Maki 5

1

2

3

4

5

6

7

8

9

10

11

12

13

14

15

16

¹Kalili ala tikotuna takaeya ame agegayamona Kelasa vea mainalega uvayi hae.

²Yisasia ani tipi kalea neataleno ti agegayalega nevigeno nago kanomona Kefo Avamumo agupi mainea kanomoa matimatipinagati Yisasite emaine.

³Ani kanoa yafakapinaga nomaa hanegeno anifinaga mainegeya tokiyaage seni nofiteti kitesaya vayala omainae.

⁴Vayamoya seni nofiteti aiya ayaene kisalu kimalenageno ani nofila aigalu heneataleno aiyafi nofila yafateti ailatapegeno nofila aikano higeno “Ako huka maiyo” huya hapaisaya tokiyaamima hanea vayala omainae.

⁵Omaigeno ani kanomoa nateene kegeene efi efi huno matimatipinagaene agoyaleene maineno tusi aviteno avovo nehuno yafateti agaia augafa aige talaga talagoma humainea yamoa amumoa tusiya humaine.

⁶Ani kanomoa Yisasina ayaayate neegeno ageteno aiyayeno eno aiyafi aleya meyeno mopafi maineno alisoso huneate.

⁷Yisasia mage huno hie “Kefo Avamumogae agusafinagatila hatilavio.” huno hutea yafe ani kanomoa ala kegefafiti mage huno hie “Yisasigae, ago tagaseno anale mainea Anumaya Kotina neamogae, naa hunategahe nehane? Musekaa nehugi nagata aisia kavala huonato.” huno hie.

⁹Higeno Yisasia ani kanohena mage huno hie “Kagai kagia tagae?” huno havigegeno “Nagia Kasagoya-monae. Mukia Kefo Avamumoya nagupi haifaleya mainaya yafe nagia Kasagoyamonae.” huno hie.

¹⁰Huteno Yisasifena mage huno hie “Musekaa nehue ma kumatetila Kefo Avamula humatesanageya alulega ovisae.” huno hie.

¹¹Nehigeya kasagoya afuyagamoya agoyafi maineya kave nenae.

¹²Nenageya Kefo Avamumoya Yisasife mage huya havigae “Ani afuyagamo amakuafi hulategeta vamano.” huya havigae.

¹³Havigageno Yisasia “Ania hiho.” huno higeya Kefo Avamumoya ani kanomo agupitila hatilaviya afuyagamogami amakupi haifalageno ani afuyagamoya amaiyayeya nagola aulufi kapi taviteya tipi asaga hulaviya ti nakaiya fali hano humainae. Afua tu tausenia (2,000) afuyaga fali hano humainae.

¹⁴Fali hano hageya ani afuyagale kava neyagaiya vayala faleya ala kumatega mainaya veaneheene hoyafinaga mainaya veaneheene “Naa maa higeta neone.” huya hamapaigeya ani veala “Hia yana agesune.” nehuya emainae.

¹⁵Yisasite eya kasagoya Kefo Avamumoma agupifiti hatilavino via kanomona agesa akalo higeno kenaa failino anile mopale mainegeya megeteya koli hae.

¹⁶Yisasima humainea kavama agemainaya veamoya naa maa huno Kefo Avamula agupima mainea kanoa alino kanale hutea yafeene afuyagama humatea yafeene hamapaiye.

¹⁷Hamapaigeya ani veamoya Yisasifena “Tagaila tataleka ago vuo.” huya hae.

¹⁸Hageno Yisasia ugahe tipi kalefi haisaga hunemaigeno Kefo Avamuma agupiti ataleno umainea kanomoa Yisasifena “Kagaiene visue.” huno havigegeno Yisasia “Aao kagaya nokalega visanaamoga mukia Anumayamoma aigekateno hugatea yafena vayakamogamina mo hamapaiyo.” huno hie.

²⁰Higeno ani kanomoa viayamo tenia (10) ala kumayaga hanea kotega uno Yisasima hutea yafena hamapaigeya mukia veamoya amamayoa aimainae.

