Luk 6:10-36

¹⁰Eaꞌ natologon tulif amam nematawa hiesi, naꞌipa aman anama naꞌi, “Dowa lagel ineꞌinai usiꞌina.” Eaꞌ nando lagel nataga boꞌona wapotiꞌ.

¹¹Eaꞌ amam Farisi maloma amam mawalipasa miꞌuli Godi opalef wandafum kwapeteꞌ endilisi ma anan. Eaꞌ mandaꞌipama maꞌi, “Afaꞌ nambimb ondaꞌ maina Jisas?”

¹²Anona nemaf Jisas nandowasaꞌ nafeꞌ halafutagw nandaꞌ betena God. Eaꞌ owamb anama laona anan nape nandaꞌ beten nafeꞌ eaꞌ lala.

¹³Aon natefi, anan nofala alupumi ananimi hiami mafiꞌi. Amam 12-peleim nandandepam Aposel.

¹⁴Anona Saimon, eaꞌ Jisas nandaꞌmana agel waꞌana Pita. Eaꞌ Andru, owalomana Saimoni. Eaꞌ Jems naloma Jon, Filip naloma Bartolomyu,

¹⁵Matyu naloma Tomas eaꞌ Jems nogalomana Alfiusi. Eaꞌ Saimon anan epes hiesi Seloti.

¹⁶Eaꞌ Judas nogalomana Jemsi, naloma Judas Kariotinai, aman anama nawalapa Jisasa naumbih ananimi.

¹⁷Eaꞌ Jisas niniala naloma alupumi ananimi mafeꞌ anagon bembeꞌagoma, doꞌok esis alupisi hiesi ananisi safiꞌi saliꞌ saituma. Eaꞌ epes hiesi safiꞌi. Enis safiꞌi wambel hiagoma Judia eaꞌ enis safiꞌi wambel biefina Tair naloma Saidon nape felefeleꞌma naoh, enis safiꞌi Jerusalem.

¹⁸Esis safiꞌi ma someꞌ basef ananimi ma natofa awes nandaꞌasi. Eaꞌ esis amam nematawa ambagof awami mahambombagasi safiꞌi, Jisas nandaꞌas boꞌwes wapotiꞌ.

¹⁹Pepel ananinai nafeꞌ nandaꞌ esis hiesi boꞌwes. Eaꞌ deiꞌ esis hiesi saꞌi sombaleꞌefana.

²⁰Jisas nati amam alupumi ananimi naꞌipam naꞌi, “Ipeꞌ kwahupei otamba maim aꞌipei, ipeꞌ pawis eaꞌ wambota Godi numafipa. Amama atom deiꞌ ipeꞌ pandanifel pape.

²¹Ipeꞌ epes nolomahipei, deiꞌ pandanifel pape andeandeꞌ. Deiꞌ main, anona nemaf ipeꞌ peaꞌ gwaꞌaimi elihipa endilisi. Ipeꞌ epes opalef nimanima palef, deiꞌ pandanifel pape andeandeꞌ. Deiꞌ main, anona nemaf ipeꞌ pandanifel pindaꞌiaf.

²²Aeꞌ ataga epen endilisiwei. Nambimb enis epes siti ipeꞌ pila aeꞌ, esis opalef aoma ipeꞌ endilisi. Eaꞌ sowaꞌ alafugaha ipeꞌ seseꞌepa agof awami endilisi siꞌi ipeꞌ epes aopai sindaiwaꞌmepa sogaloꞌmepa.

²³Nemaf anama esis sondaꞌepa naꞌama, ipeꞌ pendanifel pialemb etin. Deiꞌ main, amamaga hiami buꞌwami ipeꞌimi maꞌoh heven ilif. Fowaꞌ gani akupas bafapas asasisi sandaꞌ amam profet aom naꞌama etin.

²⁴Ipeꞌ otamba wiga maim hiamipei, ipeꞌ pindumafuma ma amamaga awami nimanimi meatagamipei. Deiꞌ main, ipeꞌ deiꞌ pefaꞌam eaꞌ amamaga mondaꞌepa pandanifelamami.

