Luuka 23:3-26

³Pilaatu landii mo, wi'i: «Hara ko an woni lanɗo Yahuudiyanke'en?» Iisaa jaabii mo, wi'i: «Ko wano wi'irɗaa non.»

⁴Onsay Pilaatu wi'i hooreeɓe *yottinooɓe sadaka ɓen e jamaa on: «Mi yi'aali hujja woo ko oo neɗɗo jogoree!»

⁵Kono ɓe catii e ɗun, ɓe wi'i: «Himo lowirde jamaa on jannugol ɓe. O fuɗɗii gila ka diiwal Jaliilu, o rewi e diiwal Yahuuda ngal fow haa o hewtii ɗoo jooni.»

⁶Ɓay Pilaatu nanii ɗun, o landii si oo neɗɗo ko mo Jaliilu.

⁷Ɓay kanko Pilaatu o andii wonde Iisaa ko e laamateeri *Heroodu ndin jeyaa, o feƴƴini mo ka Heroodu. Tawi e ɗen balɗe ɗon, on no Yerusalaam.

⁸Ɓay Heroodu yi'ii Iisaa, ɗun weltini mo fota. Tawi gila neeɓi himo faalanoo mo yi'ude sabu ko o nanaynoo no wowlee fii makko kon. Awa kadi himo faalanoo yi'ude himo waɗa kaawakeeji moƴƴi goo.

⁹O landii mo haa juuti, kono Iisaa jaabaaki mo fus.

¹⁰Tawi hooreeɓe yottinooɓe sadaka ɓen wondude e jannooɓe fii Sariya on ɓen no ɗon, ɓen no tooɲa mo tooɲe sattuɗe.

¹¹Heroodu e suufaaɓe mun ɓen kadi jali mo aybini. Onsay o ɓorni mo dolokke fotuɗo, o nattani mo Pilaatu.

¹²Nden ɲande tigi Pilaatu e Heroodu ɓen ayrunooɓe welditi.

¹³Ontuma Pilaatu nodditi hooreeɓe yottinooɓe sadaka ɓen e yeesooɓe ɓen wondude e jamaa on,

¹⁴o wi'i ɓe: «On addanii lan oo neɗɗo, on wi'ii ko kanko woni murtinde jamaa on. E hino mi landike mo e tawnde mon, mi yi'aali dalil woo e hoore oo neɗɗo ko tooɲiron mo.

¹⁵Awa Heroodu kadi-le wano non, ko fii o artiranii en mo. Awa-le oo neɗɗo waɗaa hay huunde ko foddi e wareede.

¹⁶Jooni mi donkinay mo, mi accita.»

¹⁷Tawi no farlii mo kanko Pilaatu, juldeere bee accitangol ɓe nangaaɗo goo.

¹⁸Onsay ɓe fow ɓe sonki, ɓe wi'i: «Waree oo ɗoo! Accitanon men Barabaasi!» (

¹⁹Tawi on-le ko sokiraa, ko sabu gere no waɗunoo ka saare e waru hoore.)

²⁰Pilaatu yewti ɓe fahin, ɓay hari no e fondo makko accitugol Iisaa.

²¹Kono hiɓe sonkaynoo, wi'a: «Fempee mo! Fempee mo!»

²²Pilaatu wi'i ɓe tammun: «Hara ko honɗun oo bonni? Min mi yi'aali dalil woo ko oo wariree. Jooni mi donkinay mo, mi accita.»

²³Kono ɓe catii e ɗun e hoore sonko njano, hiɓe toroo yo o fempe. Ngon sonko maɓɓe fooli mo kanko Pilaatu.

²⁴Pilaatu jaɓani ɓe faale maɓɓe on.

²⁵O acciti on mo ɓe torii mo fii mun, ɗun ko oo sokiranooɗo fii gere e waru hoore, o waɗi Iisaa faale maɓɓe on.

²⁶Fewndo ɓe naɓaynoo Iisaa fii warugol mo, ɓe hendii goɗɗo mo Sirenii iwaynooɗo ngesa, on no wi'ee Sim'uunu. Ɓe rondi mo *leggal altindiraangal ngal, o iwtiri ɓaawo Iisaa.