SAN MARCOS 14:2-69

²Nɛ bin 'yɛ̨mzɛhɛ ʉ: ―Hinga gue a ra pa ra dąmpɛti gam bɛnthʉ nɛ xøhma din cuɛ yʉ ją'i, bi 'yɛ̨n ʉ.

³Nɛ mi 'bʉpʉ ra Jesús bʉ ja rá ngu ra Simón bʉ ja ra hnini Betania. Gue'a ra Simón mi hɛ̨mb ra t'axca'ya 'bʉ mam 'bɛt'o. Nɛ nu'bʉ mi sihmɛ bʉ ra Jesús bi zøpʉ n'da ra xisu i tu n'da ra xito nt'øt'e ngue ra do'yaxi, mi po ra 'yɛ̨thi ɛ̨mmɛ yʉman'u a, nɛ xʉn ngu di muui a. Bi xɛcpa rá nde bʉya nɛ bi naspa rá yą ra Jesús.

⁴Nu'ʉ 'da mí 'bʉpʉ, bin cuɛ ʉ bʉya nɛ bi 'yɛ̨n ʉ: ―Hanja bim 'bɛtho ra 'yɛ̨thi nɛ xʉm hmadi di muui.

⁵Mi sä xtá 'bä xtin t'un yʉ hyoya a hyu ciɛnto rá muui a ra 'yɛ̨thi, bi 'yɛ̨n ʉ. Nɛ bi numan'ʉ ra xisu ʉ.

⁶Nɛ nu ra Jesús bi 'yɛ̨mp'ʉ: ―Hanja guín jahʉ bʉ, o guidi pahmbʉ ra xisu nguetho xʉn ho bi 'yørcä na.

⁷Nu'ahʉ thocpa thoho gam 'bʉhmbʉ yʉ hyoya nɛ hønt'a go ma pa da zä gui fäxhʉ ʉ. Pɛ nugä hinga thocpa thoho dam 'bʉhmbʉ.

⁸Bi 'yørca ra xisu a mi sä da 'yøt'e, bi hoga ma ngøc'yɛ̨i ngue da t'ägä bʉ ja ran 'yägui.

⁹Majuąni dí xi ahʉ gue hønbʉ go hapʉ da hman ran ho ma'da'yo gätho na ndoho ra ximhäi, nɛhna bi 'yørca ra xisu da hman na, 'dahma nɛ'a da fɛ̨n a, bi 'yɛ̨n'a ra Jesús.

¹⁰Nu'a ra Judas Iscariote bʉya, ngue'a n'da yʉ́ xädi ra Jesús, bi mba bʉ 'bʉh yʉ ngʉrpa mbäją bi xifi di däp'a ra Jesús.

¹¹Nɛ bi hyu yʉ́ mbʉi ʉ yʉ ngʉrpa mbäją nɛ bi xifi di un ra mbɛti. Nɛ bi mbenc'a ra Judas bʉya mi honi jąm'bʉ di dä a ra Jesús.

¹²Nu rá mbʉdi ra pa ra dąmpɛti ngue ran dąbaxjua i ts'i ra thuhmɛ hin'yʉ rá ixi, nɛ i ho ra t'ʉdɛ'yo. Nɛ nu yʉ́ xädi ra Jesús bi 'yɛ̨mbi: ―Hapʉ guí ndeje ga hoje ran ts'ihmɛ ra mbaxjua ga sihʉ, bi 'yɛ̨n ʉ.

¹³Nɛ nubʉya bi xi ʉ yoho yʉ́ xädi: ―Ni mbɛ bʉ ja ra dąhnihni Jerusalén, nɛ nu'bʉ gá nuui bʉ n'da ran 'yohʉ i tu n'daxaro ra dehe gui tɛnui bʉ da zøni.

¹⁴Nɛ nu'bʉ gá sømhbʉ gui 'yɛ̨nui a ra mɛngu bʉ: “Nu'a ra Hmu bá pɛngähe ngue ga än'nahe hapʉ i ja a ra cuarto ngue ga sihe ran ts'ihmɛ ra mbaxjua,” gui 'yɛ̨nui.

