ginauli maudoidi kabo se masalaha taukawamamohoiyeigau unai.”

²⁴Na gama wa tamana ye yogalau ye wane, “Ya kawamamohoiyego! Na yogu sunuma gagilina ta unai ku hebayaogau.”

²⁵Na Yesu boda wa ye kitadi se heloi se laoma iya unai, na kabo ye hededelau yaluwa yababana wa unai ye wane, “Yaluwa beyakolakolana yo unaꞌunana, wawaya me ku pesagabae na tabu ku luwuꞌuyo iya unai.”

²⁶Na yaluwa yababana wa ye yogahi ede wawaya wa ye nukui na ye laugabaei. Na gama wa kana kao doha tamowai boiboitana, unai boda wa yodi nuwatu bena ye boitako.

²⁷Na Yesu ye kabilau wawaya wa nimana unai ye kabihetolo, ede ye tolo.

²⁸Na kabo Yesu maiyana hekahekatao se mwalaesae numa kalona unai. Metai siya se bom na se henamaiyei se wane, “Ye saha to nige gonowamai wawaya ne unai yaluwa yababana ne ka hededehepesa?”

²⁹Yesu ye hededelau udiyedi ye wane, “Yaluwa kana kao doha teina ta, meta tapwalolo mo unai kabo kwa hededehepesa.”

³⁰Kabo Yesu maiyana hekahekatao magai wa se laugabae na Galili unai se laulau. Yesu nige ye henuwa bena tamowai kabina se kata meta siya ede haedi,

³¹matawuwuna yona hekahekatao wa ye hekatadi. Ye hededelau udiyedi ye wane, “Tamowai hesau kabo Tau Natuna kana ye walohai na ye moselaei tamowai hekadi nimadiwai. Na kabo se unuhemwaloi, na mayadai haiyona mulidiwai kabo ye toloꞌuyo.”

³²Na Yesu saha ye hedehededeidi ta, yona hekahekatao wa nige se nuwatulobai. Iyamo nige se henamaiyei, matawuwuna ede se matausi.

³³Na kabo se lage Kapelenauma unai. Siya numa hesau kalona unai, na Yesu ye henamaiyedi ye wane, “Komiu saha kwa hetahetala keda ne unai?”

³⁴Siya nige kalinadi, matawuwuna keda wa unai se bom se henahenamaiꞌuyoidi luwadi ne unai kaiteya kabo yodi bada.

³⁵Yesu ye tulidobi na Saudoudoi-labui wa ye yoganedi na ye wane, “Yaubada matanaena kaiteya tamowai ye henuwa bena ye baguna, taba ye lau ye mulitamolosi, yo ye hemala heyayai tauhaina mamohoi.”

³⁶Na kabo Yesu ye kabilau wawaya gagilina hesau nimana unai. Ye kabihetolo matadiyena na ye labasiyama na ye wane,

³⁷“Taba kaiteya wawaya gagilina hesau doha teina ye yogaisini yau hesaguwai, meta hinage yau ye yogaisinigau. Yo kaiteya ye yogaisinigau meta hinage tauhetamaligau ye yogaisini.”

³⁸Na Yowane ye hededelau Yesu unai ye wane, “Tanuwaga, tamowai hesau ka kita yaluwa yababadi tamowai udiyedi ye hededehepesadi kowa hesamwai. Na ka hededelau unai taba ye kaiyawasi, matawuwuna iya nige kada kaha hesau.”

³⁹Yesu ye wane, “Tabu kwa hekahekaiyawasi, matawuwuna kaiteya laulaugigibwali ye ginauli yau hesaguwai, iya taba nige gonowana ye hededeheyababagau tenem huyana ne unai.

⁴⁰Kaiteya nige ye guduguduida, iya meta kada kaha hesau.

⁴¹Ya hededemamohoi: Kaiteya waila kaputina ye leyawa yau hesaguwai matawuwuna kowa Keliso yona, unai kainauya kabo ye hai.”