Luke 22:56-65

⁵⁶Kwey warrkenh anyentel alhengk-aremel angkew ingwer-rnemew, “Artwa nhenhan Jesus-ew apelty arrpemarl.”

⁵⁷Ra irrtywerremel angkew, “Rwengk, atha renh iterl-arey-angenh.”

⁵⁸Ikwer-penh-antey ingwerel-anem alhengk-arew, “Ngan kwertengerl Jesus-wenh arrpemarl.” Peter-el tyernew, “Rwengk, ayeng-weny!”

⁵⁹Ingwer-ingweran ingwerel-anem renh alhengk-arew. “Ya, artwa nhanyem inngarl alhenh ikwerel-arleng. Ran angkeyel apmer Galilee-areny-rnem-apeny. Ranap ikwer-areny arrpemarl, Jesus-apeny.”

⁶⁰Ran tyernew, “Arrangkw! Atha iterl-arey-angenh, ngarl angkeyel-angkwarr!” Rarl angkenh-angkwarr, tywek-tywekan arlkew-anem.

⁶¹Kwen-they Jesus-elan renh artepang arew. Peter-el iterl-arew, rarl arrwekel-antey ilew, “Tywek-tywek arlkeyew-alenty rlengk atemwengkel-antey, irrpety-inger nga ilelheyenh, ntwan ayenh iterl-arey-angenh.”

⁶²Rap akwenterl-alhew, tyerrelhenhey-alhew aketh-warl-anem keyt-angkwarr. Ra artewentyel artnenh-anem, rarl arrwekel-antey angkew-penh, ra renh iterl-arey-angenh.

⁶³Artwa ahawarr-rnemel Jesus antwerrkenh, rernemap arrkentelhelemel renh atwenh.

⁶⁴Rag-el annga atherran renh artew ayernemel, “Ntwarl arraty-antey iterl-areyel. Ilelha anewantherr. Angwenhel ngenh atwewan?”

⁶⁵Rernem alakenhan ayernemel-antey kwanthenh renh akwetyemel.