MAAKU 9:21-40

²¹Yesu nɛ́ pì de là à bè: Zaa bↄrɛmɛ à kúo lɛɛ? À wèàla à bè: Zaa à nɛ́ féte zĩmɛ.

²²Ègↄ̃ à zuu tɛ́ kↄ̃n ío guu baabↄrɛ, ègↄ̃ yezi à à dɛ. Tó nɛ́ fↄ̃ ǹ pↄ́ke kɛ, ǹ wa wɛ̃nda gwa ǹ wa faaba kɛ.

²³Yesu bènɛ: N bè, tó mɛ́ fↄ̃ↄ́? Baabↄ píngi è sí kɛ gbɛ̃ kɛ̀ ma náanɛ vĩinɛ.

²⁴Ben nɛ́ pì de wii lɛ̀ gↄ̃ↄ à bè: Má n náanɛ vĩ. Ǹ n náanɛ kɛ̀ èe kɛ̃sãama kaaramɛ.

²⁵Kɛ̀ Yesu è zà e nakↄ̃rɛɛḿma, à gì zĩn pìnɛ à bè: Zĩn swãdo kpadugu, má ònnɛ ǹ go nɛ́ pìa. Ǹton gɛ̃ à guu dↄro.

²⁶Ben zĩn pì wii lɛ̀ à à nìgã pãsĩpãsĩ, ben à gòa. Nɛ́ pì gↄ̃̀ daɛna lán gɛ̀ bà ai paridee bè à gàmɛ.

²⁷Ben Yesu à kũ̀ a ↄↄa, à à fɛ̀ɛ à zɛ̀.

²⁸Kɛ̀ Yesu gɛ̃̀ ua guu, ben à ìbanↄ à gbèka gusaɛ wà bè: À kɛ̀ dia wée fↄ̃ wà pɛ́ zĩn pìa à bↄroo?

²⁹Ben à wèńla à bè: Kɛ̀ taka è sí bↄro, sé kↄ̃n aduakɛnao.

³⁰Kɛ̀ aↄ̃ bↄ̀ gwe, ben aↄ̃ pã̀ Galilinɛ. Yesu yezi wàgↄ̃ a kúkii dↄ̃ro,

³¹zaakɛ èe yã daa a ìbanↄnɛmɛ. À bèńnɛ: Weé Gbɛ̃ntee Nɛ́ na gbɛ̃nↄnɛ ń ↄzĩ wà à dɛ, à gurↄ aagↄ̃dee zĩ eé fɛɛ.

³²Aↄ̃ↄe à yã pì dↄ̀rↄ dↄ̃ro, ben vĩa ń kũ aↄ̃ yã pì gbekaa.

³³Ben aↄ̃ kà Kapɛnamu. Gurↄↄ kɛ̀ à kú bɛ, à a ìbanↄ là à bè: Bↄ́ lɛokpakↄ̃an ée kɛɛ zɛ́ guuu?

³⁴Ben aↄ̃ yĩtɛna, zaakɛ aↄ̃ↄe lɛokpakↄ̃a kɛɛ zɛ́ guu dɛnlaa yã musumɛ.

³⁵Ben à vɛ̃̀ɛ à gↄ̃ↄn kuri awɛɛplaaa pìnↄ sìsiazi à bè: Tó gbɛ̃ yezi à kɛ gbɛ̃ káaku ũ, adee gↄ̃ kpɛɛdee ũ, à gↄ̃ baade pínginɛ zĩ̀ri ũ.

³⁶À nɛ́ féte sɛ̀ à à zɛ̀ ń aɛzĩ, ben à à sɛ̀ à à kpà a kùla à bèńnɛ:

³⁷Gbɛ̃ kɛ̀ nɛ́ kɛ̀nↄ doke sì ma ìbakɛɛ yãnzi, mámbe à ma si. Gbɛ̃ kɛ̀ ma si sↄ̃, mámbe à ma si madoro, gbɛ̃ kɛ̀ ma zĩin á sì.

³⁸Ben Yohana bènɛ: Dannɛri, wa gbɛ̃ke è, èe zĩnnↄ gooḿma kↄ̃n n tↄ́o, ben wa ginɛ, zaakɛ wa gbɛ̃nlo.

³⁹Ben Yesu bè: Àton gínɛro, zaakɛ gbɛ̃ke é fↄ̃ à dabuyã kɛ kↄ̃n ma tↄ́o à ɛara à ma tↄ́ zaaa sí dↄro.

⁴⁰Gbɛ̃ kɛ̀ èe íbɛtɛ kpáwaoroo nɛ́ wa gbɛ̃mɛ.