Luk 22:7-54

⁷Te bo disąwai tubo nai bret tuabo olo bidibo side, deli sogo silama, te kibu sipsip wai elebo bodolu sogo yagasali. Sipsip wai eleyu, te Juda dabego ma koneani, ‘Polobadu Godigo dago nǫų dabe ela soyu, elebe.’

⁸Tama Jisasgo aga bidi Pita dali Jon dali “Dage si pao” augwali sibolo weyu, te po wai, “Dage si pelama, te nai sisi egi pao, te dago Pasova tubo nai,” te po wai.

⁹Tama augwali sigo te po hanalu wai, “Nago homu da sigo te tubo nai menade sisi yaibawe?”

¹⁰Jisasgo augwali sibolo te po wai, “Dage si te moni be nani tomoba pao. Tama tųdu pobadi, sę ebo bidi me deligo baketgo ąį tulama, tolasa peyu dage si tiąba asaibao. Te bidi wali dage si pao. Tama be tomoba te bidi pobaso da, dage si me te be tomoba pao.

¹¹Dage sigo te be page bidibolo wao, ‘Po ola mabo bidigo nagebolo te po walio, “Nago be tomode te ena dali, eno bidi dabe dali, dago te Pasova nai tuabo be habu menadewe?” ’

¹²Tama te bidigo dage si ugwadu moni be habu ola mawaibao. Tede te nai tuabo ni nami me dua yabo ni nami me agai sę ebo bagego te sisila muai dao. Te be habude dage sigo te tubo nai sisila muao,” Jisasgo te po wai.

¹³Tama te bidi si pelama, Jisasgo wali po gilama, te sę pedalali. Tama augwali sigo agai wali po wali pelama, te tubo nai sisila muani.

¹⁴Te Pasova nai tuabo sogo pedalali. Tama Jisas te beba aselama, te aga te nai tuabo ni namide dua yali, te aga po sela pabo bidi dabe te aposel bage augwali me tede dua yali.

¹⁵Jisas augwalibolo te po wai, “Eno homugo godola pelama, te dago wąį nǫų hani te Israel dabe bugagia bidimainu sula tagalu ela soale side ma kone palu tubo nai Pasova dage dali megi tama tueibao. Tilama, nosali ena dene saibao.

¹⁶Eno mu po dagebolo obao, eno e Pasova nai dage dali ma tugobeo. Tama e nai ma tusiąbadi, te Godigo we bidi tonalubo sogo gagalama, e nai tuabo sę page hania mu pedelaibao. Tama te sogo eno ma tueibao,” Jisasgo te po wai.

¹⁷Te Jisasgo agai te bono du kaneme wain wę pągąwai kap selama, Godibolo usu da po olama, tama aga bidi dabebolo mayu, te po wai, “Dage te bono du kaneme wain wę selama, duga hasi tomode dobola selama, tuao.

¹⁸Eno dagebolo obao, megi tama gagalama, eno bono du wain wę ma tugobeo. Tama tusiąbadi, te Godigo agai we bidi tonalubo sogo pedalabo sogo eno e nai ma tueibao,” Jisasgo te po wai.

¹⁹Te Jisasgo agai te diluai nai bret me selama, Godibolo nage usu dao olama, tama te nai bret nogogo togolama, aga bidi dabebolo dobawai. Agai te po wai, “E nai eno tigi mi dao. Eno dage tau somainogo mobao. Tuao. Ena isilama, dage nosali tama tuyu, ena konealu bidao,” te po wai.

²⁰Te nosali genuai nai tulama, te Jisasgo agai te diluai nai bret dobayu yali tiwai egi pelama, te bono du kaneme wain wę me tama tiali. Agai te po wai, “E bono du kaneme da, te eno kaneme dao. Gesi tų eno kanemego nigaibao, dage God dali mu kęą somainogo, eno kaneme gelebao.

²¹Dagego suao. Ena te boi bidigo nogoba muabo bidi ena dali ede bidibao.

²²Ena da te Godigo Bidi Mu da. Ena te Godigo polobadu tų nigilai te tųdu paibao. Tiali goli, ena te boi bidi nogoba muani bidi tede ena hobede mu ebao,” wali.

²³Te Jisasgo te po obaso, agai bidi dabe augwa hasi hanalua peyu, dego te kolesaga yaibawe, augwa hasi te po wai.

