Luk 6:10-36

¹⁰Awa, kɔ Yesu ɔmɔmən ŋa dəcəro fəp faŋan, k’oloku wərkun nwɛ: «Məteŋci kəca!» Kɔ wərkun nwɛ enteŋci kəca, kɔ kəca kɔn kəntamnɛ.

¹¹Mba kɔ pəntɛlɛ acicəs a sariyɛ kɔ aFarisi, kɔ ŋayɛfɛ kəgbɛkəlɛnɛ ntɛ ŋantam kəyɔ Yesu mɔ.

¹²Tɛm tatɔkɔ, kɔ Yesu ɛmpɛ nde dətɔrɔ kəkɔ-sali, k’ɔŋkɔ pəcepərɛnɛ pibi fəp kəlok-lokər Kanu.

¹³Ntɛ dec dɔsɔk mɔ, k’ewe acɛpsɛ ɔn darəŋ, k’ɛyɛk-yɛk ŋa dacɔ afum wəco kɔ mɛrəŋ, aŋɛ ɛnasɔŋ tewe ta «asom» ɔn mɔ.

¹⁴K’ewe Simɔŋ, nwɛ ɛnasɔŋ tewe ta Piyɛr mɔ; kɔ wɛŋc Andəre, Sak, Saŋ kɔ Filip, Bartelemy,

¹⁵Matiye, Tɔma, Sak, wan ka Alfe, Simɔŋ, wəsaŋka-saŋka

¹⁶Yude, wan ka Sak, kɔ Yudas wəka dare da Iskariya, nwɛ ɛnadesɔŋ Yesu adif ɔn mɔ.

¹⁷Kɔ Yesu ŋantor kəyɛfɛ dətɔrɔ kɔ ŋa, k’ɔŋkɔ pəcəmɛ kəfo kətəŋnɛnɛ nkɛ acɛpsɛ ɔn alarəm, k’afum alarəm alɔma ŋanayi mɔ: afum aka Yude fəp, Yerusalɛm, kɔ afum aka kəba kəsək nde sədare sa Tir kɔ Sidɔŋ.

¹⁸Afum akaŋɛ fəp ŋanader kədecəŋkəl kɔ, pətaməsɛnɛ sɔ docu daŋan. Afum aŋɛ yɔŋk yɛlɛc yɔŋc-tɔrəs mɔ, ŋanatamnɛ.

¹⁹Afum fəp ŋac-sɛp kəgbuŋɛnɛ kɔ, bawo fənɔntər fəŋc-wur kɔ nfɛ fəŋc-taməs acuy fəp mɔ.

²⁰Kɔ Yesu ɔmɔmən acɛpsɛ ɔn darəŋ, k’oloku: «Pəbɔt’un nəna atɔyɔ daka, bawo nəna ɔyɔ dɛbɛ da Kanu!

²¹Pəbɔt nəna aŋɛ dor dɔyɔ tantɛ mɔ, bawo nəndenɛmbərɛ! Pəbɔt’un nəna aŋɛ nəyi kəbok mɔ, bawo nəndesel!

²²Pəbɔt’un kɔ afum ŋandeter’un-ɛ, ŋac-bɛləs’un, ŋac-lɔməs’un, ŋac-ləsər’un mewe bawo nəlaŋ dim da «Wan ka fum.»

²³Nəde nəwoləs kɔ dɔsɔk dadɔkɔ dendeder-ɛ, nəyok-yokɛnɛ pəbotu, bawo kəpocɛ kəpɔŋ kəŋkar’un nde dareŋc. Tantɛ tɔ atem aŋan ŋaŋc-yɔ adəŋk a Kanu.

²⁴Pəlɛc pey’un nəna aŋɛ nəyɔ daka mɔ! Bawo nəlip kəsɔtɔ pɛnɛmpəsɛ ponu mpɛ pənamar’un kədekɔ-sɔtɔ mɔ.

²⁵Pəlɛc pey’un nəna aŋɛ ca fəp yɛlar mɔ, bawo dor dendekɔ-yɔ nu! Pəlɛc pey’un nəna aŋɛ nəyi kəsel mɔ, bawo nəndekɔ-yi kəbal kɔ kəbok disrɛ!

²⁶Pəlɛc pey’un nəna nwɛ afum fəp ŋandeloku pətɔt ponu mɔ, tantɛ tɔ atem aŋan ŋaŋc-yɔ kɔ akɔ ŋaŋc-baŋɛnɛ kəyɔnɛ adəŋk a Kanu mɔ.»

²⁷«Mba, iŋloku ti nəna aŋɛ nəŋcəŋkəl’im mɔ: Nəbɔtər aterɛnɛ anu, nəyɔ pətɔt aŋɛ ŋanter’un mɔ!

²⁸Nətolanɛ pətɔt aŋɛ ŋantolan’on pɛlɛc mɔ, nətolanɛ aŋɛ ŋaŋlɔməs’un mɔ!

²⁹Kɔ fum efer’əm kəca dakaŋca-ɛ, məceŋc sɔ akaŋca ŋa mɛrəŋ ŋɔkɔ pəsut sɔ ŋaŋɔkɔ. Kɔ fum ɛlɛkər’əm duma dakəroŋ-ɛ, məce kɔ sɔ pəlɛk duma dam dedisrɛ.

³⁰Məpocɛ nwɛ o nwɛ ontol’am mɔ; kɔ fum ɛlɛkər’əm paka mpɛ pɔyɔnɛ pam mɔ, ta məwerəs kɔ pi.

³¹Nəyɔnɛ afum tɔkɔ nəfaŋ a ŋayɔn’on mɔ.

³²Kɔ nəmbɔtər gbəcərəm akɔ ŋambɔtər’un mɔ, kəway kəre kɔ nəŋgbɛkər sɔ mera-ɛ? Ali aciya ŋambɔtər aŋɛ ŋambɔtər ŋa mɔ!

³³Kɔ pəyɔnɛ fɔ akɔ ŋaŋyɔn’on pətɔt mɔ gbəcərəm ŋɔ məŋyɔnɛ pətɔt-ɛ, kəway kəre kɔ məntam kəgbɛkər amera-ɛ? Ali aciya tatɔkɔ tɔ ŋaŋyɔ!

³⁴Kɔ pəyɔnɛ fɔ akɔ nəyɔ amera kədeluks’on mɔ gbəcərəm ŋɔ nəntam kəbɔr-ɛ, kəway kəre kɔ nəna nəntam kəgbɛkər amera-ɛ? Bawo ali aciya sɔ ŋambɔr aciya ntɛ tɔŋsɔŋɛ ŋa kədesɔtɔ pɛtəŋnɛnɛ payi mɔ.

³⁵Nəbɔtər ater anu, nəbɔr ŋa nəwurɛ kəluksɛ debe dadɔkɔ amera. Nəndesɔtɔ kəpocɛ kəpɔŋ, nəyɔnɛ sɔ awut a Wəbɛ wəka dareŋc, bawo Kanu kəntesɛ nnɔ apələrnɛ pətɔt kɔ ayeŋki bəkəc ŋayi mɔ.

³⁶Nəbɔt mera pəmɔ tɔkɔ Papa konu ɔmbɔt amera mɔ.»