Luka 1:21-77

²¹Nba, mɔɔilu tɛrɛ ye Sakariya makɔnɔ la kɛnɛ ma. Alu kɔndafilira ka a masɔrɔn a tun da mɛn yɔrɔ sɛniman kɔndɔ.

²²Sakariya bɔ mɛn kɛni kɛnɛ ma, a ma se kumala ie yɛ. Alu ka a yen ko Sakariya ra fen do yen yɔrɔ sɛniman kɔndɔ, baa a tɛrɛ ye kuma tɔɔmasereyala a bolo le la jama ɲana, kɔni a mɛnda boboya rɔ.

²³Sakariya la baara waati banda tuma mɛn na, a ka kɔseyi a wara.

²⁴A ma mɛn bakɛ wo kɔ, a muso ka kɔnɔ ta. Wo kɔ, Elisabɛti ka karo loolu kɛ a ma bɔ a la wara.

²⁵A ko: «A ragbɛ! Maari ka ko mɛn kɛ n yɛ waati mɛnna, a ka miriya ta ka maloya bɔ n na mɔɔilu ɲana.»

²⁶Elisabɛti la kɔnɔmaya karo wɔɔrɔna, Alla ka mɛlɛka Jibirila kelaya Nasarɛti so la, Kalile mara rɔ.

²⁷A wara se sunkurun do ma ye, mɛn tɔɔ ko Mariyamu. Mariyamu wo tun ma cɛ lɔn fɔlɔ. A mamirani tɛrɛ ye cɛ do bolo la, mɛn tɔɔ ko Yusufu. Yusufu tɛrɛ ye Mansa Dawuda bɔnsɔn de ri.

²⁸Mɛlɛka donda Mariyamu kan ka a fɔ a yɛ ko: «N na tuwali ye i yɛ, ile, barakaden. Alla ye ile fɛ.»

²⁹Tuwali kan wo ka Mariyamu kɔndafili kosɛbɛ. A ma a kɔrɔ lɔn.

³⁰Mɛlɛka ka a fɔ a yɛ ko: «Mariyamu, i kana silan. I la ko ra diya Alla yɛ.

³¹Awa i ri kɔnɔ ta ka dencɛ sɔrɔn. I ye a tɔɔ la ko Isa.

³²A ri kɛ mɔɔba ri. Mɔɔilu ri a fɔ ale ma ko Alla Kɔrɔtaninba Dencɛ. Maari Alla ri a benba Mansa Dawuda la mansaya di a ma.

³³A ri i sii Yakuba bɔnsɔn kun na foo habadan. A la mansaya ti ban fewu!»

³⁴Mariyamu ka mɛlɛka maɲininka wo ma ko: «Wo ri se kɛla di, baa cɛ si ma se n ma fɔlɔ?»

³⁵Mɛlɛka ka a jabi: «Alla la Nin Sɛniman di jii i ma. Alla Kɔrɔtaninba sɛɛbɛ ri birin i kun na. Wo bolo ma, i ye dencɛ mɛn sɔrɔnna a ye den sɛniman de ri, a ri kili ko Alla Dencɛ.

³⁶I badenma muso Elisabɛti ra harijee dencɛ la a la musokɔrɔbaya waati rɔ. Ale tun da jate densɔrɔnbali le ri, kɔni a kɔnɔ karɔ wɔɔrɔna le ten.

³⁷Alla bali ko sa ye.»

³⁸Mariyamu ka jabili kɛ ko: «N ye Maari la jɔn de ri. I ra a fɔ ɲa mɛn ma, Alla ye a kɛ wo ɲa.» Mɛlɛka bɔra Mariyamu wo ɲana le ma ka wa.

³⁹A ma mɛn bakɛ wo kɔ, Mariyamu ka a rabɛn ka a kaliya ka wa so do la Jude mara koyinkɛ yɔrɔ rɔ.

⁴⁰A se mɛn kɛni ye, a donda Sakariya la bon na ka Elisabɛti tuwa.

⁴¹Elisabɛti ka Mariyamu tuwali kan mɛn tuma mɛn na, a den ka a lamaa bakɛ a kɔnɔ rɔ. Wo tuma, Alla la Nin Sɛniman jiira Elisabɛti rɔ.

⁴²Elisabɛti ka a kan nabɔ wo baraka rɔ ka a fɔ Mariyamu yɛ ko: «Alla ra ɲumaya kɛ i yɛ ka tamin muso bɛɛ la. I harijeene den mɛn na, Alla ra ɲumaya kɛ wo fanan yɛ!»

⁴³Elisabɛti ka a fɔ ikɔ tuun ko: «Nde ye mɔɔ su ɲuman de ri fo n Maari na jɛrɛ ra nabɔ n fɛ yan?

⁴⁴I ma a yen? N ka i tuwali kan mɛn tuma mɛn na, n den sewara ka a lamaa bakɛ n kɔnɔ rɔ.

⁴⁵Maari Alla ka mɛn fɔ i yɛ wo lon, i lani a la ko wo ri dafa. Wo bolo ma, muso barakanin de ile ri.»

