Mak 5:9-40

⁹Pa e Iesu i dekeni mange, “Esi na risam?” I kelesi mang, “A risak a liur a mot, anasa mila galis kol.”

¹⁰Pa i nunung rakrakai e Iesu sur gong i sune sen la kusun a pukna ning.

¹¹A tnan liur a boroi la hangan ting na mangir ning i milau.

¹²A motla la nunung rakrakai e Iesu mang, “Ur sune mila tetek a boroila sur milar kas uting onla.”

¹³E Iesu i malmaling sen la. La purum kusun a barsan ning, pa la kas tar ana boroila. A boroila la liu purum uting na palis sur utumo na puka tasi, pa la dom rop. A boroila rop i arlar ana naur a rip.

¹⁴La ning la tai alar a boroila, la dun ulak, pa la atatai ana utna ne ting na hanua anunlai pa dingla na hananuala otleng. Pa a tarai la han sur lar oroi asaning i hanot.

¹⁵Ning la hanot tetek e Iesu, la oroi a barsan ning a kabaliur a motla la ka purum tar kusuni. Kaning i kes, ka pipis pas pa ka mananos ulak. Pa la matmataut.

¹⁶La oroi asaning e Iesu i toli, pa la atai a tarai ana utna ning i hanot ana barsan ning a motla la solong tari, pa ana boroila otleng.

¹⁷Lamur la nunung ongongos e Iesu sur ir han kusun anunla papar.

¹⁸Ning e Iesu i kas ana mon, a barsan ning a motla la solong tari, i nunung e Iesu sur diar armuri.

¹⁹Ika e Iesu bel i malmaling, i atai i ka mange, “Ur han uting na num a rumai tetek a maimla, pa ur atai la ana tnan utna ning a Leklek ka tol tari hom, pa ana nuna marmaris tetek u.”

²⁰Pa i han, pa i warwara amon utumo na papar Dekapolis ana tnan utna ning e Iesu ka tol tari onoi. Pa a tarai rop la kulkulan.

²¹E Iesu i kas ana mon pa i ulak uto na ris a puka tasi. Ning i kes tumokorot, a tnan kunum a tarai la atalilis pasi.

²²Ning a ningnigo tagun a rumai lotu a risana e Jairus, i hanot. Ning i oroi e Iesu, i punga na hanrawai salanigo tana.

²³Pa i nunung kol mange, “A natuk hane, milau ir mat. Lamut, dar han pa ur suah naur a kum saot ono, sur ir langolango ulak pa ir laun.”

²⁴Ning dia han taum, a kunum a tarai la mur e Iesu, pa la tur alar pasi.

²⁵Ning a hane tingia i sasam ana tinsaman a suluk. Ka sasam pas ning a bonot pa pisir naur a rau.

²⁶Ka han pas tetek a galis a doktala sur lar nangani, ika la saran a tnan kankan teteki pa la amus pas anuna mani. I rakrakai kol ma a tinsaman ning ono.

²⁷Ning i longor a warwara o e Iesu, i nuki mang, “Ning ar tuk ka anuna kaen ar langolango ulak.” Pa i han tumo lamur tana na tinine kunum a tarai, pa i tuk anuna saket.

²⁹Pa a suluk i suah kakat, pa a hane ning i kilang a palaona mang a tinsaman ka rop.

³⁰Ning e Iesu i kilangi mang a rakrakai i han kusuni, i talingir na tinine kunum a tarai, pa i deke mange, “Esining i tuk anuka kaen?”

³¹Anuna kakak a asaer la atai i mang, “U oroi ot a kunum a tarai ne la tur talilis pas u, sur asa ning u kabah mang, ‘Esining i tuk iau?’”

³²Ika e Iesu i tatatai taltal sur esining i tuk tari.

³³A hane ning i matmataut, pa i koloron, anasa i tasman a utna ning i hanot ono. I han tetek e Iesu, i punga salanigo tana, pa i atong puasa a utna ning ka tol tari.

³⁴Pa e Iesu i atai i mange, “Natuklik, anuma tortorot ka alangolango pas u. Ur han taum ana bal molmol, anuma tinsaman ka rop.”

³⁵Kaning ot e Iesu i warwara, dingla na tarai la hanot miting na rumai ane Jairus, pa la atai i mang, “Sur asa ning u amolot a Tena Asaer? E natum hane ka mat.”

³⁶E Iesu i longor warwara ning, i atai ka e Jairus mang, “Gong u matmataut. Ur tortorot ka.”

³⁷Bel i malmaling pas tik sur ir muri, ika i ben pas e Pita, e Jems ditas ma e Jon.

³⁸Pa ning la hanot ting na rumai ane Jairus, e Iesu i longor a totbor, pa aregaia na domos.

³⁹I kas pa i atai la mange, “A totbor pa tintinangis na sa ining? A kaklik ning bel i mat, kaning i borbor duman ka.”

⁴⁰La malani ka. I sune purum sen la rop, i ben pas a tamana kaklik pa e tana, pa ditol otleng ning ditol han taum ono, pa la kas tetek a kaklik.