¹⁵Nɛ nu'a bʉya da 'yut'aui n'da ra cuarto i ja bʉ magąts'i xʉn ndoho nɛ mahoqui. Guepʉ ja gui hocui bʉ a ran sihmɛ ga sihʉ, bi 'yɛn'a ra Jesús.

¹⁶Bi mba yʉ́ xädi bʉya nɛ bi zøm bʉ ja ra dąhnihni Jerusalén nɛ bi dįm bʉ gätho 'bɛ'a xi sifi. Gätho bi hocpʉ 'bɛ'a da zi bʉ 'bʉ bin de, nɛ bi mbeng bʉ 'bʉh ra Jesús bʉya.

¹⁷Nu'bʉ min de ts'ʉ, bi mbähä ra Jesús 'dɛ'mayoho yʉ́ xädi bʉya.

¹⁸Gätho bin sihmɛ ʉ. Nɛ nu ra Jesús bi 'yɛ̨mp'ʉ: ―Majuąni dí xi ahʉ, dí sihmɛhʉ ua n'da gue di dägä, bi 'yɛ̨mp'ʉ.

¹⁹Nu yʉ́ xädi bʉya bi du yʉ́ mbʉi, n'da ngu n'da bi 'yänni: ―Ha guecä, bi 'yɛ̨n'ʉ.

²⁰Nɛ nu'a ra Jesús bi dąt'ʉ: ―Go gue'a n'da gue gue'ahʉ guí 'dɛ'mayoho ahʉ gue dí comh ma mbohi'be.

²¹Majuąni nugä ngue dán ją'igä ua ja ra ximhäi, ga tugä tengu nt'o't'i nanguecä. Pɛ í huɛ̨hi maha a ran 'yohʉ ngue di dägä. Man'da xʉn ho 'bʉ hin xtim 'bʉ a, bi 'yɛ̨n a ra Jesús.

²²Gätho na sihmɛ ʉ bi hyąc man'da ra hmɛ ra Jesús, bi un ra jamadi Oją, bi xɛni nɛ bi darpa yʉ́ xädi bʉya. ―Dami sihʉ na. Guehna nam bøn'a ma ngøc'yɛigä na, bi 'yɛ̨mp'ʉ.

²³Nɛ bi dɛc'a ra vaso mi po a nząi mi si ʉ. Bi un ra jąmadi Oją nɛ bi un'dʉ bʉya, bi zi n'da ngu n'da ʉ.

²⁴―Guehna tengu 'bʉ ma jigä na, i øt' ra 'da'yo nhogui, dim fäni dí yąnba yʉ́ te yʉ ją'i 'bʉcua ja ra ximhäi.

²⁵Majuąni dí xi ahʉ, hin ga si man'da ra gui uva ja gue'bʉ bi zøn ra pa ga si ma'da'yo bʉ di manda rá ts'ɛdi Oją, bi 'yɛ̨n a ra Jesús.

²⁶Nɛ bin tu a n'da rá thuhu Oją ʉ bʉya. Bi bøm bʉ mi sihmɛ ʉ nɛ bi mba bʉ ja ra nyuni Olivos.

²⁷Nɛ nu ra Jesús bi 'yɛ̨mp'ʉ yʉ́ xädi: ―Nu'ahʉ dí pącä ngue gui 'dahmbʉ, gui sogahʉ nán xui ya, tengu nt'o't'i bʉ ja rám hman Oją i ɛ̨na: “Ga ho ra mbändɛ'yo nɛ din 'uɛ̨xt'ʉ yʉ́ dɛ'yo,” i ɛ̨m bʉ ja rá t'ohni, bi 'yɛ̨na.

²⁸Pɛ nu'bʉ dá thąmbɛ̨nigä dan tįmhbʉ bʉ Galilea, bi 'yɛ̨mp'ʉ yʉ́ xädi a ra Jesús.

