Luke 6:10-36

¹⁰Edo imo embo berari awa jisimi udugedo gido embo ipa ambari ainde sisina, “Ipa ito ududuge!” Ango tesiri ami kera edo ainda ipa ududugesiri dave esisina, ipa nei ango.

¹¹Ata awamane sinigambarimi do ato ae esiri Yesu de nongo ari awa akuta mina tara esitera.

¹²Iji angode Yesu idegedo pejida benunu tain maunsisina. Edo muyae ainde awa God de benunu siri jijirisina.

¹³Edo sipo atesiri imo ainda ambodani dao tesiri ainda yai guputera. Ainda edo ami awamaneda doda embobo 12 geredo nombo ‘piari aimbari embobo’ pipisisina:

¹⁴Simon (ainda dao Peter pipisisina) ae ainda nameji Andrew de; James ae John de; Philip ae Bartholomew de;

¹⁵Matthew ae Thomas de; Alphaeus da mai James ae Simon (ainda dao nei Zelot tedo esitera) ainde;

¹⁶Judas awa James neinda mai ae Judas Iscariot de, embo emi awa amboda otawo betarate ge jiraina.

¹⁷Ango edo imo ae awamane de daedo wotedo yai ududugarida imo peposisina. Edo ainda ambodani jisi da awa ae embomai jisi bajina de doregesitera. Awamane yai berari Judea doda, edo Jerusalem da, edo nasi ewa doda, Taia ae Saidoni de, ami Yesu da ge ingido karu neindekainde edo itari awa kaviyegain guputera.

¹⁸Edo daedo avekave asisi bebegaemi bundari awa gundo udegari budo esitera.

¹⁹Edo embo berari doregesitera ami imo tujiain edo esitera, aindabé, embo ainda goroba idegeteira ami embo berari kaviyegetera awatedo.

²⁰Ango edo Yesu jisi ambodani kena edo sisina: “Aindabé imomane rorae isisigae itewa, God da gisijiari awa imomane topo. Awatedo, dubodave awa itomane.

²¹Aindabé imomane boroko beji itewa, God mi imondemane rorae piari injido inono awa. Awatedo, dubodave awa itomane. Aindabé imomane boroko mamato eite ji tewa, imomane amboda iro jirawa. Awatedo, dubodave awa itomane.

²²Aindabé, imomane na, Embo da Mai awa, ambo ambo edo ewa, dubodave awa itomane, iji angode, embomi imondemane sinigambari ara, edo imomane jipapa ae ara, edo imondemane ge butara, edo imomane ajiregedo​ ​dao itomaneda ge bebegae tara.

²³Iji ainde, yawa eite kekapunya ewo, aindabé, God mi itomane tau bajinabé utuda​ ​siya esira isira, edo aindabé awamaneda apipiyemi wasiri dá ango peroveta maneda yai edo esitera, awatedo.

²⁴“Ata imomane gaiapa jiwaede itewa, itomane rorae davegave matu bewa. Awatedo, do ari itomane yai.

²⁵Imomane rorae injido inono etewa,​ ​amboda beji mina bawa. Awatedo, do ari itomane yai. Imomane iro ge boroko site itewa,​ ​amboda mamato eite ji tawa. Awatedo, do ari itomane yai.

²⁶Edo iji ainde embomai berarimi imomane dasiga edo era, do ari itomane yai, aindabé, awamaneda apipiyemi peroveta mane pitawa​ ​ango dasiga edo esitera, awatedo.

²⁷“Ata nane imomane aimi ge goteite itewa ainde tena: Itomane gitopo embobo dubobudo ewo. Edo aimi imondemane sinigambari edo era, ainde wasiri davemi edo ewo.

²⁸Embomai aimi imondemane begá piedo era, God de tedogiwo, awamane ao ari piedo are. Edo aimi imondemane ge tepotapo tedo era, awamane embo benunu tedo ewo.

²⁹Imo embo aimi opoda dari gido, wareregeyo, opo neinda daedo dare. Edo embo aimi ito dademo ombari jiari gido, ito ombaribé awa daedo kokumbeyo bare.

³⁰Edo embo aimi ito yai rorae ro atega edo eira awa, pieyo budo are. Edo embo neimi rorae ito awa ainda topo kumbari gido awa, tekago piarate tedo eote.

³¹Edo wasiri ro imomane jipapa edo ewa ango embomi imondemane edo ara, kariwa ango awa inemane awamanede edo ewo.

³²“Awarata, embomai aimi imomane dubobudo era awa akuta dubobudo ewa, ro awa embo imomane dasiga ari? Aindabé, wasiri bebegae ari embobomi embo nenei dá ango dubobudo era.

³³Edo daedo, embomai aimi imondemane wasiri dave edo era, awamanede akuta wasiri dave edo ewa, ro awa embo imomane dasiga ari? Aindabé, wasiri bebegae ari embobomi embo neneinde dá ango wasiri dave edo era.

³⁴Edo imomane ganu embo neneinde akuta piawo jigamo edo mina piorote kotembedo ewa, ro awa embo imomane dasiga ari? Aindabé, wasiri bebegae ari embobomi embo bebegae neneinde ganu pisido era, awamanemi tega inonoda piaro bara ango kotembedo era.

³⁵Awarata, gitopo embo itomane dubobudo ewo, edo awamanede wasiri dave edo ewo. Edo awamanede ganu piedo tekago piaro bain kotembeove. Ango edo itomane tau dugabé bawa, edo God Ikanebé Ikane ainda mamai awa. Aindabé, embo ainda dave ari embo do okain de jivere embobo deda yai piedo eira.

³⁶Awatedo, embo berari do ewo dá ango Mamo itomane embo berari do edo eira.