Luka 11:21-53

²¹“Ŋactêkwa teŋ embe lêma tokêmgeŋ ma ejop nê gamêŋ êmoa, oc nê waba ênêc teŋgeŋ

²²Mago ŋac siŋsêlêc teŋ embe êndac eŋ, oc êku eŋ tulu ma êjaŋgo ênê laukasap, taŋ taê kêka naŋ su, ma ênac sam ênê waba.

²³“Ŋac taŋ êwiŋ aê atom naŋ, enseŋ aê. Ma ŋac taŋ ejoŋ ŋanô sa êwiŋ aê atom naŋ, êtê saliŋ-saliŋ.

²⁴“Ŋalau ŋatêmui embe êsa aŋga ŋamalac teŋ nê, oc eo êmoa gamêŋ kwalam ma ensom gamêŋ êlêwaŋ tauŋa, e embe êtap sa atom, go êsôm gebe ‘Aê jamu jana ŋoc andu, taŋ kasa gamêŋ naŋ êtiam.’

²⁵Ma embe naêô lasê, oc êlic sêkajo sa to sêgelôŋ.

²⁶Go naêkôc ŋalau 7, taŋ nêŋ sec kêlêlêc ênê su naŋ, mêŋsêsô nasêŋgôŋ. Go ŋamalac tonaŋ êmoa naeo ŋanô êlêlêc gêmuŋŋa su.”

²⁷Jesu kêsôm biŋ tonaŋ gêmoa ma awê teŋ aŋga lau tau nêŋ gêôc awa sa ma kêsôm gêdêŋ eŋ gebe “Aê aoc êôc têtaclêlôm, taŋ kêkêkam aôm to su, taŋ aôm gônôm naŋ.”

²⁸Mago Jesu kêsôm gebe “Biŋŋanô, aê aoc êôc êsêac, taŋ sêŋô Anôtônê biŋ ma sêmasaŋ naŋ.”

²⁹Lau taêsam sêkac sa sêpi tageŋ, go Jesu gêôc, awa sa ma kêsôm gebe “Lau têm tonecŋa êsêac lau sec. Ac sêsôm gêŋtalô, mago gêŋtalô teŋ oc êndêŋ êsêac atom, gêŋtalô Jonaŋa tageŋ.

³⁰Kêtom Jona kêtu lau Niniwe nêŋ gêŋtalô, Ŋamalacnê Latu êtu lau têm tonecŋa nêŋ gêŋtalô amboac tonaŋgeŋ.

³¹Êndêŋ noc mêtôcŋa kwin aŋga mula-mŋa oc êndi sa êwiŋ gôlôac têm tonecŋa nêŋ lau ma êmêtôc êsêac, gebe eŋ aŋga nom ŋamadiŋ, mago gêmêŋ gebe êŋô Salomonê mêtê. Ma alic acgom, ŋac teŋ kêlêlêc Salomo su tec gêmoa.

³²Êndêŋ noc mêtôcŋa ŋacwaga Niniweŋa oc sêndi sa sêwiŋ lau têm tonecŋa ma sêmêtôc êsêac gebe Jona gêjam mêtê êsêac, tec sêjam tauŋ ôkwi. Ma alic acgom, ŋac teŋ kêlêlêc Jona su tec gêmoa.

³³“Ŋac teŋ embe êtuŋ ja sa, oc êsiŋ ôkwi me êŋgênduc ŋa suc auc atom. Eŋ etoc êkô jakaiŋ ŋaôgeŋ gebe êsêac, taŋ sêsô sêmêŋ naŋ, sêlic ŋawê.

³⁴Matamanô kêtu ôlim ŋaja. Matamanô embe ŋajam, go ŋawê ênam ôlim samucgeŋ auc. Ma matamanô embe sec, go ôlim samuc ŋakesec.

³⁵Amboac tonaŋ ojop taôm ŋapep gebe ŋawê, taŋ gêc nêm ŋalêlôm naŋ, ŋakesec êsa atom.

³⁶Ôlim samuc embe ŋawê êsa e ŋagêŋlêlôm teŋ ŋakesec atom, oc ŋawê êsa samucgeŋ êtôm ja ŋanô kêpô aôm.”

