Luka 6:10-36

¹⁰Iŋuc murâ risic forisic honec‐joparâ ŋic ʒiŋuc âzâcnewec: “Mege fâretiŋnec.” Eme ŋic e iŋuc eme meticne sanaŋkewec.

¹¹Eme jaŋe i hone manac erâ aariczi maŋjeŋic fusucmame Jesu iŋuc me iŋuc ecneniŋte muc manac embiŋ.

¹²Dameŋ ira Jesuzi tikio numuocte fewec. Ferâ ŋafe ʒora Anutu numucnehec juhame hae furewec.

¹³Hae fureme kikefuŋfâc‐ticne hefârec‐joparâ jaŋeraonec 12 bâwosâec‐joparâ motec bacjopawec, ehuc ʒâŋe sâko‐jeŋic aposolo muwec.

¹⁴Ʒâŋe buchuc‐jeŋic ine ʒiŋuc: Simoŋ, ʒâŋe‐ticne moc Petoro â ɋaticne Anderea, erâ Jakobo â Johane, erâ Filipo â Batolomaio,

¹⁵erâ Mataio â Toma, erâ Jakobo Alifaiore ŋokâ â Simoŋ Ʒelote,

¹⁶erâ Juda Jakobore ŋokâ â Juda Karioto haeonec, e juku Jesu doc bawec.

¹⁷Eme rocjopame tikionec waharâ wâneŋko fisirâ juhapie kikefuŋfâc‐ticne bocjaha â ŋic guru sâko erao tumaŋnembiŋ. Jaŋe Judaia mâreŋkonec â Jerusalem haeonec â Tiro Sidoŋ hâwec moŋgeŋkonec fisipie miti jazawec â huchec ɋiɋicne bacjopawec.

¹⁸Erâ demoŋzi areŋ ejarewec jaŋe wâc bâpiaŋ‐jopawec.

¹⁹Eme bâuapie tâpiri‐ticne jaŋerao fotâcneme ɋiɋic qambiŋte bâuaniŋte kime iriac mâretec ecnembiŋ.

²⁰Eme Jesuzi motecfâc‐ticne jaŋerao ʒâŋe fihuc ʒiŋuc muwec: “Hapetac jueŋgopieŋ ŋoŋere manape ʒerine ekac, ŋoŋe hâcne Anuture uucmaŋ biŋe qaŋarekicne.

²¹Dameŋ ʒiŋuczia nâ hâmoc ehuc jueŋgopieŋ ŋoŋere manape ʒerine ekac, ŋoŋe hâcne juku nâ gapec enʒoŋgopieŋ. Dameŋ ʒi ki busâqoc ehuc jueŋgopieŋ ŋoŋere manape ʒerine ekac, ŋoŋe hâcne juku bubiaŋ bâfuanʒoŋgopieŋ.

²²Ŋic jaŋe Ŋic Fâri Wâtuŋne ere erâ qaisoc‐ŋopârâ jâpe bâsuec eŋarerâ musâqorec‐ŋoparâ ʒâŋe‐ŋeŋic musoriŋkeniŋmu, ŋoŋe manariŋ‐ŋopakopac.

²³Wiac iŋucne fuame dameŋ ira ʒeri bari enʒepieŋ. Manaŋgopieŋ, sambâŋko furine afecne mi foŋarekac. Mimiŋnefâc‐jeŋic jaŋe porofete sâc ijaha ejare jumbieŋ.

²⁴“Moneŋ mafa sâkohec, jei, ŋoŋe juku wemo wiaczi bâmiriŋ‐ŋopazokac?

²⁵Dameŋ ʒiŋuczia nânâ qowi mâririhec jueŋgopieŋ, jei, ŋoŋe juku nânâ basanʒoŋgopieŋ. Dameŋ ʒiŋuczia gâgâwi faio jueŋgopieŋ, jei, ŋoŋe juku ki busâqoc bâfuanʒoŋgopieŋ.

²⁶Muteŋ bâteŋ eŋareeŋgopieŋ, jei, ŋoŋe juku weniŋuc enʒoŋgopieŋ? Mimiŋnefâc‐jeŋic jaŋe porofete burecne iŋuc jaha muteŋ bâteŋ ejare jumbieŋ.

²⁷“Dâŋnane manahuc juŋgopieŋ ŋoŋe ŋazape: Ŋoŋe râsifâc‐ŋeŋic âgo jauŋ ejarenʒepieŋ, qaisoc‐ŋopaeŋgopieŋ jaŋe jauŋ bacjopanʒepieŋ,

²⁸sâwec‐ŋopaeŋgopieŋ jaŋe jambuŋ‐jopanʒepieŋ, musâqorec‐ŋopaeŋgopieŋ jaŋere erâ numunʒepieŋ.

²⁹Moczi maucge ŋicfecne qame ŋifecne wâc sicnecnezemec â moczi ŋaqige faine gowac rome e maŋne mâmâc qikiŋnecnezemec.

³⁰Â moczi wiac mocte numu‐gareme râcnezemec â moczi wiac moc gowac rome bârisie‐gareocte mi fotariezemec.

³¹Ŋoŋe ŋic jaŋe wiac eŋareniŋte manasueŋgopieŋ, sâc ijaha wâc jaŋe ejarenʒepieŋ.

³²Ŋoŋe maŋjauŋ eŋareeŋgopieŋ jaŋe sawa maŋjauŋ ejareniŋmu, ine wemocko tofane fome juku bazu‐ŋarezo? Miti tâmiriczi âgofâc‐jeŋic maŋjauŋ ejareeŋgopieŋ wâc.

³³Â âgo eŋareeŋgopieŋ jaŋe sawa âgo ejareniŋmu, ine wemocko tofane fome juku bazu‐ŋarezo? I miti tâmiriczi eeŋgopieŋ wâc.

³⁴Okacne bârisie‐ŋareniŋmu jaŋe sawa wiac ejarepie wemocko tofane fome juku bazu‐ŋarezo? Miti tâmiriczi âgofâc‐jeŋic ʒiŋuc muhuc wiac ejareeŋgopieŋ wâc: Juku sâc ijaha bârisie‐nârenʒepieŋ.

³⁵“Aricne, iŋuc mi ezo, ŋoŋe râsifâc‐ŋeŋic âgo jauŋ ejarenʒepieŋ. Okacne mi mecne bazu‐ŋareniŋmu jaŋe sifu ehâmo‐jarehuc wiac qikiŋne‐jarenʒepieŋ. Iŋuc erâ juku furine ŋemâcne ronʒoŋgopieŋ, erâ femicne sâko ere naru motecfâc erâ juniŋmu. Eki hâcne ŋic qâomane â râŋgeŋne jaŋe sifu bâmec bajareekac.

³⁶Mamac‐ŋeŋiczi buuruc juekacte ŋoŋe iŋuc jaha buuruc junʒepieŋ.