²⁵Ipeꞌ deiꞌ paꞌ gwaꞌaimi elihipei, pindumafuma ma amamaga awami nimanimi meatagamipei. Deiꞌ main, anona nemaf ipeꞌ nolomehepa. Ipeꞌ deiꞌ pandaꞌiafi, ipeꞌ pindumafuma ma amamaga awami nimanimi meatagamepa. Deiꞌ main, anona nemaf ipeꞌ pelefa pendaꞌaga endilisi.

²⁶Ipeꞌ deiꞌ epes hiesi hiꞌalas safela agof ipeꞌmi saꞌi ipeꞌ buꞌwipei, ipeꞌ pindumafuma ma amamaga nimanimi luꞌwami meatagamipei. Deiꞌ main, fowaꞌ akusas bafasas asasisi saꞌipam naꞌama etina amam profet mambasoꞌmami maꞌipasa basef Godi. Sandaꞌmamam naꞌama etin, safela agof amamumi.

²⁷Eaꞌ ipeꞌ pameꞌ basef aeꞌami, ipeꞌ ukup mimila naumbih ipeꞌisi, pendaꞌmasa waf buꞌunai isima opalef aoma ipeꞌi.

²⁸Ipeꞌ pihaliꞌ Goda nondaꞌmas waf buꞌunai ma epes isima sandaꞌmepa waf aonai. Eaꞌ pendaꞌ betena epes isima sandaꞌepa aopei.

²⁹Iꞌi emi egelin nehepa aomb waꞌol, pendamboma nehepa waꞌol wapotiꞌ. Iꞌi emi egelin nefaꞌepa saket ipeꞌinai, ina pindaꞌimana, owaꞌ. Peseꞌana wapotiꞌ.

³⁰Iꞌi emi egefin nefalepama anom amamaga, ipeꞌ peseꞌanam. Eaꞌ iꞌi emi egefin nefaꞌ amamaga ipeꞌimi, ipeꞌ owaꞌ piꞌipana mehipa negwamepam, owaꞌ.

³¹Maina waf ipeꞌ paꞌi esis sandaꞌmepana ipeꞌi, ipeꞌ pendaꞌmasana naꞌama etin.

³²Iꞌi ipeꞌ ukup mimila epes isima ukup maimaila ipeꞌ etipa, nambimb pefaꞌ maim amamaga buꞌwami ma waf anama? Owaꞌetin. Epes sandaꞌ waf aonai esis sandaꞌana naꞌama etin. Ukup maimaila epes isima ukup maimailasi.

³³Iꞌi ipeꞌ pendaꞌ waf buꞌunai ma isima sandaꞌ waf buꞌunai atona ma ipeꞌi, nambimb emi nefela agof ipeꞌimi? Owaꞌetin. Epes isima sandaꞌ waf aonai esis wapotiꞌ sandaꞌ waf naꞌamainai.

³⁴Iꞌi ipeꞌ peseꞌasa anom amamaga epes isima ipeꞌ pegawa esis nambimb seagwamepami, anona nemaf emi nefela agof ipeꞌimi? Owaꞌetin. Epes sandaꞌ waf aonai wapotiꞌ saseꞌasa anom amamaga enis sandaꞌ waf aonai, ma esis seatanima seafaꞌam naꞌama etin mondagwama siꞌi saliꞌ saseꞌasam.

³⁵Eaꞌ ipeꞌ ukup mila naumbih ipeꞌisi, pendaꞌmas waf buꞌunai esis peseꞌasa amamaga. Ipeꞌ ina ataꞌ piꞌi anona nemaf esis sogwamepam, owaꞌ. Ipeꞌ pendaꞌas naꞌama anona nemaf God laꞌifinai nape ilifi neseꞌepa amamaga luꞌwami buꞌwami ma pepe awasi ananipei. Deiꞌ main, anan naꞌi uwahipis esis isima owaꞌ seanifelonae saloma isima sandaꞌ waf aonai.

³⁶Ahalomepa ipeꞌinai naꞌi uwahipis esis sandaꞌ waf aonai. Ipeꞌ pendaꞌam naꞌama etin siꞌi anan nati esis uwahipis.