Maki 1

1

2

3

4

5

6

7

8

9

10

11

12

13

14

15

16

¹Yisasi Kalaisia Anumaya Kotina neamofena kanale kea mage huno aepa hie.

²Anumaya Koti aune kanoa Aisaiyaa mage huno kaemaleneane Anumaya Kotia mage huno hie “Haviho ke hamapaisia kanonia Yisasi aulega hagotena hutesugeno kana valino hilato hugahie.

³Kame kotegati nago kanomoa keha keha huno mage hugahie “Anumayamo esia kana ali hilato hutama fatago hiho.” huno humaineane.

⁴Yonia ti faleneamatea kanoa evayi huno kame kotega maineno mage huno hie “Tamakaya tamakua aiyahae hutama kefo yatamia ‘Nagoene ohugahune.’ hutama ataletesagena tina falelamatesugeno Anumaya Kotia kefo yatamia aigetamateno atalelamategahie.” huno humaine.

⁵Ani yupa Yelusalemu veaene Yutia kotega veaene Yoni mainelega umaineya kefo yaamihena hufalote hageno Yonia Yotani lipi tina falematene.

⁶Yonia kemolu afumo ayolagefaleti kenaa fakanino failineno amunofila pulamakamo augafaleti ayetalako huno kilineno kavea kenuene tumemo timaaene neneane.

⁷Mage huno hamapaiye “Nakavela nago kanoa ago egahie. Ani kanoa tusia tokiya yamaa hanea kanogino nagaila ago nagaseno maigena nagaya afa kano mainoanagina agai aiyale ayesuana onategahie.

⁸Nagaya titeti falenelamatoanagino ani kanomoa Anumaya Kotina Alu Aotage Avamualeti falelamategahie.” huno hie.

⁹Ani kanafina Yisasia Kalili kotega hanea kumala Nasaleti kumateti egeno Yonia Yisasina Yotani lipi tina faletene.

¹⁰Tina faleneategeno Yisasia tipinagati aivati huno aupaa ageana ikamoa aihagalo higeno Anumaya Koti Alu Aotage Avamumoa nama kana huno agaitega elavimaine.

¹¹Elavigeno ikapinagati nagola agea aino mage huno hie “Kagaya nagaini nafanemoga kagaifena aluya huno nahau nayamopafi nenagea nenimoga kagaifena aluya huna musekaa nehue.” huno hie.

¹²Anumaya Kotina Alu Aotage Avamuamoa Yisasina veane omai kame kotega anatino umaine.

¹³Umainegeno Satania Yisasife “Havi kava huo.” huno ayevataga higeno fotia (40) yupa Yisasia ani kotega afela afuyagaene mainegeya ensole anagamoya meya huya kava hutenae.

¹⁴Yonina nofi hutenageno Yisasia Kalili kotega Anumaya Koti kanale kea mo hamapaiye.

¹⁵Yisasia mage huno hie “Anumayamo malenea kanamoa ago evayi humainegi Anumaya Koti yagailamatesia kanamoa aupaa evayi hisia yafe tamakaya tamakua aiyahae hutama kefo yatamia ataletetama nagaifena kanale kea humainea kemoa ‘Tamage humaine.’ hutama tamakupi maletama tamametitia hiho.” huno humaine.

¹⁶Yisasia Kalili ti kotumo agegayalega neuno Saimonina aganaamoene Etaluene anakeana noyame kuya nehaa kanolana maineana ala kukonogo ti kotupi hagayu huana nemalae.

¹⁷Yisasia mage huno hanapaiye “Nakave eo. Nakave esaagena noyame kuyama haa kava huna vaya kuya hulanategahue.” huno hie.

¹⁸Higeana aupaa kukonogoania neataleana Yisasi akave umainae.

¹⁹Vaageno Yisasia nagoene neuno Sepetina netalamaamogania Yemesiene Yoniene tipi kalefi maineana kukonogo nefakaniageno Yisasia monake.

²⁰Anaketeno Yisasia ke higeana Sepetia neanafaene aliya vayaaene tipi kalefiti neamataleana Yisasina akave vae.

²¹Kapaneamu kumate taviteya Yisasia Sapati yupa mono nopi haino Anumaya Koti ke humavelie.

²²Humaveligenoa agai kemoa tokiya yamaa hanea kanomo ke kana hia yafena tusia amamayo aigeya mage hae “Nagoa kahegi kema havilinaya anagamoya nehaya avamete ke nehie.” huya hae.

