San Marcos 5:9-40

⁹Bix e xi' tkanen Jesús te biman: —¿Ti tbiy?—tz̈i Jesús. Bix aj ttzak'be'n biman: —Nimxse nbiya, cuma nimxse kbeta najl tuj tanem jxjala—tz̈i biman.

¹⁰Bix ak' biman kanl xtalbil te Jesús tu'n mi'n chi ex tlojo'n Jesús ke biman tuj cytx'otx' Gerasa.

¹¹Bix attzen jun witz nka ttzii' tnijabel a'. Bix attzen nimjil boch nchi waa'n tc'u'j witz.

¹²Bix e xi' cykanen biman te Jesús: —Ko ttzakpi'cxa cyxol jil bocha, tu'ntzen kocxa tuj cyxumlaljil—tz̈i ke biman.

¹³Bix e tcuya Jesús, bix etz ke biman tuj tanem jxin xjal, bix ocxke tuj cyxumlal boch. Tej tzunj cyocx biman tuj cyxumlal boch, bix e xi' ajkelkejil tc'u'j witz tu'n cycu'panjil tuj tnijabel a'. Bix e jaw jik'bakejil. Ca'ba mil jil boch e cyim.

¹⁴Yal tzun kej xjal cylel boch, bix e xi' ok ke xjal tuj tnom bix tuj cojbil te kbalte ti otk baj cye boch. Bix e xi' baj ke xjal ttzii' a' te cyey'lte ti otk baj.

¹⁵Tej tzunj cypon xjal jaa' tcwa' Jesús, bix oc cycye'yen xjal jxin ocx najan ke biman tuj tanem, k'uklc'axin, toc ti'jxin, bix ba'ntl tzunxin, mintzen s̈-intlxin. Bix e jaw sey'paj ke xjal.

¹⁶Bix alkch tzunj otk tz'oc cye'yente ti otk baj tuyaj xin xjal e najan biman tuj tanem bix ti e baj cye boch, bix ak'kexin kbalte te juntl wik.

¹⁷Tejtzen tbaj cybi'n xjal, bix ak' ke xjal cubsal cywitz te Jesús tu'n texxin tuj cytanem xjal.

¹⁸Tej tzunj tocx meltz'aj Jesús tuj choc juntl maj, ja tzunj xin xjal otk ten biman tuj tanem, bix oc tenxin cubsal twitzxin tu'n t-xi'xin tuya Jesús.

¹⁹Pero min e tcuya Jesús, bix e xi' tkba'nxin: —Cutxa tey cyxol t-xjala. K'umenxse cye ti xtse Dios jay, bix ti tten s-oc k'a'ben tc'u'jxin ti'ja—tz̈i Jesús tej xin xjal.

²⁰Bix aj jxin xjal, bix ak'xin kbalte tuj Gerasa bix t-xol juntl tnom tuj ja lugar Lajaj Tnom tbi ti otk temaxin tu'n Jesús, ka otk tz'el tlojo'n Jesús ke biman ti'jxin. Cykilcaxse xjal e jaw klee' ti'jxin.

²¹Tej tzunj tpon meltz'aj Jesús juntl maj tujx choc juntl jlajxe tnijabel a', bix oc chmet nim xjal ti'jxin ttzii' a'.

²²Texse naj hora tej tpon junxin tawil c'ojlal jun camon jaa' te xnak'tzabl tyol Dios, Jairo tbixin. Tpontzen cananxin ti' Jesús, bix e xi' t-xoo'n tiibxin t-xee' tken Jesús,

²³bix nim oc tenxin cubsal twitzxin te Jesús. Tz̈i tzunxin cyjulu: —Ch'ix tel tanem jtxin nmeela te cablajaj jnabk'itxin. Quixta ch'in wuya, bix k'a'c'a ch'in tk'aba tibajtxin tu'n tul tnaabltxin bix tu'n titz'jtxin tu'n tipemala—tz̈itzen tawil c'ojlal camon jaa' te Jesús.

