San Marcos 6:28-50

²⁸Sundao oso soquendasave, oyasɨa Juan ãca, seru poratu pɨpe. Mborerecuar omondo co cuñatai upe, evocoiyase cuñatai omondo osɨ upe.

²⁹Oyanduse Juan remimbohe, yuvɨraso setecuer reca. Ipare vɨraso yuvɨreco tuvɨpave yapocatu.

³⁰Co pare, apóstol oñemonuha Jesús pɨri yuvɨreco. Ipare omombehu mbahe güembiapogüer, oporombohe agüer avei yuvɨreco chupe.

³¹Ahese aipo ehi oapóstol upe: —Perio cohave, yaso, yapɨtuhumi rane co cotɨ —ehi. Esepia, oyepɨndecuaño ité ava yugüeru chupe, sese ndiyai icaru ãgua yuvɨreco.

³²Evocoiyase ahe güeraño apóstol reseve yuvɨraso carite pɨpe co cotɨ ava sui.

³³Setá rumo ava osepia ichose. Ichui opacatu ava tecua rupindar osaquɨcue moñaño; ahe ranengatu oyepotapa yuvɨreco ichui.

³⁴Ogüeyɨse rumo carite pɨpe sui, osepia ava rehɨi, ahese iparaɨsu ava eta chupe, inungar ovesa ndovɨrecoi vahe guãrosar. Ipare ombohe opacatu mbahe rese.

³⁵Caharuse rumo, semimbohe oyemboya yuvɨreco sese, aipo ehi yuvɨreco chupe: —Caharu eteprɨ moco, iyavei ndipoi oɨ co rupivemi vahe.

³⁶¿Ndiyai vo eremondopa ava tecua-tecuami cõi vahesa rupi? Aheve tovɨrocua ocaru ãgua yuvɨreco —ehi yuvɨreco chupe.

³⁷Ahe rumo omboyevɨ: —Pe pemondora mbahe semihura —ehi. Semimbohe aipo ehi yuvɨreco chupe: —¿Iyacatura pĩha oreu dosciento denario pan repɨrã ava mbocaru ãgua? —ehi.

³⁸Jesús aipo ehi: —¿Mbovɨ vo pereco pan? Peso, tapesepia —ehi. Sepia pare, omombehu: —Poyandepo pan, ñuvɨrío pira —ehi yuvɨreco chupe.

³⁹Evocoiyase omboyaho-yaho ava imboguapɨ capihi harɨ rupi.

⁴⁰Cincuenta, cien rupi-rupi oyemboyaho yuvɨreco.

⁴¹Ichui Jesús oipɨsɨ poyandepo pan, ñuvɨrío pira. Ipare omahe ɨva rese, “Avɨye ndeu, che Ru” ehi. Imbohi-mbohi pare, opa omondo güemimbohe upe ava rehɨi upe imondo ãgua yuvɨreco. Pira ñuvɨrío vahe avei omboyaho-yaho opacatu ava upe.

⁴²Evocoiyase opacatu ava ocaru vahe ihɨ̃taropa tẽi yuvɨreco.

⁴³Ipare semimbohe omboapɨpopa doce tuprɨ ɨruova pan iyavei pira rumbɨrer yuvɨreco.

⁴⁴Cuimbahe ocaru vahe retacuer cinco mil tuprɨ.

⁴⁵Ipare Jesús, “Peha pe rane carite pɨpe, pesasa ɨpa Betsaida ve peso che renondeve. ‘Avɨye’ tahe rane ava eta upe” ehi güemimbohe upe.

⁴⁶“Avɨye” ohe pare ava upe, oyeupi oso ɨvɨtrɨ rese oyeroquɨ ãgua.

⁴⁷Pɨ̃tuse carite ɨpa mbɨterve ité secoi. Jesús rumo ahe ae opɨtaño ɨvɨve.

⁴⁸Ahese omahe güemimbohe rese iyeapɨcui catuẽhɨse. Esepia, ɨvɨtu ipĩrata vahe osovaĩchi yuvɨreco. Cõhe potase, oguata ɨ harɨ rupi güemimbohe cotɨ oso. Avɨye ité acoi oñocuaño vaherã oso.

⁴⁹Sepiase rumo ‘hãgüer tẽi revo’ oya, sãse pucu-pucu ɨ harɨ rupi iguatase semimbohe yuvɨreco.

⁵⁰Esepia, opacatu osepiase osɨquɨye yuvɨreco ichui. Ahe rumo aipo ehi: —¡Peyemovɨracuaño, che tẽi! ¡Pesɨquɨye eme che sui! —ehi güemimbohe upe.