Mörcos 14:2-69

²Quejtoöya: ―Amo tecasesque ipa yelfetl, para majcamo cana cuejcueyunecö giente.

³Hua iloaya yejuatzi ipa puieblo de Betania ipa ichö Semu öque sa söhuayo. Ompa tlacualutaya cuöc ohuöla sente sohuatl. Quehualecaya sente potixajconetzi de alabastro tli quepeaya pajtle ajfeyoc de nochaja nardo, pateyo lalebes. Quetlajtlapö inu potixajconetzi de alabastro hua noche oquemejmelo ipa tietzonteco.

⁴Hua seque cuajcualönque. Quejtojque entre yejua: ―¿Tli para oniempole ini nönca pajtle de nardo?

⁵Ini nönca cuale monamacane ca más de yeye sientos denarios tomi hua cuale moxiexeloöne ca tli porubejte. Opiejque cajajuaya inu sohuatl.

⁶Pero Jesús oquejtojque: ―Xejcajcöhuacö. ¿Tlica nenquepasoloa? Ara ca cuale tli niechhualchibele.

⁷Nochepa nenquenpea porubejte nemotzölö. Cuöc nenquenequesque, cuale nenquechihuasque tlin cuale inca yejua. Cache naja amo nochepa nenniechpeasque.

⁸Nönca sohuatl oquechi tli yaja opodiere. Yaja ye quetlölele nocuierpo inu pajtle ajfeyoc de nardo para cuöc notlölpachus.

⁹Melöhuac nemiechelfea, que cöne beletes tlanunutzasque de ini nönca cuale tlamachestelestle ipa noche tlöltecpactle, nuyejque ini nönca lo que tli oquechi ini sohuatl mojtus para quelnömequesque giente de yaja.

¹⁰Entunses Judas Iscariote, sente de inu majtlactle huan ume tiemachtejcöhua, uya intlac jefes de teopexcötzetzi, porque oquenec tietiemacas Jesús inca yejua.

¹¹Cuöc yejua oquecajque, oquepexque pöquelestle. Queprometierojque quemacasque mieleyo. Pos Judas quetiemoöya quiene cuale tietiemacati.

¹²Ipa primiero tunale de yelfetl de pöntzi sin levadura, cuöc quenmejmectiöya calnielojcucone para bentle de pöscua, tiemachtejcöhua tieyelfejque: ―¿Cöne tomonequitea ma tetlapreparörucö para ma xomotlacualte inu tlacuale de pöscua yelfetl?

¹³Yejuatzi quentitlanque unte de tiemachtejcöhua. Quemelfejque: ―Xeyöcö ipa puieblo hua nemiechnömeques sente tlöcatl tli quebica sente öcumetl ca ötzintle. Xectocacö.

¹⁴Hua cöne calaques, xequelficö inu chöne: “Maestro quejtulo: ¿Cönenca cale cöne nejcuös inu tlacuale de pöscua yelfetl ca nomachtejcöhua?”

¹⁵Pos yaja mismo nemiechejtetis sente bieye cuörto icpac cale que oyes listo hua tli quepeas noche tli tecnesesitörusque. Ompa xetlamömanacö para tejua.

¹⁶Entunses uyajque tiemachtejcöhua hua ocajcalajque ipa puieblo. Oqueniextejque san quiene ca quemelfejque. Hua ompa otlamömanque para pöscua.

¹⁷Cuöc ye yohuac oyeya, hualiloac ca inu majtlactle huan ume tiemachtejcöhua.

¹⁸Yehualutaya itlac miesa hua mientras tlajtlacualutaya, oquejtojque Jesús: ―Melöhuac nemiechelfea, que sente de nemejua öque tlacua ca naja niechantrecöruti.

¹⁹Yecuöquenu yejua ocaseque tequepachule hua tieyelfiöya cara sesen tlöcatl: ―¿Beles naja?

²⁰Hua yejuatzi quemelfejque: ―Icaca sente de nemejua nenmajtlactle huan ume. Icaca yaja öque noca tlapaloa ijtec nocasfiela.

²¹Pues naja que onochi netlöcatl nemeques san quiene ca tlajcuelulpanca de naja. Pero ¡porube de inu tlöcatl tli niechantrecörus naja que onochi netlöcatl! Cache cuale uyesquea para yaja ma ayec tlöcatene.

²²Mientras tlajtlacualutaya, Jesús ocönque pöntzi, hua queteochijque. Quecojcotunque hua quenmacaque. Oquejtojque: ―Xecönacö. Nönca pöntzi ica nocuierpo.

