Luka 16:7-15

⁷“Mia naio bano, ana dolu binimei, ana naio bika denio, berinavo ‘?Koig a jau, kanamo jabue venia?’ Ana naio berdop̃e, ber ‘Bake na uiti tormomou takurano 100 ga.’ Ana naio berkanio, berinavo ‘Mo, mia kito ve juo rete rivatove ga. Ninei be kanamo jabue nene, jau kototano, ana koyolkon bulag sop̃elia nana beamu, ana kovivitauia kar ve duelimo va arolu 80 ga.’ Naruei naio mila jibe na-o mila nonovlo abiniu.

⁸“Ana iorou kanio, ana toro na toru nei naio bitilubar vite nei, ana naio ber ka kanano toro nam̃a jenjen kanano puruveru nalo beamu, naio berinavo ‘Riano ga, jau kobina vatitigio ka kiniou, ana namial jibe kanamo masouano tenia, jau kobe pariparimo kija ga na.’ ” Naruei Yesu berinavo “Kamiu kumial kulorinio nalo na yetemeriba nei, bogo nam̃a amim̃au bija puruveru, mia abe masou ka bo, nalo amijikia bajago na ala bilbilu vija tomu nalo, ka mia tomu nalo nene ala rivu kalo iorou bereio. Mia kiniou nemial ka napano keneriku nalo na miamoiano, va telabo nalo maka ave masou batitig rivu ka aim̃au vija puruveru napano Atua jian banlo.

⁹“Neberenio batitig ban kamiu, neberinavo, Puruveru naio be tena yetemeriba nei ga, mia verenio mijikia riijaiso ka kove bilbilu rivu vija Atua, bo ka koim̃au kanio. Ver jau koim̃au rivu vija puruveru ea m̃arabo na memedu nene, mia iorou kanio ana Atua naio risaaro ka mia rivurso kavan ea vio na maka puruveru toaio, naina naruei be kanamo vonuo na mave.

¹⁰“Toro na bar ka naio batitig bo ea im̃auano na kiritavaso ga, mia kito ramijikia ravarkar tiniedo ea naio ka mia naio rivar naio ka im̃auano na toru bunu. Mia toro na mim̃au maka rimemedu ea vite na telisu, mia naio rim̃au rivova lie vo ea vite na toru.

¹¹Ver kamiu kuvar vatitig re kamiu ka im̃auano nalo na puruveru na yetemeriba nei, mia kei bereio rivar Atua kanano tonovo nalo tua jumemiu ka ve kenemiu?

¹²A ver kamiu maka kuvijikia kuvim̃au rimemedu rivija vite nalo nam̃a Atua mijamo ka ban kamiu ka bogo bulati ga ea yetemeriba nei, mia kei bereio rijamo ka mauo novo nalo napano ajua vio mave ave kenemiu dam̃ariga?”

¹³Mia Yesu ber bunu, berinavo “Bereio, ver toro na im̃auano tai, naio rim̃au dede ga ea tubo ve juo ve vaarakurano. Ver tibe na, mia naio tinien tii tinene, mia riilkue ka dolu nene, p̃eli na mia rudu tinene, mia tuvan dolu nene. Kamiu maka kuvijikia ka kuvila ka napano kamiu kube tomu nam̃a amim̃au Atua kanano, a kube tomu na puruveru ka bogo nene bunu.”

¹⁴Ana na ea bogo na, Varisis nalo bunu aju kiano vo, ajum̃a amiagago ka iliano nalo nei. Mia nalo abe tomu nam̃a tiniel jii m̃elea puruveru toru bogo nonovio, naruei nalo abital lelan ga m̃arabo novo nalo na im̃auano bija puruveru napano Yesu berial ban kiano naiagagoano nalo.

¹⁵Ana Yesu mil banlo berinavo “Kamiu tiniemiujii ka kuvila ka napano mia tomu nalo aial kamiu tibe ka tomu na memedu nalo, mia Atua biti dulu venia napano joa kenemiu iviso. Vite miroano napano m̃a tomu nalo amiaia, aberinavo naio bo, mia ea Atua kiano vitiiano tenalo na abova ga.”