²³Anile nago kanoa Kefo Avamumoa aguafi falemainea kanoa mono nopi emaine.

²⁴Emaineno ala kenake huno mage hie “Avo Yisasigae Nasaleti kumate nafanemoga naa hulategane? Tagaila tahaeka falilategahe emainano? Nagaya kagaifena ago havimainoe kagaya alu aotage kanoa Anumaya Koti hugatenea kano mainane.” huno hie.

²⁵Higeno Yisasia Kefo Avamufena tokiyaage ke huno mage hie “Kea ohuka maiyo. Mani kanoa ataleka agusafinagati vuo.” huno hutene.

²⁶Higeno ani Kefo Avamumoa moyege meyege huteteno kasageke hia kava huteteno alakenake huno agusafiti ataleno hatilavimaine.

²⁷Vigeya mukia vayala amamayo aigeya huge havige huya mage hae “Na kava nehie? Na augafa haekafa ke nehie? Tusia tokiyaleti anumayaage ke higeya Kefo Avamumoya agai kea ali hipoya huya hatilaviya vae.” huya hae.

²⁸Hageno Yisasima humainea avagemoa mukia Kalili kotega ute ete higeya mukia veamoya havimainae.

²⁹Yisasia Yemesiene Yoniene mono nona ataleya anileti Saimonigani Etalugani nopinaga umainae.

³⁰Umainageno Saimonina aamona itaamo alekanoa amukonako kali nealigeno Yisasia uvayi higeya aupaa ani alekanohe Yisasina hapaimainae.

³¹Hapaigeno Yisasia agaite eno ayate alino hetitegeno amukonako kaliamoa agola kanale hutegeno kavela kaeno amamine.

³²Unena yagea tavifalegahe higeya veamoya kasagoya kali veanea Kefo Avamumoya amakuafima ali haviya nehia veanea Yisasite amavaleya emainae.

³³Mukia ani kumate veala fiate elitalu humainae.

³⁴Yisasia havigu havagu kali nealiya veanene ali hilato humateno mukia Kefo Avamumola amakuafiti amanatitalegeya Kefo Avamumoya Yisasina agoma agemainaya yafe Yisasia mage huno hamapaiye “Mani yafena kea ohiho.” huno hamapaiye.

³⁵Natena tani kotigeno Yisasia hetino ani nona ataleno vaya omai kotega umaineno nunamuna humaine.

³⁶Umainegeya Saimoniene nagoa anagaamoyaene agaife aiyaka maeya agaitega uya mage huya mo hae “Mukia veamoya kagaifena katineayae.” huya hapaiye.

³⁸Hapaigeno Yisasia mage huno hamapaiye. “Alu kumate kumate vigetao nagaya mono kea mo hamapaigahue. Mono kema hamapaisua yafe nagaya emainoe.” huno hamapaiye.

³⁹Mukia Kalili kotega viayamo mono nopi Anumaya Koti kea hamapaino Kefo Avamula veamogami amakuafiti amanatitalene.

⁴⁰Nagola fugitayamo augafa alino hayagino atalako humainea kanomoa Yisasite mepe huno mage huno hapaiye “Kahaisigekasina nagaila ago ali hilato hunatateasine.” huno humaine.

⁴¹Higeno Yisasia kalagi aiteteno ayana hayo huno augafale avate nehuno mage huno hie “Nahaigena kaugafamoa menia kanale hino huna nehue.” huno higeno anile aupaa kaliamoa hano hutene.

⁴³Hano hutetegeno Yisasia mage huno hapaiye “Aupaa visanaamoga ali hilato hugatoa yafena nago kanoa haopaika mono nopi kava kanomote uka mukia veala kalikaama alina kanale hugatoa kema havinuyahena mono nopi kava kanomoa kaugafa kamota huno kagetesigeka kaugafama ali kanale hugatoa yafena Mosesea ‘Ma yama Anumaya Kotina amio.’ huno humainea yana Anumaya Kotina momio.” huno tokiyaage ke hapaiye.

⁴⁵Hapaiyanagi ani kanomoa viaamo kanalema hutea avagea alu kumate kumate hamapaigeya kasagoya veane haviteya “Kalitia alino kanale hulatesie.” huya Yisasite emainae. Aya yafe Yisasia fufuyate visia kana omalegeno amataleno vaya omai kotega umainegeya alu kumateti kumateti veala Yisasite emainae.