²⁹Nu'a ra Pedro bi 'yɛ̨n'a: ―Madague a gätho da 'dah ya 'da, pɛ nugä hin ga soc'i'i.

³⁰Nu ra Jesús bi dą'a bʉya: ―Hąha, dí pacä 'bɛ'a gui 'yøt'a ra xui jabʉya, ná hyundį xqui cøngä 'bʉ bi mbah ná yondį ra øni, bi 'yɛ̨n a.

³¹Pɛ nu'a ra Pedro man'da nts'ɛdi bi 'yɛ̨n'a: ―Nugä hin ga cøn'a i madague'bʉ 'darpʉ ga tuui, bi 'yɛ̨mbi. Nɛ 'da'angu bi ma gätho ʉ mi'da yʉ́ xädi bʉya.

³²Nɛ bi yʉrpʉ ja ra nuądøni Getsemaní guepʉ ja ra nyuni Olivos. Nu ra Jesús bʉya bi 'yɛ̨mp'ʉ yʉ́ xädi: ―Hyuhmbʉ ua gätho ahʉ, 'bɛ dán yągä'be Oją ua nan jongua ts'ʉ, bi 'yɛ̨n'a.

³³Nɛ nubʉya bi zixa ra Pedro, nɛ ra Jacobo, nɛ ra Xuua. Nɛ nu ra Jesús ɛ̨mmɛ bi hyundumbʉi nɛ bin su.

³⁴Nɛ bi 'yɛ̨mp'ʉ: ―Ɛ̨mmɛ tu ma mbʉi, ɛ̨na da hyog ra dumbʉi. Gui cohmbʉ ua nɛ gan äthąhʉ, bi 'yɛ̨mp'ʉ.

³⁵Nɛ bi mba bʉ njom bʉ ts'ʉ. Bin dąnyahmu bʉ ja ra häi bin yąui Oją, gue'bʉ da zä hin da nu ran ʉnbi a da nu.

³⁶Nɛ bi 'yɛ̨na: ―Ma Ta i, hin te guí hɛ̨mbi, gätho da zä gui 'yøt'e. Dami 'uegä a ran ʉnbi. Pɛ hin dín nde gue gue'a ma pähä zɛhɛ ga øt'ä pɛ gue'a go guí nde da t'øt'e, bi 'yɛ̨na.

³⁷Nɛ bi mbeng bʉ xi go ʉ hyu nɛ bi 'yɛ̨mp'a ra Pedro: ―Hague grá Simón, ha guí ąha. Ha hingui sä xquin äthą n'da ora.

³⁸Damin äthąhʉ nɛ gui 'yäfʉ Oją ngue gui sɛrbahʉ 'bɛ'a di bɛ̨n'nahʉ ra zįthu. Nu rá mbʉi n'da ja ra pähä nangue ran ho, pɛ nu rá ngøc'yɛi n'da xʉn güent'i a, bi 'yɛ̨n a ra Jesús.

³⁹Nɛ bi mbeng mahøn'a ra Jesús bin yąui Oją nɛ guexta'a bi xifi.

⁴⁰Nɛ nubʉya bi mbeng bʉ bá co ʉ hyu nɛ bi dįm bʉ i ąha nguetho ɛ̨mmɛ mí ndet'ąha ʉ. Janangue nu'bʉ mi zo ʉ hingui pądi 'bɛ'a dí dą ʉ.

⁴¹Ná hyųndį bán yąui Oją, 'bʉ mam bá pengbʉ bá co ʉ hyu, nɛ bi 'yɛ̨mp'ʉ: ―Ąhmahʉ ya, damin säyahʉ ya, bi 'yɛ̨n'a. Nuya bi zøn ra ora ngue da mba ma dägä bʉ 'bʉh yʉ ts'om'bäi, nugä ngue dán ją'igä ua ja ra ximhäi.

