Lukas 22:11-32

¹¹‘Dinob na kami ni Mistro, te itan mi kan ya lugar na panganan mi ta pamurab mi ta Simana in,’ kummuy,

¹²a ituldu na sangaw ya dakal na silid ta utun, a yen sangaw ya pangiparanan muy ta pamurab tam,” kun ni Hesus tekid.

¹³A umange kid, a naita da hala ya kuman na nebar ni Hesus tekid, a neparan da ya pamurab da ta Simana.

¹⁴A sangaw ta nekaparan na ngamin a nakiatubang ig Hesus ikid na mafulu duwa kiden ituldu na.

¹⁵A tekid para la nagkakan a naguhohug i Hesus. “Pake ikayat ku ta magaatubang kitam ta ayanin, te awena para la dumatang na zigat kin.

¹⁶Ammi awek na sangaw makiatubang tekamuy ta isin na pamurab addet ta sa nedulot ya ngamin pagbalinan na ta pagturay na Namaratu ewan,” kunna.

¹⁷A sangaw nagibbal ta paginuman na binarayang kapye na nakimallak, a sangaw negawat na ta ituldu na kiden. “Ye, sa uminum kanan ta isin,

¹⁸ammi teyak, awek sangaw uminum ta kumanin abat ta pagayayat tam sangaw ta pagturay Namaratu ewan,” kunna.

¹⁹Kabalinan na kumanen a nagibbal hapa ta tāhukal na pan kapye na nakimallak ha. A sangaw ginadgadwa na ya pan en, a nesaned na tekid. “Kanan muy yan, te panadamdaman muy teyak, te ye-yan ya barikin nga isagapil ku gafu tekamuy,” kunna.

²⁰A ta nekabalin na nepamuhab da a inibbalan na ha ya paginuman na binarayang kapye na neatad tekid, “Ye-yan ya panadamdaman muy ta bagu en tulag na Namaratu tekamuy gafu ta dagak nga magarut sangaw ta gafu tekamuy.

²¹A itta hapa ta lamesa in ya mangitalaba sangaw teyak,

²²te mappya ta mapapasi ya Tolayin taga Langit ta kuman na nekari na Namaratu ewan, ammi kakallak sangaw ya mangitalaba in tentu,” kunna.

²³A nagimpopohutan da hapa am inya panaw tekid ya mangitalaba sangaw tentu.

²⁴A sangaw nakidibati hapa ya ituldu kiden ni Hesus, te nagingfulfulatan da am inya tekid ya pinakadakal da.

²⁵Ammi nedangagan na kid ni Hesus, a pake tinabarangan na kid. “Amu muy ya gagangay na ari na Hentil kiden ta ikwenta da ya iturayan da kiden ta kuman na tagabu da, a ingagan da hapa ya bari da ta mangikerutan.

²⁶Ammi awemuy mina parigan yen kid, te ya kadakalan muy a magbalin mina ta kaassangan muy ikid na magserbi en tekamuy.

²⁷Ta kuman na uray na tolay a intu dakdakal ya imatuttuden mangan ammi ta mangiatubang ta kanan na. Ammi mappya ta iyak ya parigan muy te itta yak sin tekamuy ta kuman na mangiatubang ta kanan.

²⁸“Mappya te ikamuy ya kanayun nehulhulun teyak ta ngamin kiden zigat ken.

²⁹A ya neatad ni Damakewan teyak ta iturayan ku a yen hapa ya isipat ku tekamuy,

³⁰petta ikamuy hapa sangaw ya makiatubang teyak ta lamesaken ta lugar na pagariyan ku. A magtogkok hapa sangaw ya tagtakday tekamuy ta kuman na agtogkokan na ari, petta magibbal kam hapa sangaw ta mafulu duwa kiden tribu na Istralita kiden.

³¹“A iko hapa Simon, a dangagam ya ibar ku teko, te pake ikayat ni Satanas ya mangalap tekamuy, petta paruban na kam sangaw ta kuman na magsap ta aggik,

³²ammi iko ya pake nepakimallak ku petta awena mawakay na pangurug mu teyak. Ammi sangaw am nagbabawi kan ta pagtalekud mu teyak a uffunam hapa ya kabagis mu kiden, petta magsikan hapa ya pangurug da,” kun ni Hesus te Pedru.