San Marcos 9:21-40

²¹Tsigo lëë Jesús kwnabtiits lo pxosy xaa chëb: —¿Destye pa wor chak xaa sinrii? Tsigo lëë pxosy xaa kwëb chëb: —Destye nii nak xaa xaa wiñ.

²²Aan ndaly vuelt no kchon kyalbini mal gue xaa lo ki ni lo nis par kutyo xaa. Singo nako deelñee schilo kuuñ kyakoo xaa, pkëstyoo lëë noo ni beeñ noo yudar.

²³Tsigo lëë Jesús chëb: —¿Xa nak nii deelñee schilool? Kchësyo schilo lo meñ nii xniladzy.

²⁴Tsigo lëë pxosy xaa wiñ go kwchuptsyë chëb: —¡Xniladzyaa; beeñ naa yudar kniladzyraa!

²⁵Tsiñee lëë Jesús kon nii lëë meñ xtyopre, lëë xaa kwëntseeb lo kyalbini mal go chëb xaa: —Kyalbini ngop ni ngwaat, naa xñabey nii kchool leñ styoo xaa wiñ re aan kpikchedroo sëëboo.

²⁶Lëë kyalbini mal go kwchuptsyë, aan lëëw beetyë xaa wiñ go stub. Loxsye ngo lëëw pchoo leñ styoo xaa, psaano xaa sootee meñ nii lox kuty. Por ngo ndaly meñ kwnee nii lëë xaa kuty.

²⁷Per lëë Jesús kwseñ ña xaa, lëë xaa blische xaa, aan lëë xaa wiñ go kusoli.

²⁸Loxsye ngo lëë Jesús kwsëëb tu leñ yu, aan lëë xpëëdscuel xaa kwnabtiits chëb: —¿Penak nii pchiloody noo ngwii noo kyalbini mal go?

²⁹Lëë Jesús kwëb chëb: —Por parñee kwii ñe clasy kyalbini mal go no nii kutiitsni kazh ñe Dios.

³⁰Tsiñee lëë xaa bi siko, lëë xaa kwte nëz Galilea. Per koklasty Jesús nii cho nyaknano

³¹porñee lëë xaa noyuuñ kseedy xpëëdscuel xaa xñee xaa lo xaa: —Lëë mguiy nii pxaal Dios jkaa ña meñ, aan lëë meñ kuty xaa. Per tse nii loxo tson kpidz lëë xaa kpañ.

³²Per byeñdy xaa nii kwnee Jesús aan ptsyeb xaa nyabtiits xaa.

³³Lëë xaa ptsiñ leñ kyedzy Capernaum, aan lëë xaa nchenol leñ yu tsi lëë Jesús kwnabtiits chëb: —¿Pe cos no ktilytiits to nii syoop no nëz?

³⁴Per tsesy kwche xaa, porñee nan xaa nii worñee siid xaa nëz lëë xaa no ktilytiits xaa dyon cho xaa mastre non.

³⁵Tsigo lëë Jesús kwsob aan lëë xaa kwtsyetsy ksa tsiipchop xpëëdscuel xaa aan lëë xaa chëb: —Deel no cho chakladzy kak tu xaa nii mastre non, no nii kyaanlyu xaa ni jkiiñ xaa kchë lo meñ.

³⁶Loxsye ngo lëë xaa pso tu xaa wiñ groltyee, lëë xaa kwteetsy xaa wiñ go aan lëë xaa chëb:

³⁷—Kchësy meñ nii kantsi tu xaa wiñ re porñee xniladzy meñ xtitsaa, naa chantsi meñ go. Ni kchësy meñ nii chantsi naa, lëdy nonsyaa chantsi meñ go, sink wi xaa nii pxaal naa.

³⁸Tsigo lëë Juan chëb: —Maestre, ptyon noo tu xaa nii nonsyke lël xseety xaa tsi lëë xaa kwii kyalbini mal, per como nody xaa lady no lëë noo pkaw.

³⁹Tsigo lëë Jesús kwëb chëb: —Jkady tow, porque ni tu xaa nii xseety lën par kuñ tu kyalntson kyaxty kñeenë naa.

⁴⁰Por meñ nii xtilynidy lëë no, no xlad no.