Luk 4:6-17

⁶Vɨsɨmogwilaa wandɨ. Vɨlɨma njambwi nɨmbana ava kwondu wuna kwondua. Wunamba klandi. Wuna maawupmba nat nɨmba kat kwilɨgowun.

⁷Wun kat vɨlaa nambu sɨlandalaa mɨn njambwi nyan mɨn waa wameyan mɨn kat wuna kwondu kwigiyowun waa wandɨ Seten.

⁸Jisas ndɨ kat wandɨ. Tamba la nyan God waa nyaangɨt pɨlɨwutndɨ. Ngwutna njambwi nyan kɨta lɨgandɨ. Godna. Nat nyan kat mɨn njambwi nyan mɨn waa ke waa. God kɨta lɨgandɨ njambwi nyan waa tamba pɨlɨwutndɨ waa wandɨ Jisas.

⁹Setan ndɨ kat nat njambɨ kwutaa Jerusalemat kalindɨ. Kalindɨ maa God kat kwunatɨnja sɨvla mbundɨ ngayna sambɨ ngeat wokembɨt. Wokembɨt maa Seten ndɨ kat wandɨ. Godna nyanat tɨmeyan valaseliga kɨpmamba ndamɨn, vɨlu.

¹⁰Tamba la nyan God waa nyaangɨt pɨlɨwutndɨ. Godna ensel mɨn kat vɨga lɨgiyandi. Ana kavle yigiyamɨn waa pɨlɨwutndɨ.

¹¹Nat nyan pɨlɨwutndɨ. Mɨn kat ensel kwutaa taambamba kwutaa katsogiyandi. Nɨmbumba ana nɨmamba ndai viyaigamɨn. Ndi kwutaa katsogiyandi waa tamba pɨlɨwutndɨ waa wandɨ Seten.

¹²Jisas ndɨ kat wandɨ. Nat tamba la nyan God waa nyaangɨt pɨlwutndɨ. Awup mɨla. Ngwula njambwi nyan God kat kavle vat ay waa ke waa waa tamba pɨlɨwutndɨ waa Jisas wandɨ.

¹³Seten Jisas kat kavle vat ay waa wanda nyaangɨt ngɨlɨndɨ maa Jisas kat kwagalalaa yindɨ. Yilaa yelavɨtndɨ. Ngɨni ndɨ kat yiga nat njambi waigowun waa yelavɨtndɨ.

¹⁴Godna waagan Jisas kat kwondu kwindɨ maa Jisas Galili walɨnja kɨpmat yindɨ. Njɨvwa kwutɨnda vak kava kava la nɨmba mbutseli mbutsela mbutɨndi, wutndi.

¹⁵Juda yisolaa tɨnja ngay wuleilaa ndi kat nyaangɨt mbutɨndɨ. Wutaa apma nyana waa yelavɨtaa wandi.

¹⁶Jisas Nasaret walɨnja ngepma yindɨ. Tamba mat nyan tɨga kan ngepma yetɨga nɨman yindɨ. Ndɨna angwa ngepma. Njɨvwa lapman nandinya aywaa yisolaa lɨnja ngay wuleilɨndi. Wuleilaa nyinga lɨga nyaangɨt vɨvat laatndɨ Jisas.

¹⁷Laatndɨ maa tamba la profet Aisaia pɨlɨwuta nyaangɨt tɨga nyinga ndɨ kat kwindi. Kwindi maa lavwilaa vɨga kwundimba wandɨ.