²³Yecuöquenu ocönque sente bölso hua tietlasojcömacheliluc. Oquenmacaque. Entunses oconique innochtie de inu bölso.

²⁴Oquemelfejque: ―Yaja ini *ica noyeso. Necmaca para ma mochihua sente acuierdo entre Deus hua tlöca. Nocuierpo yesquisas por impampa meyactie giente.

²⁵Melöhuac nemiechelfea que ayecmo quiema neconis iöyo de uvas hasta ipa inu nieca tunale cuöc neconis inu vino yancuec tli onca cöne tlamandöruruteca Deus.

²⁶Hua ocuejcuicoac sente cuicatelestle, hua oquejquixoatie, bejbiloac ipa tepietl de los Olivos.

²⁷Hua quemelfejque Jesús: ―Noche nemejua nenbetzesque ipa tlajtlacule nopampa. Pos tlajcuelulpanca: Nejcocus calnielojpexque hua calnielojte mocuasemanasque.

²⁸Cache sötiepa cuöc neyulebes, neyös delante de nemejua hasta pa estado de Galilea.

²⁹Yecuöquenu Piero tieyelfe: ―Mös noche ocseque betzesque, cache naja amo.

³⁰Hua quelfejque Jesús: ―Melöhuac temetzelfea, que öxö mismo ipa ini nönca yohuale, antes tzajtzes canteliex ujpa, taja tequejtus yexpa que amo teniechixomate.

³¹Cache yaja oquesequiro lalebes tlajtlajtoöya: ―Mös cana nemeques ca tejuatzi, pero amo temetzmonegörfis. Innochtie ejqueu nuyejque quejtoöya.

³²Pos ohuajhualbiloac ipa locör itucö Getsemaní. Quemelfejque tiemachtejcöhua: ―Xomotlölicö necö, mientras naja notlötlajtiti.

³³Hua quenbicaque Piero, Jacobo, hua Xohuö. Opiehualuc netequepachuloöya lalebes, hua lalebes quiene oquechi tieyulo.

³⁴Quemelfejque: ―Lalebes meyac tequepachule quepea noölma, hasta sana nemequesneque. Xomocheacö necö hua xetlachixtacö.

³⁵Entunses obiloac cache adelönte. Netlancuöquetzaluc ipan tlöle, hua netlötlajtiluc mach tlö cuale, majcamo tiepa mochihua pa nieca ura lo que tli mochihuati.

³⁶Quejtuloöya: ―Abba, noTajtzi, para tejuatzi noche sösantle cuale mochihuas. Xomojcuenele nönca bölso de tietunie majcamo niechtocöro. Pero majcamo mochihua tli naja necneque tlöcamo tli tejuatzi tomonequitea.

³⁷Hua hualiloac hua quenniextiluco cojcochtecate. Quelfejque Piero: ―Semu, ¿tecochteca? ¿Abele tetlachixtas nion sie ura?

³⁸Xetlachixtacö hua xomotlötlajticö, para majcamo nemiechyulmajmötoca Amo Cuale Tlöcatl. Melöhuac toyulo cuejcuesebe, cache tonacayo débil icaca.

³⁹Hua obiloac ocsajpa. Netlötlajtiluc, hua ocsajpa oquejtojque mismo tlajtule.

⁴⁰Cuöc ocsajpa hualiloac, quenniextiluco cojcochtecate porque lalebes cojcochesnequeya. Pos amo quemateya quiene tienönquelisque.

⁴¹Hualiloac ca yexpa. Quemelfejque: ―Bieno. Xecojcochecö hua xomosiebicö. Basta ca inu. Ye aseco ura. Xequejtacö. Pos naja que onochi netlöcatl öxö niechtiemöctisque inmöpa tlajtlaculteque tlöca.

⁴²Xemiehuacö. Teyabe. Öque niechtiemöctis ye ompabitz.

⁴³Cuöc yejuatzi oc tlajtlajtulutaya, nima ohuöla Judas, sente de inu majtlactle huan ume tiemachtejcöhua de Jesús. Ca Judas ohuölajque meyac giente ca espödas hua cuabetl. Huölajque porque jefes de teopexcötzetzi hua tlamachtiöneme de teotlajtule hua biebentzetzi cualentitlanque.

⁴⁴Antes que Judas tietiemöcte Jesús, quemelfe inu tlöca de sente sieñas. Oquejto: ―Öque necpetzus, yaja inu icaca. Xecasecö hua xecbicacö sin fölta.

⁴⁵Pos yaja ohuöla, nima omopacho tietlac. Tieyelfejque: ―NoTiemachtejcötzi. Hua tiepetzo.