²⁴Te Jisas wali pabo bidi dabe augwa hasi konila yali. Tama konila po weyu, te po wai, “Da tomode mena bidi te polalubo bidi dawe?”

²⁵Jisasgo te po augwali dali wai, “Te Juda bidi hani isąwai dabego tobolu bidi dabe augwaligo bomo elalu, te we bidi tonalubo dao. Augwali genuai bidi bidibo dao. Augwaligo te we bidigo te tuni bidibolo wiegi yai bidi dao omainogo ebo dao.

²⁶Tiali goli, te we bidi dabego te wabe. Tiali goli, dagego te tobage sę egio. Menio. Dage polalubo bidi homu ebaso da, teda dage nosali bidi tiwai bidao, gesi bidi tiwai. Dagego tobolu bidi bidabo homu eyu da, dage sę bidi tau sabo bidi bidao.

²⁷Mena bidi polalubo bidi dawe? Te saide dualama nai tubo bidi dawe? Te sę tau sabo bidi nai poude togola magasobo bidi dawe? Te saide dualama nai tubo bidi naga te polalubo bidi dao. Tiali goli, ena dage tomode bidiyu dage sę tau sabo bidi dao,” Jisasgo te po augwalibolo wai.

²⁸“Te polobadu te sę pedelama, enaba te haniani sęgę asainogo yai digi, dage ena dali bidai dao. Tama dagego ena taga soai menio.

²⁹Eno Ayago we bidi tonalubo sę enabolo mawai. Tiali gilama, eno te sę dagebolo mobao.

³⁰Nosali eno tigidali we bidi tonalubo side, dage ena dali hodobo nai tuagameo. Tama dage te tobolu bidigo duabo ni namide dualama, tama dagego te Israel bidi hani nogo si olama, sągą badu si te we bidi hani po dodolobo hani bidagameo,” Jisasgo te po aga bidi dabe dali wai.

³¹Te Jisasgo te bidi Saimonbolo weyu, te po wai, “Saimon, Saimon, nage odao. Te dwai haubo noma bidi nogi Satan agai dage dayu, usu sainogo, agai God hanalu wali. Tama Godigo ‘Ao’ wali.

³²Satango te sę yainogo yai digi, eno nage tau sainogo, God hanalu wali, ‘Saimon tau sao. Agai homu kolesaga tigidali nageba mubo sę tagalidali weyu, nago Saimon tau sao.’ Tama Saimon, nosali nage begasa, ma aselama, tama nago naga ama dabe bomo mayu dąų walao,” Jisasgo te po wai.

³³Pitago Jisasbolo wai, “Genuai Bidi, ena nage dali kalabus paibao. Ena nage dali isabo me sisi yalio,” Pitago te wai, Jisas dali.

³⁴Jisasgo Pitabolo te po wai, “Pita, eno nagebolo obao, e sogo hulide te ba kakaruk po wasiąbadi, tama nago sela sogo waibao, ‘Eno Jisas nogi konebe.’ Te po nago waibao,” Jisasgo te po wali.

³⁵Jisasgo te po aga wali bilali bidi dabe augwalibolo wai, “Polobadu eno dage te sę egi pao weyu, duga gamugi dage masigi dali, wa dali, sągą nadoba dali sela pigio, te po wai. Tiali sogo, dage nai me deli sǫą paidawe?” Jisasgo augwali dali te po wai, tama augwaligo “Menio,” te po wai.

³⁶Jisasgo augwali dali te po wai, “Tiali goli, megi te gamugi dage masigi munalubo bidigo te nai sao, te wa munalubo bidi me aga wa sao. Tama hwą ge meni yai bidi da, teda aga ugwa menama, gasa bidigo abelama, te ugwade sai masigigo te moni hwą ge sao,” Jisasgo te po wai.

³⁷“Magi basowe? Bukude wali po augwaligo te po wai, ‘Augwaligo homude augwaligo aga dali dwai bidi dabe dali sisilai dao,’ wali. Tama eno dagebolo obao, tigidali po bukude wali po tiwai ena dali nai gilama walaibao. Ena tǫde bidibo sogo tamadi sia saibao,” Jisasgo te po aga bidi dabebolo wai.

