Lukas 1:53-66

⁵³Impeyibhibulung din te me meupiya ka impanggutasan wey impaawe din ne ware me inuyanan ka me meyaman.

⁵⁴Ne migbulihan din ka me kabuhalan ni Israil ne suluhuanen din, wey nakasuman-suman sikandin te hid-u rin

⁵⁵diye te ki Abraham wey te langun ne me kabuhalan din te ware egtamanan sumale te insaad din diye te me kaapuan ta.”

⁵⁶Ne mig-ugpe si Mariya diye te ki Ilisabit seled te tatelu ne bulan. Nataman, mig-uli din e diye te kandan.

⁵⁷Ne miggingume e ka timpu ne mig-anak e si Ilisabit wey lukes ka anak din.

⁵⁸Nakarineg ka me sumbaley rin wey ka me karumaan din ne meupiya amana ka Manama diye te kandin ne nahale sikandan langun duma ki Ilisabit.

⁵⁹Te walu e ne aldew ka bate, migpanumbaley sikandan diye te ki Ilisabit eyew te pegtambung te pegtuli te bate. Ne egngaranan dan e perem ki Sakariyas ka bate su igsangey ran e te ngaran te amey rin.

⁶⁰Piru migkahi ka iney rin, “Kene! Huwan ka igngaran kandin.”

⁶¹Ne migkahiyan dan si Ilisabit, “Piru ware ma karumaan nu ne migngaranan te iling due!”

⁶²Ne migtingyasan dan ka amey te bate ne mig-inse, “Nekey-a ka igngaran nu te bate?”

⁶³Ne migbuyu si Sakariyas te egsulatan, ne neinu-inu sikandan su ka insulat ni Sakariyas, “Huwan ka ngaran te bate.”

⁶⁴Ne sahuhune ne nakalalag e si Sakariyas wey indayan din ka Manama.

⁶⁵Ne naaldek ka me sumbaley ran wey nekeempet te langun ne kabubunganan te Hudiya ka guhuren meyitenged te seeye ne neyitabu.

⁶⁶Ka me etew ne nakarineg te seeye ne guhuren, migsuman-suman wey migpein-inseey ke nekey ka katamanan te seini ne bate su ka himenew wey geem te Manama migduma kandin.