Mak 6:28-50

²⁸Tama agai te Jongo tobolu togwali te pou me delide munama, tama selasa aselama, tama te gesi wegibolo magasali. Tama te wegigo aga idabolo mawai.

²⁹Te Jon aga wali pabo bidi dabego te wabo po odama, tama augwaligo aga tigi sagaselama, tama augwaligo te gų pageba pubaligi pai.

³⁰Te Jisasgo tagala palali po sela pali sę bidi dabe augwaligo sę silama, tama ma begasa aselama, tama augwali Jisas dali deliba sisinani. Tama augwaligo te egi pali sę po miani, tama tigidali po augwaligo te we bidibolo ola mani po wai.

³¹Te we bidi hauwa eda asiyu, ugwa soyu yali, tama Jisas dali aga wali pabo bidi dabe dali augwaligo te we bidi tau sabo sę ebaso, augwali nai tuyu toma nabo sogo meni yani. Tama tibaso Jisas aga wali pabo bidi dabebolo te po wali, “Ae, tegobao, dena naga te bidi meni yaiba me deli pelama, tama dage toma dwasianu tuiagameo,” te po wai.

³²Tama augwali te geba selama, tama augwali te sigi ąį daidu te bidi meni yai habu me deli badu pali. Augwa naga palio.

³³Tiali goli te we bidi hauwago augwali pabo suali, tama augwaligo te augwali koneani. Tama tigidali hanu we bidi augwali teba pedai badu tǫdu udada pelama, tama augwali te Jisas pali sunumi te badu polasa pedaligi palio.

³⁴Tama Jisas te gebadu pelama, te wę pedai badu tugi pelama, tama agai te we bidi hauwa bidalubo suali. Tama agai augwali homu dene genuai mu yali. Augwali te sipsip kibu tonalubo bidi meni yai tiwai bidaluali. Tama tibaso agai gagalama, te wiegi yai po hauwa augwaliba ola mawai.

³⁵Te giliga dega sigulainogo yali, tama te Jisas aga wali pabo bidi dabe te agaba aselama, tama augwaligo te po wai, “Te ede da, te bidi meni yai madi tama te giliga dega sigulainogo ebao.

³⁶Nago te we bidi augwali tagala palao. Augwali peyu, te be nani dabeba pomainao, tama augwa tuabo nai abelegi pomainogo tagala palao,” te po wali.

³⁷Jisasgo augwaliba te po wei ponani, “Duga digi te augwali nai maiąo.” Tama augwaligo agabolo te po wali, “Te nago homugo dago te bidi sese a naga 200 kina monego dago te bret abelegi pomainogo eyu obawe?”

³⁸Tama agai augwalibolo te po wali, “Dagego nisu naga bret munalubowe? Dage pelama sugi piąo.” Augwaligo sula selama, tama augwaligo te po wai, “Dago te bret a naga, me te sųgų si te tama elalubao.”

³⁹Tama agai augwalibolo te po wali, “Tigidali augwali te wiegi yai nosaide wasisi pelama, duada piąo wao,” te po wali.

⁴⁰Tama te we bidi tigidali augwali duada pali, tama te wasisi pelama, duada pali hani me badu te bidi sese a naga 100 bidi duada pobadi, te meba duada pali hanide te bidi si olama nogo si 50 bidi bidada pali.

⁴¹Tama agai te a naga bret dali te sųgų si me sali. Tama agai te dagaluba tonaludama, tama puba hwi po Godibolo walio. Tama agai te bret pebedama, tama te aga wali pabo bidi dabebolo menama, tama augwaligo te we bidiba dobaba pali. Tama te sųgų si me tologolama, tama te tigidali we bidiba dobaba palio.

⁴²Tama tigidali augwali te nai tudu pali te usu mu yalio.

⁴³Tama te bret me sųgų te me badu tigidali munalua pali, te augwaligo sisinama, tama te bonou wa basket te nogo si olama sągągo si pągąwani.

⁴⁴Te bret me sųgų tuali bidi dabe, augwali te bidi sese umabo te 5,000 bidi dao.

⁴⁵Te nai mabo sę silama, tama Jisasgo aga wali pabo bidi dabe augwali te asesa piąo olama, te augwali polo te gebaba holomainogo elama, tama augwali te aga asabo badu te sigi ąį pedai badu polasa te Betsaida buluba piąo wali. Agaduba digi te we bidi dabe augwa beba tagala palu pomainogo yai.

⁴⁶Agai te we bidi augwali tagala palama, tama aga te bulu du bageba ugwa holai. Aga tede agaduba bididubadi te Godibolo po wainogo tiali.

⁴⁷Te be pio ebode te geba te sigi ąį tomode elaluali, tama Jisas agaduba te tǫde me bididuai.

⁴⁸Tama agai suali, te waligo augwali degelainogo ebaso, tama augwali te wę togobo sę dene mu yai. Te be posabo pąde, teda Jisas te sigi ąį daidu augwali bidiboba pali. Agai te augwali ela soainogo yai.

⁴⁹Tiali goli te aga wali pabo bidi dabe augwaligo aga te sigi ąį daidu asobo sulama, tama augwaligo homugo aga te isi bidi me deli da te homu yai. Tama augwali homu dwai noma sabo i dali walio.

⁵⁰Magi baso meni, tigidali augwaligo aga sulama, tama augwali wi mu yai. Tama polo Jisasgo augwalibolo weyu te po wai, “Dage homu tegaluiąo, bomo elama bidiąo. Te ena tama dao. Dage wi egimio,” te po wai.