³⁷Jesu kêsôm biŋ tonaŋ gêmoa ma Parisai teŋ keteŋ eŋ gebe êna êniŋ gêŋ ocsalôŋa êwiŋ eŋ. Tec kêsô gêja e jagêŋgôŋ sic.

³⁸Parisai tonaŋ gêlic eŋ gebe êniŋ gêŋ, mago kêkwasiŋ tau gêmuŋ atom, tec gêŋac lêma.

³⁹Ma Apômtau kêsôm gêdêŋ eŋ gebe “Kec, amac Parisai akwasiŋ laclu to suc ŋadêmôêŋa ŋapep, mago nêm ŋalêlôm naŋ geŋgeŋ to sec gêjam auc.

⁴⁰Amac lau meloc, ŋac tau, taŋ kêmasaŋ gêŋ ŋadêmôêŋa naŋ, kêmasaŋ gêŋ ŋalêlômŋa gêwiŋ atom me.

⁴¹Akêŋ gêŋ, taŋ gêc laclu to suc ŋalêlôm naŋ, êtu moasiŋ êndêŋ lau, go talic amacnêm gêŋ samob ŋawasi.

⁴²“Ojae amac Parisaimêŋ, amac embe atap lai to môm ma gêŋ gêga 10–10 sa, go akêŋ ŋateŋ êtu da ma awi biŋgêdêŋ to têntac gêwiŋ Anôtôŋa siŋ. Daŋgôm teŋ ma dawi teŋ siŋ atom.

⁴³“Ojae amac Parisaimêŋ, tec têmtac gêwiŋ abe aŋgôŋ ŋamatageŋ aŋga lôm to sê moalêc amac aŋga malacluŋgeŋ.

⁴⁴Ojae amacmêŋ, tec atôm sêô, taŋ gamêŋ kêkêŋ auc naŋ. Ŋamalac sêka tôŋ paliŋ-paliŋgeŋ ma sêjam kauc.”

⁴⁵Tec biŋsutau teŋ kêsôm gêdêŋ eŋ gebe “Mêtêmôkê, kôsôm biŋ tonaŋ tec gêbu aêac biŋsutau gêwiŋ amboac tonaŋgeŋ.”

⁴⁶Ma Jesu kêsôm gebe “Ojae amac biŋsutaumêŋ amboac tonaŋgeŋ. Amac akêŋ gêŋ wapac kêsac lau, mago taôm lememlatu teŋ kêmoasac gêŋ wapac ŋagec atom.

⁴⁷Ojae amacmêŋ, tec aboa propete, taŋ tamemi sêjac êsêac êndu naŋ, nêŋ sêô sa.

⁴⁸Tec amac awa tameminêŋ gêŋ, taŋ sêgôm naŋ, sa to alic ŋajam, gebe êsêac sêjac propete êndu ma amac aboa êsêacnêŋ sêô sa.

⁴⁹Amboac tonaŋ Anôtônê mêtê kêsôm lasê gebe ‘Aê oc jasakiŋ propete to laujaeŋ dêndêŋ êsêac sêna, ma oc sênac êsêacnêŋ ŋagêdô êndu to sêjanda ŋagêdô,’

⁵⁰Amboac tonaŋ Anôtô êjatu propete samob nêŋ, dec, taŋ sêkêc siŋ gêdêŋ Anôtô kêkêŋ undambê to nom e mêŋgêdêŋ galoc naŋ, ŋagêjô aŋga lau têm tonecŋa nêŋ,

⁵¹aŋga Abelnê dec e gêdêŋ Sakarianê dec, taŋ sêjac eŋ êndu aŋga altar dajaŋa to lôm dabuŋ ŋasawa naŋ.

⁵²“Ojae amac biŋsutaumêŋ, amac akôc ki, taŋ êlai andu tajala mêtê ŋamŋa ŋakatann su. Amac taôm asô aja atom ma akô lau, taŋ sebe sêsô sêna naŋ, auc amboac tonaŋgeŋ.”

⁵³Jesu kêsa aŋga andu tonaŋ gêja ma Parisai to biŋsutau sêôc aweŋ sa ma sêkac eŋ to têtu lêsu eŋ kêtu biŋ taêsamŋa.