⁴²Dami ndanshʉ, ga mbähä dan c'athʉ a di dägä, ya häntua, bi 'yɛ̨mp'ʉ yʉ́ xädi a ra Jesús.

⁴³Gätho ná yąhʉ yʉ́ xädi 'bex bi zøm bʉ ra Judas, gue'a n'da rá xädi. Nɛ xʉn ngu yʉ ją'i bi zix'a, mi hą yʉ́ juai nɛ yʉ ts'ąt'ɛgui. Nɛ gue'ʉ yʉ́m 'bɛhni yʉ ngʉrpa mbäją nɛ yʉ xänbate niją nɛ yʉ dąc'yɛi.

⁴⁴Nɛ nu'a ra Judas ya xí xi ʉ: “Nu'a ga sʉspa rá 'yogu gue a ra Jesús a, 'bex guim bɛnthʉ bʉya nɛ gui sixhʉ, nɛ hin gui thøhmbʉ,” xi 'yɛ̨mp'ʉ min 'yohʉ.

⁴⁵Janangue a nu'bʉ mi zøpʉ mi 'bäh ra Jesús: ―Xänbate i, xänbate i, bi 'yɛ̨mbi. Nɛ bi zʉspa rá 'yogu.

⁴⁶'Bex bi bɛnt pʉya.

⁴⁷Nɛ 'bex bi c'o'ts' rá juai a n'da min 'yohʉ ra Jesús nɛ bi zɛcpa rá zagu rá 'yɛ̨hɛ ra dąmbäją.

⁴⁸Nɛ nu ra Jesús bi 'yɛ̨mp'ʉ bi bɛnt'i: ―Ha guí ɛ̨mhbʉ drá bɛ̨gä ngue guá hąhʉ ni juaihʉ nɛ ni zahʉ ngue gui bɛntcahʉ.

⁴⁹Gätho yʉ pa dám 'bʉhmbʉ, dá xän'nahʉ bʉ ja ra dąnija nɛ hin gá bɛntcahʉ bʉ. Pɛ ja xi jabʉ thoho, ngue din ja a nt'o't'i bʉ ja rám hman Oją ngue mi hma din ja, bi t'ɛ̨mp'ʉ yʉ́m 'bɛhni yʉ mbäją.

⁵⁰Pɛ nu'ʉ yʉ́ xädi bʉya gätho bi 'dagui, bi zopʉ a ra Jesús.

⁵¹Hønt'a n'da ra ts'ʉnt'ʉ bi dɛn'na 'bʉ mi ts'ix a ra Jesús, dim pät'a ra the'bø't'e, nɛ mí ɛ̨n ʉ nɛ'a xtám bɛnt'a.

⁵²Pɛ nu'a hønt'a ra the'bø't'e bi bɛntpa a, nɛ bi 'dah pʉya nɛ bin 'yo mánxi bʉ ní mba.

⁵³Nu'bʉ mi mba ma dä bʉ 'bʉh ra dąmbäją, bim pɛti ʉ ma ngurbihe ngue yʉ ngʉrpambäją nɛ yʉ dąc'yɛi nɛ yʉ xänbate niją.

⁵⁴Nɛ nu ra Pedro bin tɛt'i, i 'bɛjua thoho bʉ ni mba, gue'bʉ go mi zøm bʉ mbo rá mbä't'i rá ngu ra dąmbäją, nɛ bi hyuhmbʉ bʉ ʉ yʉ asmayo niją, bin tąspihʉ ʉ.

⁵⁵Nu yʉ ngʉrba mbäją nɛ gätho ʉ mi'da i øt' ran juąnbate, mi honi to'o da ma xʉn ho 'bɛpʉ dí yąp'a ra Jesús ngue da hyo, nɛ madague'a xʉn ngu ʉ bin yą pɛ xinga n'da ʉ bi ma njuąntho.

⁵⁶Xʉn ngu bi man yʉ fɛhni pɛ him bin tįn yʉ́m hma.