³⁸Augwaligo te po wai, “Genuai Bidi, nago suao, dago moni hwą ge si e dao.” Jisasgo sulama, augwalibolo te po wai, “Te tama usu dao.”

³⁹Te Jisas te be taga peyu, te bulu du nogi Oliv teba pali, aga polobadu hauwa sogo teba pai dao. Tama aga bidi dabe augwali aga wali pai.

⁴⁰Tama Jisas te bulu du Olivba sabolama, aga bidi dabebolo te po wai, “Dagego Godibolo hanalu po wao, te Satango dage dwai sę tomoba gegidali weyu.”

⁴¹Tama Jisasgo augwali taga peyu, aga dwasianu bobenu gana palio. Agai kidu tǫba sugunama, Godibolo po weyu, te po wai,

⁴²“Eno aya, nago homugo usu da wida, te sęgę enade elalubo dagala sąyao. Tialima, nago eno homu wali pelamuo. Naga homu kolesaga naga wali pao,” Jisasgo te po wai, aga Aya dali.

⁴³Tama Godigo sę ebo mobo ensel bidi me deli dagaludu asiyu, pedelagaselama, te Jisasba bomo mayu tau sali.

⁴⁴Jisas aga homu sęgę mu ebaso, Godibolo aga hanalubo po bomonama wai. Tama Jisasgo tigide te posolo wę kisu yai, te wę te tǫba tuloluai, te kaneme tiwai.

⁴⁵Te Jisasgo aga Godibolo wali po silama, tama hodaluama, tama aga bidi dabe pageba ma pali. Tama augwali godege pibo aga suali. Augwali homu sęgę mu ebaso, tama augwali godege piai.

⁴⁶Tama agai augwalibolo te po wai, “Ya, dage magi baso pibawe? Hodaluiąo. Godibolo hanalubo po wao, te Satango dage dwai sę tomoba gegidali weyu,” Jisasgo te po wai.

⁴⁷Te Jisasgo aga po obadi yaide, tama genuai bidi hani pąba asali. Te bidi Judas te Jisas wali pabo bidi nogo si olama, sągą me badu si tomode bidali, te bidi polasa asai. Tama aga aselama, Jisas dali pąba kisa sagasai.

⁴⁸Tiali goli, Jisasgo agabolo te po wai, “Judas, ena da te Godigo Bidi Mu dao. Nago kisa sagasu, ena te boi bidi dabego nogoba mubawe?”

⁴⁹Jisasgo bidi dabe augwaligo te sę pedalabo maga ebaso, augwaligo te po wai, “Genuai Bidi, nago usu da wida, dago te boi bidi dabe hwą gego elaibao,” te po Jisas dali wai.

⁵⁰Tama te tamadi asai bage tomode te pris tuni bidigo sę ebo bidi me deli bidai. Tama Jisas wali pabo bidi mego te bidigo dolo nogo badu olo moni kago hwągo togwa sąwai, tama te olo tǫba tuloluai.

⁵¹Tiali goli, Jisasgo te sulama, te po wai, “Tagalao. Me menio.” Tama agai nogo te boi bidi oloba muai, tama te olo dwagi yai ma yai.

⁵²Te Jisasgo agai po wai, te pris tuni bidi dabe me, te Moni Lotu Be tempel tonalubo tuni enesigi bidi dabe me, te monu dabe me, augwalibolo agai po wai, augwaligo aga tuainogo asali baso. Agai te po wai, “Dagego moni kago hwą dabe, wąbi dabe sesali da. Te dagego nai wi sai bidi nogo tulama, sela painogo asobo ąǫ yaliwe?” Jisasgo te po boi bidi dali wai.

⁵³“Tigidali sogo dage dali ena te Moni Lotu Be tempel tomode bidai dao. Te sogo dagego ena me sai menio. Tialima, megi e sogo dagego Godigo bodolu muani side dao, dagego duga homu wali piąo. Megi Satango bomogo sę ebo side dao,” Jisasgo te po te boi bidi dabe dali wai.

⁵⁴Te Jisasgo aga po ola silibo si da, augwaligo aga nogo pageabi elama, sela pai. Augwaligo Jisas odasa peyu, te Godibolo te polalubo tuni pris bidigo beba pai. Tama Pita me augwali wali pai. Tiali goli, aga digibulu gana bidai.