²⁴Bix e tcuya Jesús tu'n t-xi' tuyaxin. Tej tzunj cyxi'xin, nimxse xjal oc lpe cyi'jxin. Nimxse oc cutz'j Jesús cyu'n xjal.

²⁵Cyxoltzen tnimal xjal e pona junxuj xuuj yaab. Otk bint cablajaj jnabk'i toclen we' cyak a' ti'jxuj.

²⁶Otkxse tziy'xuj tuya nim k'anel, bix otkxse baj tpwakxuj, pero minxsetii' ch'in otk tz'oc tbinche. Mastlpe otk tzak' cwel bint-xuj.

²⁷Cwatzen toc tbi'nxuj ka nim xjal n-ul tnaabl tu'n tipemal Jesús, bix otk pon Jesús tuj ttanemxuj, bix iy' tuj tc'u'jxuj: —Nuketle oj toc nmoco'n t-xbalenxin, ya tzultzen nnaabl—tz̈i tzunxuj. Bix ocx tcutz'en tiibxuj cyxol xjal tu'n toc tmoco'nxuj t-xbalen Jesús.

²⁹Tej tzunj toc tmoco'nxuj Jesús, bix e we' tyabelxuj. Bi'xse e tna'xuj ka otk tzkij tyabelxuj.

³⁰Pero tej tzunj tel tniy' Jesús ti'j ka tu'n tipemalxin otk tzula tnaabl jun xjal, bix aj meltz'ajxin kanlte cye xjal: —¿Al ma tz'oc moconte nxbalen?—tz̈i Jesús.

³¹Bix aj cytzak'be'n t-xnak'atz Jesús: —N-oc tcye'yena ka nim xjal n-oc cutz'ente tey. ¿Tikentzen n-oc tkanentla keya: “¿Al ma tz'oc moconte we?”—tz̈i ke t-xnak'atz Jesús.

³²Pero bix oc ten Jesús cyey'lec cye xjal la' al otk tz'oc moconte texin.

³³Yal tzunj xuj xuuj, otk jaw lu'lenxuj tu'n ttz̈i, cuma otk tz'el tii'nxuj tipemal Jesús tuj ewjel. Bix e xi' lk'exuj twitz Jesús, bix e cub majexuj, bix e xi' tkba'nxuj tik'ch otk baj texuj.

³⁴Bix e xi' tkba'n Jesús texuj: —Xuuj, tu'nxse cykil tanema wi'j ma tzula tnaabla. Mi'n baj tc'u'ja. Cutxey tuj ttz̈yal, cuma ma tzul tnaabla—tz̈i Jesús texuj.

³⁵Nyolenxsete Jesús tuyaj xuj xuuj, tej cypon cab te tja jxin Jairo, bix e xi' cykba'n sanjel texin: —Ma cyim tmeela. Mi'ntzen tz'oc tentla yajlalte Xnak'tzal—tz̈ikexin te Jairo.

³⁶Pero bix e tbi Jesús cyyolxin, bix e xi' tkba'nxin te tawil c'ojlal camon jaa': —Mi'n tzaj ttz̈i ti'ja. Kee'c tc'u'ja. Tzul tnaabl tmeela—tz̈i Jesús te Jairo.

³⁷Bix ak' pomel canaxin tja Jairo. Pero min e tcuya Jesús tu'n t-xi' lpe nim xjal. Nuk jac'a Pedro, Santiago, bix titz'en Santiago, Juan. O'cxse xinj e tcuya Jesús tu'n cyxi'.

³⁸Bix e ponkexin tja tawil. Tej tzunj cyponxin tja tawil, bix oc cycye'yenxin nim il nbaj, bix nchi ook' xjal.

³⁹Bix ocx Jesús tunwen, bix e xi' tkanenxin cye xjal: —¿Tikentzen nchi labaney? Min ma cyim tej txin cwala. Nuk nwutantxin—tz̈i Jesús.

⁴⁰Pero nuk oc cytze'n xjal tyol Jesús. Pero bix etz tlojo'n Jesús cykilca ke xjal pe'n. Bix ocx tii'n Jesús ke tman nee' bix ke t-xnak'atzxin jaa'j tocxa nee'.