Maki 16

1

2

3

4

5

6

7

8

9

10

11

12

13

14

15

16

¹Sapati yupamoa hano higeya Yemesina itaamoa Maliae hamoamoa Magatala kumate alagi Salomiene Yisasina augafale manaage masaveteti faletegahe ani masavena aliya emainae.

²Sota yupa yagemoa yaufa nehaigeya ani aneyaga komulega vae.

³Kategama vayana amakaiamige kea hume hume umainae “Komumo avayalema aililemalea yafana ta taya huno avayaletila alino avayu huno faitega atalelategahie?” huya hae.

⁴Nehuya agesaga huya agayana ani ala yafakefa ago alikelitalageno faitega hanegeya agemainae.

⁵Ageteya ani yafakapinaga hai faleya mogayana nago neyana aya tamaga kaiyaga mopale mainegeya agayana ani kanomoa ayaaya efe kena failinegeya ageteya tusia amamayo aimainae.

⁶Amamayo neaigeno ani kanomoa mage huno hie “Tamakaila tamamayoa oaino. Tamakaya Nasaleti Yisasife ati neayae. Yafaga yosale nilima heya asaimalaya kanohe ati neayayanagi agaya falimainefiti ago hetimaine. Mafina omainegi ani kanoma malaya kumala ma hanegi ageho.

⁷Tamakaya utama Yisasienema tokaeya nemaiya anagaene Pitaene mage hutama hamapaiho “Yisasia ofalino afaa mainenoma tamahapaimainea kemoa ago uhagotelamateno Kalili umainegi anilega neutama Yisasina mogeho.” huno hamanepaiye.

⁸Higeya amakaya atili huteya amamayo aigeya yafakapitila hatilaviya amaiyayeya vayanagi kolima haya yafe nagoa vayala ani kea hamaopainae.

⁹Sota yupa nate alakefafi Yisasia falimainefitila hetino viaamo hagoteno Magatala kumate Malia mainelega uvayi higeno agemaine. Nayona ani amo agupina sevenia (7) Satani Avamula mainegeno Yisasia anatitaleneane.

¹⁰Ani Maliaa ageteno viaamo Yisasienema tokaeya nemaiya anagala mogeana tusia hamau huya avineatageno ani amoa mage huno mo hamapaiye “Yisasia falimainefitila ago hetigena nagaya agaila ago agetena neoe.” huno hamapaigeya haviteya “Havige nehane.” huya amametitia ohunae.

¹²Haenagaa ani vayapitila tolemogania kumala ataleana katega nevaageno Yisasia evayi higeana agemainae.

¹³Ageteana ani kanolatana eteana vayaanimoya mainalega vaaamogani “Yisasia naa kano agoe.” huana mo nehaana ani vayamoya “Havige nehae.” huya haviya amametitia ohunae.

¹⁴Haenagaa alevenia (11) anagala kave maiya nenageno Yisasia evayi huno maineno amakaya vayamoyama haya kemoa “Yisasia falimainefitila ago hetigeta agemainone.” huya haya kema havisaya yafena amakuamoa tilegeya haviya amametitima ohaya yafe Yisasia ke memamakie.

¹⁵Kemamakiteno mage huno hamapaiye “Mukia kotega utama nagai kanale mono kea alitama veamogamina mo hamapaiho.

¹⁶Hamapaisageya nagoa veamoya ani kehena ‘Tamage nehae.’ huya haviya amakupi maleya amametiti hisagetama tina falematesageno Anumaya Kotia amaku amamena aligatigahianagi nagoa veamoya ani kehena ‘Havige nehae.’ huya haviya amakupi omalesaya veafena Anumaya Kotia ‘Hani yapi tegelege nehia atafi viho.’ huno humategahie.

¹⁷Nagai kema haviya amakupi maleya ametiti hisaya veamoya ani tokiyaage avame yana hugahae nagai nagile Kefo Avamula vea amakupitila amanati neataleya amaku amakesafiti ohavinesaya kefitila alu amake alu amakea aigahae.

¹⁸Veama akafu neamanisia osifavema atafa hisayana amaugafa amagata oaisigeya ofaligahae. Vayama nefalia posini lima nesayana amaugafa amagata oaisigeya ofaligahae. Kalima nealiya vayamogami amaugafalema amayama malesagenoa kaliamimoa kanale humategahie.” huno hie.

¹⁹Yisasia, Anumayatimoe mani kea hamapaitegeno ikapinaga avalesaga higeno haino Anumaya Kotina tamaga ayatega umaine.

²⁰Umainegeya Yisasiene tokaeya nemaiya anagala mukia kotega ute ete huya Yisasi mono kea hamanepaigeno Anumayamoa amakaiene vaiyeno amaya huno tokiya yamaaleti “Ani kea tamage nehae.” huya veamoya havisaya yafe kasagoya tokiya avame yana humainae. Mani kema hua kea tamage.