⁴⁶Yecuöquenu yejua tieaseque hua tiebicaque.

⁴⁷Pero sente de tli ompa ijcataya quequexte iespöda. Conmacac itlatequepano de tlajtojcöteopexque. Pos quetejtequele inacas.

⁴⁸Onöhuatihuac Jesús, quemelfejque: ―¿Nenhualiejque ca espödas hua ca cuabetl quieme cana cuntra sente ichtejque para nenniechasesque?

⁴⁹Cöra tunale neyeya nemotlac netlamachtiöya ipan teopantle. Pos amo nenniechaseque. Pero ejqueyi moneque para ma mochihua tli tlajcuelulpanca ipa teotlajtule.

⁵⁰Entunses tiecöjtiejque noche tiemachtejcöhua. Chucholojque.

⁵¹Pero sente peltuntle tietocaya. Motlaquentejtöya sa ca sente bieye tatapajtle. Pos yejua caseque.

⁵²Pero yaja quencöbelejtie tatapajtle. Cholojtie xipetztec.

⁵³Entunses tiebicaque Jesús itlac tlajtojcöteopexque. Mosentlölejque ca yaja noche jefes de teopexcötzetzi ca tiehua biebentzetzi hua tlamachtiöneme de teotlajtule.

⁵⁴Pos Piero tietocaya bejcateca hasta ocalac ipa pötio de ichö de tlajtojcöteopexque. Ompa Piero yehuataya ca yejua de guardia. Mototunejtaya itlac tletzintle.

⁵⁵Hua inu jefes de teopexcötzetzi ca tiehua noche inu junta quetiemoöya arasu cuntra Jesús para tiemectisque. Pero amo yetla queniextiöya.

⁵⁶Porque meyactie quejtoöya istlacatlajtule cuntra yejuatzi pero imistlacatlajtul amo oyeya de acuierdo.

⁵⁷Entunses majcojque seque. Yejua istlacatque cuntra yejuatzi. Quejtojque:

⁵⁸―Tejua otejcajque cuöc oquejto: “Pos naja necxexetunes ini nönca teopantle tli tlöca conchejchijque, hua ipa yeye tunale necajcoques ocsente tli amo yeca tlöcatl oquechejchi”.

⁵⁹Pero nimpor ejqueu amo oyeya de acuierdo tli quejtojque.

⁶⁰Yecuöquenu tlajtojcöteopexque omoquetz nepantla. Tietlajtlane Jesús, otieyelfe: ―Pos ¿amo yetla tenöhuates? ¿Tlininu noso quemelöjcöpujtecate de taja?

⁶¹Pero yejuatzi quetzacualoöya tiecamac, hua amo tli quejtuloöya. Tlajtojcöteopexque ocsajpa tietlajtlane, otieyelfe: ―¿Taja tecaca teCristo, tetieConietzi Deus Bendito?

⁶²Jesús quelfejque: ―Naja necaca. Nenquejtasque que naja tli onochi netlöcatl neyehuatas ca tiemöyecmö de Deus öque quepealo checöhualestle. Naja que onochi netlöcatl nehuölös de elfecac ica mextle.

⁶³Entunses tlajtojcöteopexque quetzotzomotz itlaquie. Oquejto: ―¿Tli para cache tecneque öque tiechmelöjcöpubelis?

⁶⁴Ye nenquecajque quiene checuatlajtoa cuntra Deus. ¿Tli nenquejtoa? Pos innochtie quenejque ma mecoa. Quejtojque que quemeresieruroöya mecoas.

⁶⁵Yecuöquenu seque opiejque chejchejcha tiepa. Tieixtlapachojque hua tiemacaque checöhuac. Tieyelfiöya: ―¡Xetlayulepante! Hua tietiemacaque ca inu guardia, hua yejua tiecamatlatzcuepuniöya.

⁶⁶Cuöc Piero oyeya tlölpa pa pötio, ohuöla sente sohuatl itlatequepano de tlajtojcöteopexque.

⁶⁷Cuöc oquejtac Piero mototunejtaya, quetztaya hua oquejto: ―Taja nuyejque oteyeya ca inu Jesús de puieblo de Nazaret.

⁶⁸Pero yaja oquenegöro, oquejto: ―Amo nequixomate nimpor amo necmate tli tequejtoa. Oquis ca queyöhuac cöne queyöhuatientle. Yecuöquenu otzajtzec canteliex.

⁶⁹Inu sohuatl tli tlatequepanoöya oquejtac Piero ocsajpa. Opie quemelfiöya tli ompa oyejyeya: ―Ini nönca de yejua icaca.