⁴⁶Mariyamu ka a ko: «N ye Maari bonyala n solɔmɛ rɔ.

⁴⁷N nin da sewa ka ɲaalen n Kisiba Alla ko rɔ.

⁴⁸A sɔnda ka a janto n dɔ, a la jɔnmuso fanmajiini. Wo bolo ma, ka damira bi haan ka wa, mɔɔ ri a fɔ n ma ko barakaden,

⁴⁹baa Alla Sebɛɛtii ra ko ba kɛ n yɛ. A tɔɔ sɛniman dɛ!

⁵⁰Alla ri kininkinin mɔɔilu ma mɛnilu ka a bonya, a ni ie denilu ni ie mamarenilu.

⁵¹A ra ko ba siyaman kɛ a la fanka rɔ. A ra doilu gbɛn a rɔ, mɛnilu ye jɛrɛdaba ri.

⁵²A ra mansaya bɔ mansailu bolo, kɔni a ka mɔɔ fanmajiininilu kɔrɔta.

⁵³A ra kɔnkɔtoilu sɔ damunun ɲuma rɔ foo ka iwasa, kɔni a ka nanfulutiilu gbɛn ka ie lawa bolokolonya rɔ.

⁵⁴A ma ɲina a la kininkinin mɔɔilu kɔ. Wo rɔ, a ra a la jɔnilu dɛmɛn, Isirayɛli mɔɔilu kɔnin.

⁵⁵A tun ka wo lahidi ta an benba Iburahima ni a bɔnsɔn yɛ foo ka wa kadawu.»

⁵⁶Nba, Mariyamu mɛnda Elisabɛti tɔrɔfɛ ye. A ka karo sawa ɲɔɔn kɛ, ka ban ka wa a wara.

⁵⁷Nba, Elisabɛti moyi lon sera. A moyira dencɛ la.

⁵⁸A siiɲɔɔnilu ni a badenmailu ka a mɛn ko Maari Alla ra kininkinin a ma ka ko ba kɛ a yɛ. Alu bɛɛ sewara.

⁵⁹A sɔrɔn tele seyin, alu bɛɛ nara ka den kojiiya kɛ. Alu tɛrɛ ye a fɛ ka a tɔɔ la a fa Sakariya la.

⁶⁰Kɔni a na ka ie jabi: «Wo tɛ bɛn. A tɔɔ le ko Yaya.»

⁶¹Alu ka a sɔsɔ ko: «Ai badenmailu rɔ mɔɔ si tɔɔ tɛ Yaya.»

⁶²Alu ka kuma Sakariya yɛ ie bolo la, ka a maɲininka den tɔɔ ma.

⁶³Sakariya ka ie jabi a la kuma la a bolo la ko alu ye walan do don a bolo. Alu ka do don a bolo. A ka a ta ka sɛbɛli kɛ a kan ko: «Den tɔɔ le Yaya.» Alu bɛɛ ka wo yen ka kabannakoya.

⁶⁴I kɔrɔ ye, Sakariya da lakara. A sera kumala ikɔ tuun. A ka Alla tando bakɛ.

⁶⁵Wo ka ye mɔɔilu bɛɛ masilan. Mɔɔilu bɛɛ tɛrɛ ye a barola ko ɲinilu kan Jude koyinkɛ yɔrɔ wo fan bɛɛ rɔ.

⁶⁶Mɛnilu ka kibaro wo lamɛn, woilu tɛrɛ ye i mirila ko: «Den wo ri kɛ mɔɔ su ɲuman di?» Baa, alu ka Alla la baraka yen den kan.

⁶⁷Alla la Nin Sɛniman jiira Sakariya rɔ, ka kelaya ko:

⁶⁸«Tandoli ye Isirayɛlikailu Maari Alla yɛ, baa a ra na ka a la mɔɔilu hɔrɔya.

⁶⁹A ra Kisiba di an ma ka bɔ a la jɔn Mansa Dawuda bɔnsɔn dɔ.

⁷⁰A ra wo kɛ iko a la nabiɲuma sɛnimanilu ka a fɔ ɲa mɛn ma kɛbi waati jan.

⁷¹Kisiba wo ri an kisi an juuilu ma, ka an bɔ an kɔniyabailu bɛɛ bolo.

⁷²A ra hina an failu la, baa a ra a janto a la teriya sɛniman dɔ,

⁷³a ka mɛn sidi an benba Iburahima yɛ kɔnin.

⁷⁴A ko, ko a ri an kisi an juuilu fanka ma. Kosa an kana silan mɔɔilu kɔrɔ, fo ka Alla bato

⁷⁵sɛniya rɔ, a ni telenbaya rɔ. An di baara kɛ a ɲana wo ɲa ma, haan ka an si tele bɛɛ ban.»

⁷⁶«N den, mɔɔilu ri i kili ko: ‹Alla Kɔrɔtaninba la nabiɲuma.› Ka a masɔrɔn i ri wa Maari ɲɛ, ka a la sila rabɛn a yɛ.

⁷⁷A ri kisi ko lɔnniya di a la mɔɔilu ma, tuma mɛn na alu julumun ye a makotola,