⁵⁷Xø bi ndants'ʉ 'da mahøn'a bi zänba man'da ra fɛhni ʉ, nɛ bi 'yɛ̨n ʉ:

⁵⁸―Nuna ran 'yohʉ bi ma nɛ bi 'yɛ̨na, “Nugä ga yø't' ra niją ua, nt'øt'e yʉ́ 'yɛ yʉ ją'i, nɛ nu'bʉ ná hyupa ga høcä n'da ngue hinga nt'øt'e yʉ́ 'yɛ yʉ ją'i,” bi 'yɛ̨nna ran 'yohʉ, nɛ nugähe dá øhmbe 'bʉ mí 'yɛ̨nna, bi 'yɛ̨m bʉya.

⁵⁹Pɛ xinga gue'ʉ bin tįn ʉ yʉ́m hman ʉ.

⁶⁰Pɛ nu ra Jesús bin hɛ̨tho. Njo'o to bi dąti.

⁶¹Nu'a ra ngʉrpa mbäją bi 'yän mahøn'a: ―Ha gue'e grá Cristo. Ha gue'e rá Ts'ʉnt'ʉ i Oją nuįxte rá ts'ɛdi.

⁶²Nu ra Jesús bi dąti: ―Guecä, nɛ guin nujʉ, nugä ngue dán ją'igä ua ja ra ximhäi, ga com'be rá ts'ɛdi Oją madą rá ts'ɛdi. Nɛ guin nujʉ 'bʉ bá pengä, ba ɛ̨cä bʉ ja yʉ güi, bi 'yɛ̨n'a ra Jesús.

⁶³Pɛ nu'a ra dąmbäją bi dʉnsɛ rá pahni, ɛ̨mbi hingui ɛ̨spa Oją ra Jesús nangue a bi ma. Nɛ bi 'yɛ̨m bʉya: ―Ya hin ga homhbʉ mi'da yʉ testigo,

⁶⁴nɛ dá øhmbʉ ya ngue hingui ɛ̨spa Oją na ran 'yohʉ. 'Bɛ'a guí mamhbʉ ga ørpahʉ ya, bi 'yɛ̨n a ra dąmbäją. Nɛ gätho 'da'angu bi man ʉ ngue di un ran ts'ɛmbi ngue da hyo.

⁶⁵Nu'ʉ 'da bʉya bi zox'a ra Jesús, nɛ bi gorpa rá dä, nɛ bi mbɛ'mi nɛ bi 'yɛ̨mbi, “Grá pøngahyą, man ya, to'o bi mbɛp'a'i,” bi 'yɛ̨n ʉ. Nɛ nu yʉ asmayo bʉ niją ɛ̨mmɛ bi mbɛmp'a rá hmi.

⁶⁶Nu'bʉ mim 'bäpʉ ra Pedro bʉ mbo ra mbä't'i, bi thopʉ n'da ra xisu ngue rá 'yɛ̨hɛ ra dąmbäją.

⁶⁷Nɛ bi nu'a ra Pedro din tąspi, bi hyɛ̨'t'i nɛ bi 'yɛ̨mbi: ―Ɛ̨na nɛ'e gmín 'yohʉ ra Jesús ra mɛngu bʉ Nazaret, bi 'yɛ̨mp'a ra Pedro.

⁶⁸Pɛ nu'a ra Pedro bin cøni. ―Hin dí pądi 'bɛ'a nam bøn'a guím ma, bi 'yɛ̨n a ra Pedro. Nɛ bi 'uegue bi mba bʉ hänt ra goxthi. Nɛ bi mbah ra tamfø bʉya.

⁶⁹Ná ya'a ts'ʉ bʉya xø bi thopʉ ra 'yɛ̨hɛxisu bʉ 'bäh ra Pedro, nɛ bi 'yɛ̨mp'ʉ 'bʉpʉ: ―Nuna ran 'yohʉ, min 'yohʉ ʉ mi tɛn'na ra Jesús.