²¹Yisasia tipi kalefi asaga humaino tina lakaeno eteno ti agegayalega egeya muki veamoya agaite melitalu humainae.

²²Emainageno nagola soka kanoa, Yailasie nehaya kanoa, emaineno Yisasina mogeteno aiyafi mope humaine.

²³Mope humaineno tokiyaage huno Yisasina mage huno havige “Vae nagai munala faligahe ayaya neaigi kaya mo maletesanageno kanale hutesie.” huno hie.

²⁴Higeno Yisasia agaiene vigeya veala yageyage huya akave umainae.

²⁵Vageno tuelufua (12) kafua mukia kanale aigu nopinaga nemaiya aala anile maine.

²⁶Nagoa tota vayate ute ete hugeteana agataiya kavala hageno moneama amaminea yamoa hano higeno ani kalia nago kanomoa ali kanale huoatenegi kaliamoa ala humaine.

²⁷Ani amoa Yisasi avagea haviteno ani yageyagema haya veapi Yisasina akavelegati kenaale mevate hie.

²⁸Avate nehuno agesa mage huno havie “Kenaale avate nehisugeno kalinimoa hano hunategahie.” huno agesafinaga havimaine.

²⁹Haviteno ania higeno aupaa kolamoa tanegeno augafafinaga malegeno ageana kaliamoa ago kanale hutene.

³⁰Kanale huteanagi Yisasia “Nagoa tokiyania ago nataleno vie.” huno agesafinaga haviteno anifima alitalu humainaya veamogami amunopi maiyahae huno mage hie “Ta kenanilela mevate hie?” huno humaine.

³¹Higeya agaiaenema tokaeya nemaiya anagaamoya mage hae “Mukia veala yageyage hageka neaganagi naa higeka na kea hamavinegane?” huya hae.

³²Hageno Yisasia moge mege huno avate hia kanohe ati ayemaine.

³³Ati neayegeno ani amoa kalia ago kanale hutegeno agea yafe koli huno atili huteno aiyafi mope huno Yisasima hutea yafena tamage huno hapaiye.

³⁴Hapaigeno Yisasia mage huno hie “Amogae nagaifema havika kagupi maleka kametiti hanageno ago kalikaamoa kanale hugategi kaipamoa yasi nehinageka afaa vuo. Kalikaa agola hano hie.” huno hapaiye.

³⁵Hanepaigeya nagoa vayala soka kanoa, Yailasi notegati mage huya me hapaiye “Munakamoa ago falimainegi ataleka kava kanomona kasalo haegi nagoene havioko.” huya hae.

³⁶Hageno Yisasia hapaiya kehena ohavisia agesa haviteno soka kanohena mage huno hie “Kolia ohuka nagaife havika kagupi maleka kametiti huo.” huno humaine.

³⁷Mukia veafena omeho huneamateno Pitaene Yemesiene nepuamoa Yoniene amavaleno umainae.

³⁸Soka kanomo note uvayi huya agayana mukia veala tusia avineatageno Yisasia nopi haifaleno amakaifena mage huno hie “Naa higetama tusia avianeatae? Ma munala ofalinegi afaa faeno maine.” huno hie.

⁴⁰Mani kea higeya veamoya faligeyama agaya yafe kigia hutageno “Kumatega hatilavitama viho.” huno higeya kumatega hatilavigeno Yisasia itaafoamoganiene agaiaenema vaya anagaene amavaleno falimainea munama malalega amavaleno haimaine.

⁴¹Haino umaineno ayate atafa hulineno agaia kefiti mage huno hie “Talita kumi.” huno hie. Tagaiti kefina “Ma munamoga kahanepaugi hetio.” huno humaine.

⁴²Higeno aupaa ani munamoa hetino ute ete hie. Ago ala munalagino tuelufua (12) kafua hanea munalagino hetino ute ete higeya anile mainaya veamoya amamayo aiye.

⁴³Amamayo aigeno Yisasia tokiyaage ke huno “Anima agaya yafena veala hamaopaiho” huno kahegi neamateno “Kavela amiho.” huno humaine.