Madiu 5:35-45

³⁵Naga föigige säla diigimabio. Mida, naga föida Godeïe emoea emosaia idala filo dialeamelë. Amase, Yalusalemege säla diigimabio. Mida, Yalusalemeda beaha aligilo Gini edefade neebe amoïe gaamumelë.

³⁶Dihïle busa säla, migalïa diigila ado gelola säla negemabio. Mida, dia busa hilï afädë neala dihï falemolöige, yabumolöige ulïmelë.

³⁷Afädë hamomolö galëda, ü, ailemu sämalo. Ado odoage baala säseda, ado amo baala sälo amolida, mugabe busa nafadefalïmadila maasebe amo sähamelëla säla ï.

³⁸Yesuea ado aso, sähamu neamu sähalea, Ado säi dilia nabelo amea sähaleada, Afädëa elöïe si besela digiseda, ïe siige besela digilomelë. Amase, afädëa elöïe bese besela digiseda, ïe besege besela digilomelëla sälo.

³⁹Amai gaso, na dilima säla ïahago. Afädëa dilima nafade hamoseda, dilia bu dabemabio. Afädëa dïe ba dafädimadi nufudaseda, ba näiadogoge olemalo.

⁴⁰Afädëa dïe fagulo sedi amo gudi mogeloea ïmalamolöïe, dibalä gudimolö sigi awäseda, dïe gögï fagulo daia salugalo amo bu baala ïmalo.

⁴¹Afädëa gelolafalï di dofe afädë mosalaseda, ebalä dofe äudä mosalo.

⁴²Afädëa nelebo afädë go ïmola säseda, hä egali ïmalo. Amase, afädëa hobea ïduläïe bidi negesagola säseda, auaula baagi ïmabiola säla ï.

⁴³Yesuea ado aso, sähamu neamu sähalea, Siiba ado sälo dilia nabelo amea sähaleada, Dïe damelëbalä boba hamosaleada, dibalä ado nii nefolalebe amolibalä habobala namialola sälo.

⁴⁴Amai gaso, na dilima gomalä säla ïahago. Dilibalä ado nii nefolalebe amolibalä boba hamola, amase, dili neala sëlasisa nefolalebe amoli hedabomäia, Godema adolasisa namialo.

⁴⁵Ameada, dilile Diado selesaia mosöa neebe amoïe malö neala olemolömelë. Mida, eada nafade hamolomage, hedabi hamolomage, ïe eso neelasilo neada, mala mogoi hamolomage, mala mogoi made hamolomage, sege digalasilo nea.